Aalisarnermut inatsit allanngortinneqassanngitsoq

Ukioq nutaaq aallarnerfigalugu aalisarnermut inatsisip nutaap, taamatut isikkoqartillugu atuutilersinneqarnera, Demokraatiniit arlaleriarluni sakkortuumik isornartorsiorneqartarpoq.

Taamaattumik 11. marts Inatsisartunut qinersinerup kingorna Demokraatit politikkikkut pissaanermik tigusimmata, tamatumalu kingunerisaanik partiip oqaluttuarisaanerani siullerpaamik Aalisarnermut Piniarnermullu Naalakkersuisuutitaqalerlutik, aalisarnermut inatsit arlalitsigut allanngortinneqarumaartoq amerlasuut isumaqarsimapput.

Taamaattumik Inatsisartunut ilaasortaq Siumullu siulittaasorisimasaa Erik Jensen, aalisarnermut inatsit allanngortinneqassanersoq paragraf 37 naapertorlugu Nalaakkersuisunut apeqquteqarpoq. Naalakkersuisooqatigiilli aalisarnermut inatsit maannakkut allanngortissallugu kissaatiginngikkaat, Aalisarnermut, Piniarnermut, Nunalerinermut Imminullu Pilersornermut Naalakkersuisoq, Peter Borg, Demokraatit, akissuteqarluni ilaatigut allappoq.

Tamannalu aalisartut kattuffiinit KNAPK-mit aamma QAK-mit assigiinngitsunik isumaqarfigineqarpoq.

 Allannguisoqassanngitsoq  

Naalakkersuisooqatigiinnissamut isumaqatigiissut Demokraatiniit, inuit Ataqatigiinniit, Siumumiit Atassummiillu atsiorneqartoq naapertorlugu, aalisarnermut siunnersuisooqatigiinnik attuumassuteqanngitsunik pilersitsisoqassaaq. Siunnersuisooqatigiinnik pilersitsinissaq pillugu erseqqissaataasinnaasunik ilassutissaasinnaasunillu aalajangiinissamut maannakkut isumaliuteqartoqartoq, Peter Borg paasissutissiivoq.

- Nalunaarutit suli naammassineqanngitsut maannakkut inaarsarlugit ukkatarineqarput aamma nalunaarutit maannakkut atuuttut naleqqussarneqarlutik. Tamatumunnga atatillugu aalisarnermut kattuffiit ataavartumik oqaloqatigisarpakka.

- Soorlu oqaatigineqareersoq aalisarneq pillugu inatsit maannakkut allanngortissallugu pilersaaruteqartoqanngilaq.

- Nutaanilli kingusinnerusukkut inatsisiliortoqassappat imaaluunniit inatsisinik allannguisoqassappat suleqataasut attuumassutillit suliamut peqataatinneqarumaarput, Peter Borg oqarpoq.

Suleqatigiissitat amerlanertigut naalakkersuisoqarfinnit attuumassuteqartunit sinniisunik inuttalerneqartassasut, kiisalu soqutigisaqartut attuumassutillit ilanngussaqartassasut, Erik Jensimut akissummi erserpoq.

Imaani pisuussutit tamakkiisumik kalaalliniit pigineqalernissaat aammalu aningaasalersorneqarnissaannik aalajangersimaneq allanngortinneqassanngitsoq, Aalisarnermut Naalakkersuisoq erseqqissaavoq. Aalisarsinnaanermut akuersissutit pisassiissutillu pillugit Namminersorlutik Oqartussat nalunaarutaat upernaaq atuutilersinneqartoq naapertorlugu, sinerissap qanittuani qaleralinniarnissamut akuersissummik kissaateqartunut 18-iniit 29-nut ukiulinnut killeqartinneqarpoq, tamannalu suli atuutissanersoq nalilersorneqartoq, taassuma ilanngullugu paasissutissiissutigaa.

Akissut naammagisimaaraa 

Aalisarnermut Piniarnermullu Naalakkersuisup taamatut akissuteqarnera tupaallaatiginagu Erik Jensen oqarpoq.

- Naalakkersuisut suleqatigiinissamut isumaqatigiissutaat tunngavigalugu sulineq ingerlanneqarniarnersoq, imaluunniit qineqqusaarnerup nalaani aalisarnermut inatsisip allanngortinneqarnissaa pillugu Demokraatit oqariartuuteqarnerat piviusunngortinniarneqarnersoq, apeqquteqarninnut tunngaviuvoq, taanna oqarpoq.

Aalisarnermut inatsisip allanngortinneqassannginnissaa pillugu Peter Borgep oqariartuuteqarnera, qinigaaffiup siuliani Naalakkersuisuusimasut aalisarnermut inatsisissamut tunngatillugu suliarisimasaannik Demokraatit naammagisimaarinninnerannik ersersitsisoq, Erik Jensen isumaqarpoq.

Ilungersunartoq

Aalisarnermut inatsisip taamatut isikkoqarluni atuutilersinneqarnissaa Kalaallit Nunaani Aalisartut Piniartullu Kattuffiata KNAPK-p isornartorsiortarsimavaa, inatsisillu allanngortinneqarnissaanik Naalakkersuisut pilersaaruteqannginnerat, qinersisartunik minnerunngitsumillu aalisartunik uukapaatitsinertut isigineqartariaqartoq, KNAPK-p siulittaasua Nikkulaat Jeremiassen isumaqarpoq.

- Aalisarnermut inatsisip allanngortinneqannginnissaanik oqariartuuteqarneq ilungersunartorujussuuvoq.

- Nalunaarutit allanngortinneqarnissaannut atatillugu aalisarnermut kattuffiit ataavartumik oqaloqatigineqartut Aalisarnermut Naalakkersuisup oqaatigaa, uagulli tassunga atatillugu saaffigineqarnikuunngilagut, taanna oqarpoq.

Aalisarnermut inatsit Kalaallit Nunaanut inuinullu naleqqussarneqanngippat siunissaq ernumanartoq, Nikkulaat Jeremiassen isumaqarpoq.

Iluarisimaarinnittoq

Aalisarnermut inatsisip allanngortinneqarnissaanik Naalakkersuisut pilersaaruteqannginnerat Qalerualinniat Aalisagarniallu Kattuffiannit QAK-mit iluarisimaarneqartoq, kattuffiup siulittaasua Henrik Sandgreen oqarpoq.

- Aqutsinissamik pilersaarutit nalunaarutillu ilai suli suliarineqartut, aalisarnermut inatsimmik allanngortitsinialissagaanni tamanna tulluanngilaq, taanna oqarpoq.

Inatsisartunut qinersinissaq sioqqullugu ukioq januarimi QAK-p aaqqissuussaanik aalisarneq pillugu Ilulissani qinersisartunik ataatsimiisitsisoqarmat, Demokraatit siulittaasuata maannakkullu Naalakkersuisunut siulittaasuusup, Jens-Frederik Nielsenip, kingulliulluni saqqummiinermi aalisarnermut inatsisip atuutilersinneqarnera sakkortuumik isornartorsiorpaa, taannalu ataatsimut isigalugu aalisartut atugaannik annertuumik ajornerulersitsissasoq nutaamillu ilusilersorneqartariaqartoq, taassuma taamanikkut oqaatigaa.