Aalisarnermut inatsit: Atorunnaarsitsinissamik kalerriuteqarneq akuersaarneqarsinnaanngilaq
Aalisarnermut inatsisissamut nutaamut siunnersuutigineqarpoq akuersissutit piffissaligaanngitsut ”piffissaqarluarluni kalerriutiginninnikkut” atorunnaarsinneqarsinnaassasut, aalisarnermut naalakkersuisoqarfiup tamanna ukiuni qulini atuuttussatut aalajangersimavaa. Tamannali sivikippallaarpoq, tusarniaanermi akissummi allaqqavoq.
Aalisarnermut inatsisissami nutaami, namminersortut raajarniarnermut akuersissutinik piginnittarnerannik siammarterinissamik politikerit kissaateqarneranni, piffissamut killiligaanngitsumut aalisarsinnaanermut akuersissutinik atorunnaarsitsineq pingaarnertut sammisat ilagaat.
Pisassiissutinik atorunnaarsitsinissamut piffissaliussaq ukiunit quliniit minnerpaamik ukiunut 20-nut sivitsorneqartussatut aalajangersagaq Polar Seafoodip eqqugaaffiginerpaassavaa, Polar Seafoodimi pisortat Miki Brøns aamma Bent Salling Sermitsiaq.AG-mut erseqqissaapput.
Ukiunik qulinik piffissaliuussineq naleqquttuusoq inatsisissatut siunnersuut pillugu oqaaseqaammi aalisarnermut naalakkersuisoqarfik allappoq:
“Ullumikkut akuersissutit piffissaligaanngitsut piffissatigut eqqortukkut kalerriutiginninnikkut atorunnaarsinneqarsinnaalereerput, malittarisassallu nutaat aalisartut pilersaarusiornissamut aningaasaliinissamullu periarfissaannut allannguinavianngillat, taamaattumillu aalisarnerup aningaasaqarneranut sunniuteqarnavianngillat.”
Polar Seafoodip tamanna mamiasuutigingaarpaa.
Aningaasarpassuit aningaasaliissutiginiaraat
- Kilisaatinik 600 millionit koruunit sinnerlugit akeqartunik annertuumik aningaasaliiniarpugut. Ukiut 20-t 25-llu akornanni nalikillinissaannut pilersaarusiorpugut. Piffissaligaanngitsumik akuersissutinit isertitaqarnissaq naatsorsuutigigatsigu milliardilikkaanik aningaasaliiniarpugut. Akuersissutit taakku atorunnaarsinneqarpata siunissami aningaasaliissutigiumaakkatsinnut nalikilliliinissamut piffissaqartariaqarpugut annaasaqannginniassagatta, Polar Seafoodimi pisortaasut marluk taama oqarput.
Inatsisissatut siunnersuutip annertuup ilarujussuata ilaa taanna iluarsineqarumaartoq neriuutigaat.
Aningaaseriviit aamma isumakuluuteqarput
Banknordik-imi aamma ukiunut qulinut atuuttussaq sivikippallaarsorineqarpoq:
- Umiarsuarnik pisinermut aningaasalersuineq ukiut qulit sinnerlugit sivisussuseqartarnera nalinginnaanngilaq, taamaattumillu pisassiissutit piffissaligaanerat sivikitsoq aalisariutaatilinnut nutaanut aningaasalersorneqarnissamut ajornakusoornerulersitsisinnaavoq, naak pisassiissutit ukiut qulit sinnerlugit sivisussuseqartarnerat pillugu malittarisassaq naapertorlugu piffissaliussat ukiut tamaasa sivitsorneqartaraluartut (Kitaani saarullinnik aalisarnermi ukiut tallimat eqqaassanngikkaanni).
- Umiarsuarnik pisinermi aningaasalersuineq ukiut 15-it missaanni sivisussuseqartarpoq, taamaattumillu ukiuni 15-ini pisassiissuteqartarneq aalisartunut nutaanut aningaasalersorneqarnissaminnut periarfissaqarnerulersitsissagaluarpoq, Banknordik tusarniaanermut akissummini allappoq.
Polar Seafoodip inatsisissaq atuutilersinneqarpat suliaq ingerlatiinnarusuppaat. „Piffissaqarluarluni kalerriutiginninneq“ ukiunik qulinik sivisussuseqarpat, tamanna Polar Seafoodip tunngaviusumik inatsimmut akerliusutut isigissavaa, tamannalu eqqartuussivimmi aaqqiagiinngissuteqarnermik kinguneqarsinnaavoq, nunatsinni aalisarnermik suliffeqarfiit namminersortut annersaata uppernarsarsinnaasorisaanut annaasami assingi nunatta karsianut taarseqqusinnaammagit.