Aalisartoq pakatsisimasoq PNNP pillugu: Pisassakka ikilisinneqarput
Aalisartoq Thomas Fisker Ilulissaneersoq PNNP-mik (Pisassiissutit Niuerutigineqarsinnaasut Nammineq Pigisat, aaqq.) aaqqissuussinerup siunertaanut tatiginnilluni nuuppoq, naatsorsuutigalugu pisassani attatiinnarsinnaallugit, aammalu pisassanik niueruteqarsinnaalissalluni. Kisianni pisassani pillugit aalajangiussimasat tigugamigit tupappoq, tassami pisassani tamarmiusut naatsorsuutigisaminit 15 procentimik ikilisinneqarput.
PNNP-mut nuussimasut aalisartut arlallit paasisinnaanngilaat sooq pisassiissutitik neriorsuutigineqarsimasunit ikinnerunersut. Thomas Fisker pakatsisut ilagaat: - Nassuiaatissaqanngilanga sooq paggatassiissutinik aalisarnermik ingerlatsisimaninnit ajornerusumik inissisimasunga. Piffissaliussaq qaangiutsinnagu naammagittaalliuuteqarniarsarivunga, kisianni aalisarnermut immikkoortortaqarfimmit akerlilersorneqaannarpunga, taanna nassuiaavoq.
Assiliisoq: Leiff Josefsen
Thomas Fisker piaarnerpaamik qisuariarpoq, takugamiuk qanoq ajornerusumik inissisimalersimanini paggatassiissutiniit pisassiissutit niuerutigineqarsinnaasut nammineq pigisanut nuukkami:
- Assut pakatsivunga kamaammertitaasutullu misigisimallunga. Pisassiissutigineqartut pillugit naammagittaalliorsinnaanissamut piffissaliussap iluani naammagittaalliuuteqarniarsimagaluarpunga aamma aalisarnermut immikkoortortaqarfimmut oqaloqatiginninniaraluarpunga, aqutsiveqarfik 47-mi qaleralittassiissutima uppernarsaataat tigugakku. Pisassaatikka 15 procentimik appariarsimapput, taannalu isumaqarpoq ukiumut 200.000 koruuninik isertitakinnerulertussanngortunga, taannalu aamma isumaqarpoq ukiuni qulini pisassiissutaatima atuunnerani 2 millioner koruuninik isertitakinnerulertussanngortunga.
- Tamatuma saniatigut isumaqarpoq quota atorsinnaasannik peqannginnera. Tamanna pisarpoq Naalakkersuisut neriorsuisimagaluarmata 33 procentimik quota atornerlunneqarsimanngitsut kingulliit tallimat ingerlaneranni ukiut pingasut pitsaanerpaat tunngavigalugit.
Tassa Thomas Fisker oqaluttuarpoq pisassissutigineqarsimasut pillugit naammagittaalliuuteqarniarsimagaluarluni aammalu aalisarnermut immikkoortortaqarfimmut oqaloqatiginninniarsimagaluarluni, nassuiaatissarsiorluni naammagittaalliuuteqarfissaq sioqqullugu, kisiannili taanna naapertorlugu siuariartoqanngilaq.
Peter Storch Aasianneersoq aamma narrujuummisimavoq
Aalisartoq alla, tassaasoq Peter Storch Aasianneersoq aamma narrujuummisimavoq, imminut pisassiissutigineqarsimasut ukiumut taamaallaat 7 tonsiussasut takugamiuk:
- Ulluni aalisarluarfinni, ullut 14-it iluanni 7 tons aalisarsinnaavara, kingornalu ukiup sinnera tassa pisassaarutissallunga, aalisartoq kinaluunniit taama pisassakitsigaluni inuussutissarsiumminik ingerlatsisinnaanngilaq, taamaattumik allatut iliorsinnaannginnama pisassanut paggatassiissutinut uterpunga.
Peter Storchip paasiuminaatsippaa sooq kvotini taama appasitsigisoq, Thomas Fiskerip assinganik naatsorsuutiginnissimagaluarpoq, tassa naatsorsuutigalugu ukiuni kingullerni tallimani ukiuni pingasuni pitsaanerpaaffiusuni tunngavigalugu naatsorsorneqassasoq qanoq pisassinneqarnissani.
- Ukiumut 30 tons-it tikillugit qaleralinnik aalisarsinnaavunga. Taamaattumik tupatsitaarujussuarpunga, uannut pisassiissutigineqartut 7 tonsiinnaassasut takugakku. Taamaammat sukkanerpaamik paggatassiissutinut uternissara anguniapallappara, taamaalillunga minnerpaamik 7 tons-it sinnerlugit pisarisinnaasassallugit qulakkeerusullugu, Peter Storch pakatsisimalluni oqarpoq.
Immikkoortortaqarfik: ilaasa 1 tons pisarissavaat, ilaalli 73 tons IOK-mi ukiumut pisarisarpaat
Aalisarnermut piniarnermullu immikkoortortaqarfimmi pisortaq, Katrine Kærgaard, Sermitsiamut nassuiaavoq, PNNP aqqutigalugu agguaanneqarsimasut, taakkunannga pisassiissut minnerpaaq 1 tonsiulluni ukiumut pisarineqarsinnaasoq, illuatungaanilu 37 tons-inik aamma agguaassisoqarsimasoq.
Aalisartut arlallit paasiuminaatsippaat aalisarnermut naalakkersuisoqarfimmit pisassiissutit qanoq naatsorsorneqarsimanersut, taakku innersuussutigaat neriorsorneqarsimallutik ukiuni kingullerni tallimanit ukiuni pingasuni aalisarluarnerpaaffigisat tunngavigalugit naatsorsorneqassasut?
- Aalisartut tamarmik qanoq pisassinneqassanersut assigiimmik naatsorsuunneqarsimapput qanoq amerlatigisunik pisassinneqassanersut, tamannalu pivoq aalisarnermut inatsimmi § 29 naapertorlugu, tassa eqqorpoq ukiuni kingullerni tallimani ukiut aalisarfiulluartut pingasut tunngavigalugit pisassiisoqarluni. Pisassiissutit pillugit qinnuteqaatit 500-t sinnerlugit amerlassuseqarput taakkunannga ataaseq kisiat pisassinneqarnerminik naammagittaalliuuteqarpoq, immikkoortortaqarfimmi pisortaq Katrine Kærgaard Sermitsiamut nassuiaavoq.
Apeqqutigineqarmat aalisartut pisassaat qanoq agguataarsimanersut takuneqarsinnaanersoq, Katrine Kærgaard Kalaallit Nunaanni Aalisarnermut Piniarnermullu Nakkutilliisoqarfiup quppersagaa aqqutigalugu kingusinnerusukkut saqqummersinneqarumaartut innersuussivoq.
Tamatuma saniatigut aamma Kærgaardip erseqqisssaatigaa aalisartut pisassinneqarnermik kingorna 25. november killigalugu kukkuneqarsimappat uppernarsaatitalerlugu iluarseeqqusisinnaanikuusimasut. Taamatuttaaq PNNP-mut nuunnissamik qinnuteqarsimagaanni peqqissimilerlunilu tamanna 27. december 2024-iutinnagu nalunaarutigineqartussaanikuusoq. Ullumikkullu PNNP-mut nuussimasut paggatassiissutinut uteqqissinnaajunnaareersut.
Pisassiissutinik niuffaffissamik nittartakkamik pilersitsisoqassaaq
Aalisartoqarsimappat pisassiissutigineqartut sinnerlugit pisaqarsinnaasunik, taava allat pisassaataannik ukiumoortumeersumik pisiniarsinnaapput, imaluunniit aamma ukiumoortumik pisassiissutit arlallit pisiarisinnaalissavaat, taamaalillutillu pisassiissutiminnik annertusaasinnaallutik.
- Qaammatini tulliuttuni nittartakkatigut quppernermik pilersitsisoqartussaavoq aalisartut pisassaatiminnik niuffanneranni ikiuutaasinnaasumik. Nalunngilarput aalisartut arlallit qaleralinniarnermi PNNP-mut ikaarsaarnikut, piginnaasaminnut sanilliullugu pisassaateqarpallaartut, taakkulu piginnaasaminnik annertusanngikkunik pisassiissutaatimik ilaat ukiuni aggersuni tuniniarumaaraat naatsorsuutigineqarsinnaassaaq, tassami pisassiissutit 75 procentii ukiut tamaasa pinngitsooratik qaqittartussaagamikkit, taamaaliornikkut aamma PNNP najoqqutaralugu aalisartut piginnaasaminnut naleqqussarsinnaalissavaat, aalisarnermut piniarnermullu immikkoortortaqarfimmi pisortaq, Katrine Kærgaard nassuiaavoq.
