Aalisartut sikorsuaqarneranit eqqugaasut tapiiffigineqarput
Qassimiuni Aappilattumilu aalisartut 13-it sikorsuaqarnera pissutigalugu sivisuumik aalisarsinnaasimannginnamik katillugit 592.457 koruuninik ikiorserneqarput.
Sikorsuaqangaarnera pissutigalugu aalisartut 13-it sivisuumik aalisarsinnaasimanngitsut ikiorserneqarnissaat Naalakkersuisut akuersissutigisimavaat.
Toqqorsivimmit assiliisoq: Leiff Josefsen
Kujataani takornariartitsisartut ikiorserneqarnissaat pillugu politikkikkut isumaqatigiinniarnerit unittooqqasut, ukioq manna sikorsuaqarnerata kingunerisaanik kujataani aalisartut tapiiffigineqarput.
Katillugit aalisartut 13-it 600.000 koruuningajannik pissarsisimasut, Aalisarnermut Piniarnermullu Naalakkersuisoqarfik nalunaarpoq.
Tassani pineqarput Qassimiuni Aappilattumilu aalisartut arfineq-marluk, taakkulu silap pissusiata allanngorneranik pissuteqartumik aallartiteqqinnissamut 10.000 koruunit 25.000 koruunillu akornanni aningaasanik qinnuteqarsimapput.
Taakku Nalaakkersuisunit akuerineqarlutik tamakkiisumik tapiiffigineqarput.
Aalisartut arfinillit taakkunannga nunaqarfinnit marlunneersut aallartiteqqinnissamut 44.000 koruunit 198.000 koruunillu akornanni aningaasanik tapiiffigineqarnissaminnut qinnuteqarsimapput. Taakku qinnutigisaasa 75 procentiinik tapiiffigineqarput.
Tapiissutigineqartut tamakkiisumik tapiissutigineqarsinnaasut qaangeqqagai naalakkersuisoqarfik ilisimatitsivoq, taamaattorli pissutsini immikkut ittuni tapiissutigineqartut amerlanerusinnaapput.
Aalisartut eqqugaasut tapiiffigineqarnerisa saniatigut takornariartitsisartut sikusimanerata kinguneranik umiarsuarnik takornariartaatinik tikinnissanik taamaatitsiinnarnermik eqqugaasut ikiorserneqarnissaat Naalakkersuisut sulissutigaat. Ikiorsiissutilli pillugit Naalakkersuisut nalunaarusiaat Aningaasaqarnermut Akileraartarnermullu Ataatsimiititaliap itigartitsissutigaa.
