Aallarnisaasunut aningaasateqarfik 400.000 koruuninik aningaasartaqartoq pilersinneqartoq
Aningaateqarfik nutaaq Kujataani inuussutissarsiornermik ineriartortitsinissamut iluaqutaassaaq.
- Inuussutissarsiornermik siuarsaanermut aningaasaliissutit nutaat nunap immikkoortuani periarfissanik nukittorsaasussatut alloriarnerupput. Tassani isumassarsiat nutaat ineriartortinneqarsinnaapput, tamannalu Innovation South Greenlandimi aqqutissiuusseqataaffigiumavarput, Miki Jensen, Innovation South Greenlandimi pisortaq oqarpoq
Assiliisoq: Lars Kleemann Andersen
Kommunip inuussutissarsiornermik siuarsaanermut ingerlatseqatigiiffiutaa Innovation South Greenland (ISG) aningaasaateqarfimmik 400.000 koruuninik aningaasartalimmik saqqummiussivoq, taannalu sumiiffimmi inuussutissarsiornermik ineriartortitsinissamut tapersiissaaq.
Suliffeqarfiit nutaat suliffeqarfiillu pioreersut Kujataani inuussutissarsiornermik ineriartortitsinissamut suliniuteqartut aningaasaliissutinik qinnuteqarsinnaapput, ISG tusagassiuutinut nalunaarummi ilisimatitsivoq.
- Inuussutissarsiornermik siuarsaanermut aningaasaliissutit nutaat nunap immikkoortuani periarfissanik nukittorsaasussatut alloriarnerupput. Tassani isumassarsiat nutaat ineriartortinneqarsinnaapput, tamannalu Innovation South Greenlandimi aqqutissiuusseqataaffigiumavarput, Miki Jensen, Innovation South Greenlandimi pisortaq oqarpoq
Suliniummut ataatsimut tapiissutit amerlanerpaamik 50.000 koruuniusinnaapput, qinnuteqartullu piumasaqaatinik arlalinnik uppernarsaatissaqartariaqarput. Ilaatigut suliniummut tunngatillugu sukumiisumik nassuiaat suliffeqarfiullu piginneqataaffigisaanik paasissutissat pineqarput.
Qinnuteqartoq aningaasaliissutinut nutaanut qinnuteqaruni Nalik Venturesimit, Namminersorlutik Oqartussat inuussutissarsiornermik siuarsaanermut ingerlatseqatigiiffiannit, tapiiffigineqarsinnaanngilaq. Ukiumut sisamariarluni qinnuteqartoqarsinnaavoq, qinnuteqarfissamullu tulliuttumut oktobarip aallaqqaataat killissarititaavoq.
Innovation South Greenland Kommune Kujallermit pigineqarpoq.
