Aallarnissaasoq: Sorsuutigisassat suli amerlaqaat

Danskit suliffeqarfiat Roccamore – Italiamiut ippiliukkamut (roccaforte) asanninnermullu (amore) taaguutaannik katitigaasoq – ukiuni kingullerni kimmikkaani pumpsinilu atoruminartunik niuerfimmi inissisimanerminik patajaallisaavoq. Peqatigisaanik pilersitsisoq pisortarlu Frederikke Antonie Schmidt nammineq periutsini atorlugit ingerlatsinissaminik uteriiserpoq, arnallu nukittunerusumik inissisimallutik naak aningaasalersuisinnaasunik pissarsiniarnerup ajornarsinnaanerani nammineq isumassarsiaminnik upperinninnissaannik kaammattorpai.

– Nipituallaarnera, inituallaarnera ataatsimullu isigalugu ingasattajaartuunera uannut oqaatigineqartuartarpoq, suliniutinnullu aningaasaliisussarsiornera ajornarsimaqaaq. Aningaasarsiornermut attuumasumik ilinniagaqanngilanga, aallarnisaanermi misilittagaqanngilanga, atuarfimmilu oqaatigineqartunut malinninnissamut pikkorissorsuunngilanga, Frederikke Antonie Schmidt oqaluttuarpoq, taamaakkaluartorli taanna ukiut qulingiluat ingerlaneranni ukiumut kamippannik 300-nik tunisisarnermit ullumikkut 30.000-nik tunisisarnermut siuariarpoq.

Naak nunarsuarmi kamippannik assigiinngitsorpassuaqaraluarpoq, Frederikke Antonie Schmidtip – kamippannik ilusilersuinermik ilinniagaqartup – kimmikkaanik, pumpsinik kamippannillu atoruminartunut assammillu mersukkanut niuerfissaqarluartoq upperaa. Ortopædisk håndskomager peqatigalugu kimmik alup iluliumarngani ikorfartuilluarnerusoq annoraaminerlu aqitsoq isikkap saavani qummut ajatsisulik, taamaalilluni isikkap kamippannik attuunneranik annerulersitsisoq ineriartortippaa. Taamaalilluni oqimaassuseq siaruarneqarneruvoq isikkallu saavani naqinneq annikinnerulerluni.

Namminerli suliami silatussuseq ataasiuvoq. Suliniutinulli pilersaarusiorneq, missingersuusiorneq aningaasaateqarfinnullu aningaasaliisarfinnullu, angutaanerusunut, taamaalillutillu tunngaviusumik kimmikkaanik atoruminarnerusunik pisariaqartitsinermik paasinnissinnaanngitsunut qinnuuloorneq allarluinnaavoq.

2014-mi Frederikke Antonie Schmidt amerikamiut ataatsimoorfianni Kickstarterimi suliniummut aningaasassarsiornissamik misiliissalluni aalajangerpoq.

– Anguniagarisimasama marloriaataannik aningaasassarsivunga, taamaattoqarneratalu sanaartukkannik siullernik, Spaniami suliarititannik aallartissinnaanera pisinnaanngortippaa.

Crowdfunding ilikkarniarnerlu akisooq

Spaniamilli ilikkagai akisoqaat, taamaammallu nutaamik aningaasaliisussarsiortariaqarpoq, taamaalilluni tunisassiorneq Italiami suliffissuarmut nuussinnaaniassagamiuk. Tassanngaanniilli kigaatsumik siuariartorpoq, ukulu arlaat allanit pitsaanerusarput. Taamaattoqarneranilu nammineq ilimagisaminut naapertuuttunik periuseqarnissaq, eqqortuusorisamillu iliornissaq aallaavigiuarpai. Akisussaassuseqarnissarmi pingaarnerpaavoq. Tamannalu muteerninik niuerfiit ilisarnaatiginngivippaa.

– Tunisassiunngivinnissaq piujuartitsinersaavoq. Taamaammat akisussaassuseqarnissaq, ersarissumik ingerlatsinissaq nalitusiartornermillu ataqqinninnissaq oqaluusererusunneruakka.

Siunissami suliffeqarfiit nalitusiartortitsinerminnik saqqummiissallutik ernumassuteqanngitsuussasut isumaqarpunga, taamaammallu ullumikkut sanaartukkamma 30 procentiini kamippannik QR-kodeqarpoq, taannalu atorlugu pisisartup scannerinermini nioqqutip utimut nersussuaq, ammip pilerfia tikivillugu ingerlaarnera takusinnaavaa. Qallunaat nersussuaasa silami narsaatini aneersartut amiinit atuinissara toqqarsimavara, taannalu nunarsuarmi atisaliortartut amerlanersaannit, nersussuit amiinik brasiliameersunit, uumasut ineerannguanni amiisa ajortinnginnissaat anguniarlugu madrassinik iikkersukkanik atuisunit allaanerussutigaara. Tamatuma saniatigut aallaqqaataanilli amerlavallaanik tunisassiunnginnissaq eqqagaqannginnissarlu pinaveersimatinniarparput, ammillu sapinngisamik annertunerpaartaa atortarparput, Frederikke Antonie Schmidt, ukiut ingerlaneranni niuernermik ingerlatseriaatsiminik qallunaanik aningaasaliisartunik akuersisitsiniarnerminik unammilligassaqartuartoq oqaluttuarpoq. Taarsiullugu nunanit allanit aningaasalersuisussarsivoq, tamaanilu nalinginnaasumit allaanerusunik suliniuteqarnermut ammanerusoqarnera misigaa.

Naligiinneq periarfissallu naligiissut

Frederikke Antonie Schmidt siornatigut Kalaallit Nunaanniissimanngilaq aallarnisaanissamulli periarfissaqarluarnera pissanganartumillu niuernikkut periarfissagissaarnera takusinnaava.

– Nioqqutissap oqaluttuassartaa ersarissumik oqaluttuarisinnaagaanni nioqqutissat Kalaallit Nunaanneersut nittarsaanneqarsinnaasut isumaqarpunga, tassanilu immaqa aningaasaliisartut nunanit allaneersut ikiortigineqarsinnaapput. Nittarsaassinermut tunngatillugu Kalaallit Nunaanni immikkuullarilluinnartumik peqartoqarpoq, nunarsuup sinnerani innuttaasut ikittuinnaat assilisinnaasaannik. Periarfissaqarpoq sulissutigineqarsinnaasunik, taanna oqarpoq, taassumalu kalaallit arnartaat periarfissamik atorluaallutik aallarnisaanermik ingerlatsilersinnaasut neriuutigaa – aamma aningaasalersuisussarsinissaq ajornakusoorsinnaagaluarpalluunniit.

– Danmarkimi aningaasaliissutit 0,1 procentiinnaat suliffeqarfinnik aallarnissaasunut arnaannarnik aallartitsisunik inuttalinnut atorneqartarput, Frederikke Antonie Schmidt Unconventional Ventures 2022-mi nalunaarusiaa innersuussutigalugu oqaluttuarpoq. Europa tamaat qiviassagaanni 2022-mi kisitsit 1,5 procentiuvoq. Taamaammat iluarsisariallit taasassat suli amerlaqaat.

– Naligiissitaaneq annertuutigut naleqqatigiinnermut arnallu angutillu assigiimmik periarfissaqarnissaannut tunngavoq. Ajoraluartumik inuiaqatigiitsinni suli angutit pissaanerumik tigumminnittuunerat atuuppoq, nunamilu akisussaaffinni annertunerpaani arnat amerlanerit issiasuuppata nunarsuaq allaanerussagaluartoq qularutiginngilara.