Aamma Kalaallit Nunaat tillinniarfigineqassava?
Sapaatiummat unnukkut DR-mi KNR-milu filmi piviusulersaardut ´Tyveriet af Afrika´ takutinneqarpoq, tassani nunarsuarmi aatsitassarsioqatigiiffiit annersaasa ilaat sammineqarluni
Sapaatiummat unnukkut DR1-imi KNR1-imilu filmi piviusulersaarut tupannartoq ´Tyveriet af Afrika´ takutinneqarmat immaqa isiginnaaqataavutit, taannalu qallunaamit tusagassiortumit filmiliornermilu ilitsersuisumit Christoffter Guldbrandsenimit sananeqarsimavoq.
Filmimi ´Tyveriet af Afrika´-mi Guldbrandsen nunarsuaq tamakkerlugu kanngussammik piiaaffinnut, akileraarutikinneruffinnut børsinullu angalavoq, paasiniarlugu Zambia, pinngortitap pisuussutaanik taama peqartigisoq, sooq nunarsuarmi nunat piitsuunerpaat ilagineraat.
Tamatumunnga atatillugu Guldbrandsenip schweizimiut niuernermik ingerlatsivissuat Glencore, nunarsuarni aatsitassarsioqatigiiffiit annersaasa ilaat, erseqqinnerusumik misissuiffigaa. Taassuma tupigusuutigaa selskabi ukiumut 1000 milliarder koruunit sinnerlugit kaaviiaartitaqartartoq sooq Zambiami akileraarutinut akiliisannginnguatsiarnersoq.
Atuaruk "Nunatta aatsitassanit iluanaarutissat annaavai"
Tamanna takuneqarsinnaavoq zambiami nalunaarusiamit isertuussamit allanut kalerriunneqarsimasumit.
- Isumaqarpunga naapertuilluannginnerulluinnartoq nunarsuarmi nunani tamalaani selskabersuit pisuunersaasa annersaasalu ilaat nunarsuarmi nunat piitsuunersaasa ilaanni akileraarutitigut peqquserluttuliornera, Christoffer Guldbrandsen TV Avisimut oqarpoq.
Guldbrandsen: ajortuinnaanngillat
Taannali isumaqarpoq nunat tamalaat ingerlatsivissuisa Afrikamiinnerat ajortuinnaanngitsoq.
- Isiginarneqassaaq nunat tamalaat selskabersui aningaasaliissutaallu Afrikami siuariartornermik pilersitsimmata. Suliffinnik pilersitsipput, saniatigullu iluaqutissanik arlalinnik sunniuteqarput. Samminiarsimavara malittarisassat malinneqanngittarnerat. Ileqqorissutsimik oqaluttuaanngilaq. Oqaluttuaq piviusuuvoq akileraarutinik peqquserluttoqarsimagunarneranik samminnittoq, Guldbrandsen TV Avisimut oqarpoq.
KNR1-iop ´Tyveriet af Afrika´ aallakaateqqissavaat unnugu ataasinngornemri nal. 20.00. Filmi piviusulerut aamma takoeqqissinnaavat uani.
Tyveriat af Afrika´ takuiuk? Isumaqarpit Kalaallit Nunaannut sanilliussisoqarsinnaasoq? Filmip piviusulersaarutip Nunatsinni aatsitassanik piiaanermik isiginninnerit allanngortissimavaa?