Aap, eqqumiigineqaaq...
»...Ingerlatsivimmut taamak angissusilimmut taamalu annertutigisunik unammilligassalimmut nammatassaanut annertunerusumik artukkiineruvoq ingerlatsivimmi siulersuisut katitigaanerisa taamak akulikitsigisumik allanngortinneqartarnera. Pissutsit tamakkua isornartuupput, avataanit isigalugu eqqumiiginassaqisoq.«
Taamatut oqarpoq Peter Grønvold Samuelsen, Royal Greenlandimi siulersuisut siulittaasuat, taassumalu sap. akunnerani uani Air Greenlandip pisortaanera Flemming Knudsen Royal Greenlandimi suliffeqarfissuarmi pisortatut nutaatut ilisaritippaa.
Peter Grønvold Samuelsenilu ilumoorluinnarpoq; pissutsit isornartoqarlutillu eqqumiiginaqaat, pisortat Royal Greenlandip piginnittuisa manna tikillugu akuersaarumasimannginnamikku ingerlatsiviup siulersuisui ilisimasaqarluinnartuusariaqartut, ingerlatsivillu eqqissisimatinneqarnissaminik pisariaqartitsisoq.
Eqqarsaatigissagaanni tamanna peqatigalugu piginnittut aalajangersimammassuk ingerlatsivik niuernerpalaartumik, aningaasarsiornermik tunngaveqartumik ingerlanneqassasoq, eqqumiiginaqaaq suliffeqarfissuaq piginnittunit toqqaannartumik toqqaannanngitsumilluunniit piumasaqaateqarfigineqartuarnera, piginnittut annertunerusumik annikinnerusumilluunniit ingerlatsiviup niuernikkut ingerlatsineranut sunniuteqartarlutik.
Isuma tamanna aamma Peter Grønvold Samuelsenip saqqummiuppaa, suliffeqarfissuup pisortartaava tamanut saqqummiunneqarmat.
»Siulersuisut isumaqarput Royal Greenlandip aningaasarsiornermik tunngaveqarluni ingerlanneqarnissaanik aallaaviusoq attatiinnarneqassasoq. Ingerlatsiviup aningaasarsiornikkut tunngavia nukittorsarneqassaaq, nutarterinermillu isumassarsiullaqqissuseq atorneqassaaq tunisassiarisat ineriartorteqqinnissaannut. Tamatumunnga sulinermi eqqissisimatinneqarnissarput pisariaqartipparput. Taamaattumik nuannaarutigalugu paasivarput naalakkersuisut selskabip kingullermik ataatsimeersuarnerani namminneq nalunaarutigimmassuk Royal Greenland sulinermini eqqissisimatinneqassasoq«, Peter Grønvold Samuelsen eqqortumik sakkortuumillu oqarpoq, siusinnerusukkut Royal Greenlandimi siulersuisuni siulittaasumit tusarneqarsimanngitsumik.
Suliffeqarfissuup pisortartaava pissutissaqarluarluni sakkukitsuliorneruvoq. Flemming Knudsen Sermitsiaq Inuussutinut oqarpoq tamatigut piginnittup ingerlatsinermi malittarisassat ilusilersortarai - ingerlasivik namminersortuugaluarpat pisortanilluunniit pigineqaraluarpat, tamannalumi aamma eqqorpoq.
Paatsuueqinasili. Flemming Knudsen politikerinik, ulluinnarni ingerlatsinermi akulerukkusuttartunik suleqateqarneq sungiusimavaa, aammalu sungiusimallugu ingerlatsivimmik pisortanit pigineqartumik aqutsineq. Sakkortuuliorani ingerlatsineq sungiusimavaa. Aammattaarli piginnittut aningaasarsiornissamik piumasaqaateqartut sullinnissaannik sungiussisimavoq.
Piumasaqaat tamanna atorfittaavani minnerulernavianngilaq, Flemming Knudsenillumi ukiuni aggersuni pingaarnertut suliassani ersarissumik oqaatigaa: Royal Greenlandip iluanaarnarnerulersinnissaa.
Iluanaarnissamik piumasaqaatip KNAPK-p SIK-llu siulersuisuisa suliffeqarfissuup pisortartaavata aqqa tusaannavillugu isumallualernerat qamissinnaavaa. Tassami kinaluunniit Royal Greenlandimi pisortaagaluarpalluunniit piumasaqaataalluinnarpoq nunani tamalaani imaaneersunik tuniniaavinni unammillersinnaassuseqarnissaq. Tamanna pinngitsoorani nunatsinni imaani nunamilu kinguneqaateqassaaq.
Taamaattumik pingaaruteqarpoq siulersuisuni qullersanilu malunnaatilimmik inunnik taasiisoqareernerata kingorna, Royal Greenlandip nammineq ingerlaqqilernissaminut pisariaqartumik eqqissisimatinnissaa. Eqqissisimatinneqassaaq ingerlatsiviup ineriartortinnissaanut aamma periusissamik sulinerup nangeqqinnissaanut, taanna qullersaasimasut aallartissimasaat, piginnittulli paasilluarsimanngisaannagaat soqutigivallaarsimanngisaannagaallu, tamannalu aamma eqqumiigineqaaq.
Iluatsitsilluarisi.