Aaqqissuisuuneq innersuussivoq: Allaffimmiutoqaq aalisakkerivimmiittoq

5.30: Pling, pliiing! Eqeersaat naakkittaaqaluni nipiliorpoq. Makittariaqarpunga. Aap, inortuinissara annilaanngatigalugu unnuap affaani eqqumasimavunga. Royal Greenlandimi isumaqassanngilaq aalajaatsuunngitsunga.

Allaffimmiutoqqap raajalerisutut sulinissaq sapissannginnerpaa?

Tamanna paasinarsissaaq, tassami Royal Greenlandip Nuummi aalisakkeriviani ullormi ataatsimi sulisartuunermik misiliisussaavunga.

Aalisakkeriviit sulisussaaleqinerat eqqartorneqartorujussuuvoq. Tamatuma peqatigisaanik tunitsiviit raajarpassuarnik, qaleralippassuarnik saarullippassuarnillu tulaassuiffigineqarput, tunisinermi akit pitsaammata.

Kisianni sulisussanik pissarsiniarneq sooq taama ajornakusoortigisoq? Tamanna paasiniarusutsappara.

Pissangavunga. Unnuap ingerlanerani saviit takisuut Egon Olsenilu Olsen Bandenikkunneersoq sikup iluaniittoq eqqumiitsumik sinnattorisimavakka.

Nuummi nillertumik pujorneranut nukittorsaatissattut kissalaartumik uffarpunga tiitorfimmullu angisuumut tiitorlunga. Piareerpunga. Mascaramik qarlugissaammillu tanissanerpunga? Soorunami! Maannami nunami maani pingaaruteqarluinnartut suliariartorlugit ammukartussanngorpunga. Inuussutigisavut.

Aalisakkeriviup tungaanut iluataatigisannik taxarpunga. Sulisartut bussertarput. Imaluunniit pisuinnartarlutik 6.30-miit 7.00-mut sullisinik atisalersornissaq angumeriniarlugu.

6.50: Holdlederip Asser Mathæussenip aalisakkeriviup isaariaani qungujulalluni parsiarpaanga.

Aalisakkeriviup pisortaa Ilannguaq Abrahamsen oqaluttuarpoq, sulisut 70-iusut.

- Kisianni nikerartorujussuupput. Sulisartut amerlanerpaartaat qaammatialuinnarni sulisarput, angut inuusuttoq qiimasoq, qungujulasoq oqaasertalersuillaqqissorlu, anersaarululluni oqarpoq.

Nuummi aalisakkeriviit pingasuupput. Royal Greenlandip saniatigut, Polar Raajat aamma Kitaa Seafood. Tamanna tunisassiassat akii eqqarsaatigalugit unammilleqatigiinnermik pilersitsisimavoq. Qalerallit kiilumut 30 koruuneqarput, saarulliit 9 koruunit.

Aalisartunut piffissaq pitsaasoq aalisakkerivimmi sulisartunut aamma atuunnerluni?

7.00: Asser Mathæussen atisalersortarfiup tungaanut ingerlanitsinni oqaluttuarpoq, sivisunerpaamik sulisimalluni.

Atuarunnaaramili aalisakkerivimmiilersimavoq. Ukiualunni allakkerivimmiinnermik taamaallaat akunnilerlugu. Asserip aalisakkat millionilikkuutaat, immaqami milliardilikkuutaat, ukiuni 31-ni isaasigut isigisarsimavai.

Tamanna akissarsiaata allagartaani takuneqarsinnaavoq. Aalisakkerivimmi sulisartumut akissarsiat minnerpaaffissaat akunnermut 97 koruuniuvoq. Qanoq sivisutigisumik sulisimaneq, qaangiuttoornerit sapaatip-akunnerisalu naanerini sulineq aallaavigalugit tapisiaqartoqartarpoq. Sulisartut agguaqatigiissillugu 100 koruuninik akunnermusiaqarput.

Asserilu angutaavoq nalinginnaanngitsumik eqiasuitsoq. Aalisakkerivimmi nalinginnaasumik suliffiup ullaakkut arfineq-marlunit ualikkut sisamanut iluaniinnaq sulisanngilaq. Unnukkut oqimaalutaavimmi aamma sulinissamut piareersimasarpoq. Qaangiuttoornerpassuaqartarpoq. Ulluni kingullerni 14-ini 53 tiiminik, 80 tiimit nalinnginnaasut saniatigut. Taamaalilluni ulluni 14-ini aningaasarsiai 21.300 koruunit missaanniipput. Tamanna nalinginnaanngilluinnarpoq. Sulisartut amerlanerpaartaat affai inorlugit aningaasarsisarput, oqaluttuarpoq.

Siorna ukiumut aningaasarsai 470.00 koruuniupput. Royal Greenlandimi rekordiliilluni, isumaqarpoq. Aalisakkerivimmi sulisartoq ukiumut aallartissutitut 250.000 koruunit missaannik aningaasarsisarpoq.

- Maani sulineq sakkortuvoq. Tarnikkut nukittuujusariaqarpoq, Asser oqarpoq.

7.15: Atisat oqorsaatit kedeldragtillu nulukkut atiniapiloorpakka. Angummut uppatikitsumut ilusilersugaasimagunarput. Iluatigut meqqulualinnik atisaqarpunga. Taamaattumik kiaguttorsuanngorpunga.

Saninni 56-inik ukiulik Albora Mathiasen aamma atisassaminik atisiniapiloorpoq. Arnatullu timimi angutit atisaannik atisitinnissaat aamma ajornartorsiutigalugu. Illarpugut. Albora oqaluttuarpoq, Qullissarmiuulluni qatanngutigiillu aqqaniliullutik. Eqqiaanermik nalinginnaasumik suliaqaraluarpoq, maannakkorpiarli feeriarluni saniatigullu aningaasarsiorusulluni. Aalisakkerivimmi sulineq imminut ajussannginnersoq takorusuppaa. Qatanngutaa Thora aalisakkerivimmi maani aamma sulivoq.

- Oqartarput aalisakkanik niaquiaaneq sakkortuujusoq angutillu kisimik suliassarigaat. Kisianni misilikkusuppara, oqarpoq. 19-inik ukiulik Najakkuluk qaqortumik tunuatigut Ronaldomik saavatigullu We fly Emiratesimik allannilimmik tujuuluaralik saniani issiavoq. Taassuma atisat oqortut qaqortut ajornartorsiutiginngivillugit ativai. Ullumi aalisakkanik panertunik suliaqasssaaq. Aalisakkerivimmi taamatut ukiulinni kisiartaalluni oqarpoq. Ukioqataanik inuusuttorpassuaqaraluarpoq suliffeqaratillu ilinniagaqanngitsunik.

7.30: Tungujortunik angisuunik saaliaquserpugut, gumminik takisuunik aaqqaserluta nutsanullu qassutaasanik tungujortunik atisilluta. Asser erininarsinngitsoq niaquiaavimmi piareerpoq. Aalisakkanik niaquiaat marlunnik ipittorujussuarnik savittalik. Asserip saarullik saviit taakku marluk tungaanut ajaamisarpaa, saarullillu sukkasumik niaquerneqartarluni. Av! Ulorianarpaseqaaq. Albora misiliilerpoq. Imali uisakajaartigilerpoq saarullik niaquerneqanngitsiartoq sapangillugu.

Taarsiullugu saarullinnik ingerlaartumut qalluisussanngortinneqarpoq, tassani oqimaalutarneqariarlutik karsinut assigiinngitsunut oqimaassutsit apeqqutaatillugit isumamineersumik ajanneqartarput.

Oqiliallaatigeqisannik niaquiaassanngilanga. Taarsiulluguli immikkoortiterivimmut ingerlaartumut saarullinnik qalluisussanngortinneqarpunga.

Saarullinnik paperui siullinngorlugit ilioraaqqissaarniarsaraanga malinnaaniapiloorlungalu. Asserili sukkanerpaavoq. Aalisakkat qaleriiaatiinnavipput. Truckit saarullinnik eqqussuiuarput. Saarullippassuarnik sikulersukkanik. Aalisagarsunnialaarpoq.

Allaffimmiutoqaq malinnaaniapiloorpoq.

9.10: Kaffisornissamut unillatsiarnermit annaanneqarpunga. Ullaakkorsiortoqalerpoq. Iffiugarpassuit, immussuit skålillu paarnanik imaqarluartut. Kaallunga iffiaq-qaqortoq nutellamik issusuumik tanippara. Iipilitorpunga imermillu imerluarlunga. Aalisakkanik taama amerlatigisunik ingerlaartumut qalluineq aalisakkerivimmilu imeq kuuppaluttoq tusaajuarlugu imerusunnartorujussuuvoq.

Sutortarfik angerlarsimaffippalaartumik nuannisarfiuvoq. Iggavimmiut iggavimmi suliluttarfimmisut suut tamarmik qeqqanni ulappupput. Sutortarfiup isuata iigaa kuummik, tuttunik umimmannillu qalipakkamik angisuumik pinnersarneqarsimavoq. Tamaani ingiinnarluni pinngortitaq takorloorneqarsinnaavoq.

Silatitsinni siallerpoq. Iikkani Royal Greenland pillugu paasissutissat tamalaarpassuit atuarneqarsinnaapput. Tunitsiviit aalisakkeriviillu 43-t, taakkunanngalu 37-t Kalaallit Nunaanniittut, pillugit. Suliffeqarfiup anguniagai qaffasissut pillugit – puigorsimassagaluaraanni.

Ukiup Sulisutsialaasa assingi sisamat aamma nivingapput. Taakkua ilagaat Asser Mathæussen, 2011-mi. Ukiunili kingullerni marlussunni toqqaasoqarsimanngilaq. Royal Greenlandip sulisunik taamatut kajumissaasiisarneq qimassimagunarpaa.

9.30: Tunisassiorfimmut uteqqippugut. Maanna Konrad Gunvaldilu boksit amitsut saarullinnik immerneqarneranni suleqatigissavakka. Aalisakkat blokkinut qerititerneqassapput. Tamatuma kingorna Danmarkimut ingerlaqqillutillu Kinamut nassiunneqassapput saaniiariartorlugit. Boksit saarullinnik pitsaanerpaanik immerpavut sukkasoorujussuarmik. Aalisakkat kusanartut nunarsuup illuatungaanut nassiussuunneqartussat takullugit anniaatigaara. Kalaallit Nunaanni saaneeraajarneqartariaqaraluarput. Kinamili tamanna akikinneerarsuarmik suliarineqarsinnaavoq. Tamatuma saniatigut Kalaallit Nunaanni aalisakkerivinni sulisussat amigaatigineqarput.

Saarullinnik boksinut ilioraanitsinni Konrad oqaluttuarpoq, kilisaammi sapaatip-akunnerini marlunni 50.000 koruuninik aningaasarsisimalluni. Akileraarutit peereerlugit!

- Kisianni taava meerartaarpunga nunamiutanngorlungalu, oqaluttuarpoq, ilumikkersimaarpaluttumik nipeqarluni.

Gunvaldilu maajimi apriilimilu aatsaat sulilersimappput. Taamaattumik sivikitsuinnarmik sulisimapput. Avataasiornermut sanilliullugu aningaasarsiat assigiinngissutaat malunnartorujussuuvoq.

Angutit taakkua marluk suliaminnut sukkasoorujussuupput. Inussakka nillertuinnaapput. Karsit saarullinnik imallit qaleriiaatiinnavissut sikuiartuartariaqarpavut. Saarulliit immaqa 300-t anguakka, uffa Konrad Gunvaldilu minnerpaamik quleriaammik sukkanerusumik sulisut. Tamatuma peqatigisaanik aalisakkat karsii 55 kiilut missaannik oqimaassusillit paarlagiiaallutik kivittarpaat.

10.30: Kaffepause. Gummivut imermik salippavut. Atisavullu tamaasa piiaqqittariaqarlugit. Perusuersartarfimmut tulleriiaattoqarpoq. Angumeriniassagiga! Ullormi ataasiinnarmi maaniittussaagama sulisut allat assigalugit unillatsiarnermi aninermi isernermilu naqittakkamik naqitsisussaanngilanga. Tassami kaffisornissamut nerinissamullu unillatsiarnerit nammineerluni akilerneqartartussaapput. Allat assigalugit perusuersartarfimmi ernumasariaqanngilanga.

11.00: Angutit truckertut aalisakkeriviup initaanut iseqattaarlutillu anisaqattaarput. Kutteri aalisakkanik 18 tonsinik usingiarpaat. Tamatuma saniatigut umiatsiaaqqat tunisiartorlutik tikittarput. Saarullinniinerusoq. Sulisartut imminnut uumisaalaartarput illartarlutillu. ”Tuavi!” suaarpallattoqartarpoq.

Konrad, Asser aamma Gunvald aalisakkanik qerititsivimmit annissuipput. Saarullerujussuit 7-8 kiilut, suluppaakkat qalerallillu nunatta iluani niuerfimmukartussat. Aalisakkat qerisut ilioraavimmi puugutaasarsuarniipput. Kaattat nukitillu atorlugit puugutaasarsuit kaanngartittarpaat aalisakkallu plastikkimik puussiarsuarnik poortorneqarfissaannut iliorarlugit. Kingorna saattukujuunngorlugit aggorneqassapput.

Allaffimmiutoqaq suliassamut tamatumunnga nukilaappallaarpoq. Taamaattumi inimi nillertorujussuarmi nikorfaannarneruvunga qiiasorujussuanngorlungalu.

12.00: Ulloqeqqanut unillatsiarneq. Atisat peeqqillugit – pyha! Sutortarfimmi nerisassarpassuaqarpoq nammineq tigooragassanik, qallersuutit, iffiukkat, paarnat, manniit, salatit nerisassarlu kissalaartoq naatsiiaanik, kukkukuuaqqamik naatitanillu tomatsovimiittunik akuugaq.

- Sapaatip-akunneranut marlorluta aalisagartortarpugut. Ajuusaarnaraluartumik… sulisup qungujorussarluni oqarnerattut. Aalisakkerivimmi aalisakkanik naammattorsuarnik takusarsimagunarpoq.

Ulloqeqqasiornermi aingaasarsiat appasippallaartut eqqartorpavut. Tamanna nalinginnaasumik isumaqatigineqarpoq. Asserip aningaasarsiai allaanerupput. Aalisartuuneq aningaasarsinarnerujussuusoq, arlallit oqaatigaat. Sooq aningaasarsiavut aalisartullu aningaasarsiaat taama nikingatigissappat, nerrivimmi oqartoqarpallattarpoq.

-Kisianni inuusuttut taama amerlatigisut suliumannginnera paasisinnaanngilara, Albora oqarpoq. Aalisakkerivimmut suliffissarsiorsinnaapput, atorfissaqartinneqarpummi.

Ole 67-inik ukiulik qaammatit marlussuit matuma siorna sulilersimavoq. Utoqqalinersiutini inuussutigisinnaanngilai. Ineqarneq akilereeraangamiuk taamaallaat 1000 koruunit sinneruttarpai.

-Sukkortuuvunga. Isumaqarpungali sulilernerma kingorna timikkut ajunnginnerulersimallunga, Ole oqarpoq, ilassuteqarlunilu, aalisakkerivinniinnaanngitsoq Kalaallit Nunaannili tamarmi inuit amerlanerusut pisariaqartinneqartut.

-Ikippallaaqaagut. Nunarsuarmit tamarmit inuit amerlanerujussuit nunatsinnukartariaqarput.

12.30: Aalisakkerivimmut uteratta qeeqqanik saliilerpugut. Ilaat puiseeqqatut angitigipput. Avaleraajarpavut.

- Nigguiarluassavasi. Erluata peernissaa eqqaamallugu, Asser oqarpoq.

- Maani erluttortanngilagut, Ole tapersiivoq. Aalisakkami nunatsinni nioqqutigineqartussaapput.

Piffissaq kingullerpaaq atorlugu salinneqarput. Aalisakkerivik ilaatigooriarluni aalisakkanik eqqaaginnartariaqartarsimavoq sulisussaaleqineq pissutigalugu. Nipisat suappassui suliarinnittussaqanngimmat igiinnarneqartariaqarsimapput.

Aalisagarujussuuit karini angisuuni salillugillu errortorpavut. Karsit nutaat eqqunneqarput. Kiisami naammassivoq.

- Qeeraq kingulleq, Ole oqarpoq, qeerarujussuarlu imermit qaqillugu.

- Atuakkiassamut qulequtassatsialaagaluarpoq, ilassuteqarluni oqarpoq.

13.30: Albora qaleralinnik ingerlaartumut qalluisoq ikiorpara. Taakkua angissutsinut assigiinngitsunut immikkoortiterneqassapput. Sarajattuinnaapput ilaallu ima angitigalutik aalisakkat karsiinit nigguinnaasunit kivissinnaanngingajallugit.

15.00: Soraarnissamut akunneq ataasiinnanngorpoq. Qasusorujussuuvunga. Isigaalerpunga. Tallikka tuikkalu annernartuinnaapput. Allat naammassisaat angoqqajarsimanngilakkaluunniit.

Gummikka saaliaqutigalu serpartarlugit tattaajarpakka. Maanna arnat qaqortunik atisallit iserfigissavakka.

Immikkoortortaqarfimmi nuimanerulaartumi 64-inik ukiulik Lucia Geisler suleqatigiinnguanut, arnaanerusunut qaqortunik atisalinnut qanermikkullu tungujortumik qaamasumik assiaqutilinnut aqutsisuuvoq. Taakkua raajanik nunatsinni tunineqartussanik uuttortaallutillu poortuipput. Qullukkat panertullu isumagisarpaat. Tassani aamma suluppaakkat uullianngorlugit aggorneqartarput.

Radiukkut arsaattut aallakaatinneqarput inimilu malinnaaqqissaarluni eqqissisimaneqarpoq.

- Amerlanerit qaammatini marlussuinnarni maaniissimapput, Lucia Geisler oqaluttuarpoq. Ajoraluartumik inuit akissarsigaangamik takkuteqqinngitsoortarput. Taava nutaanik ilinniartitsisariaqalersarpugut.

15.45: Ullormi suliffigisanni minutsit 15-it suli sinnerukkaluarput. Uniinnarpungali sialummullu anillunga. Qasulluinnarsimallunga.