Aaqqissuisuuneq innersuussivoq: Ingerlatseqatigiiffik nutaaq Ivittuunut pivoq
Australiamiut ingerlatseqatigiiffiata Eclipse Metalsip Ivittuuni misissueqqaarnermut akuersissut tiguaa. Ingerlatseqatigiiffik aatsitassanik qaqutigoortunik, kuartsinik aamma kryolit-flouridinik kiisalu saviminernik-zinkinik ujaasiniarpoq, siulersuisunut siulittaasoq, Nuummi Future Greenlandimiut ataatsimeersuarnermut tikittussaq taama oqarpoq.
17.-18. maj Sulisitsisut ataatsimeersuarneq Future Greenland aaqqissuutissavaa. Nunanit allanit aatsitassarsiortitseqatigiiffiit arlallit tikinnissartik nalunaarutigereerpaat, Australiamiut Eclipse Metals Ltd. ilanngullugu, taassuma Australiamiut ingerlatseqatigiiffiannit allamit Rimbal Pty-mit siorna maajimi Arsuup eqqaani Ivittuuni suliniummut akuersissut pissarsiaraa.
Ecplise Metals Perthimi qullersaqarfeqartoq, Australiami aatsitassarsiornermik suliniutinik arlalinnik ingerlasunik suliaqarpoq, naalagaaffimmi North West Territorymi kanngussannik suliniut aamma uranimut suliniutit marluk kiisalu Queenslandimi manganimik suliniut.
Bolette Maqe Nielsen, Tanbreezimi siulersuisuni siulittaasoq, Eclipse Metals Kalaallit Nunaanni sinniisuuffigaa, ingerlatseqatigiiffimmullu siunnersortaalluni, kisianni suliniutip killiffia ingerlariaqqinnissaalu pillugit apeqqummut siulersuisuni siulitaasumut Carl Popalimut innersuussivoq.
Kryolit aamma aatsitassat qaqutigoortut
Ivittuut kryoliteqarluarnerminit ilisimaneqarpoq. Piffissami 1954-1987-imut kryolitit 3,5 millionit tonsit Danmarkimut USA-mullu assartorneqarput, tassani aluminiuliornermut aamma saviminernik nioqqutissanut qalliutissatut opalinillu igalaaminiliornermut atorneqarput. Tamatuma saniatigut sullinernut akiuiniutitut cryociditut atorneqarsimavoq. Piiaaffik ullumikkut imaarneqarsimallunilu matuneqarsimavoq.
Aatsitassanik qaqutigoortunik, kuartsinik, flouridimik aamma jern-zinkinik ujaasinissamut ilippanaateqartoq, Eclipse Metals naliliivoq. Ivittuuni suliniutip ineriartortinnissaanut Naalakkersuisut suleqatiginissaanut Carl Popal qilanaarluni, aningaasanik niuerfinnut nalunaarummi oqarpoq, taassumalu taanna uranimik akulinnik aatsitassaqannginnerarpaa, Kalaallit Nunaanni illoqarfinnut nutaqarfinnulluunniit qanittuunnginnerarlugu, taamaattumillu aatsitassanut inatsimmut aalajangersakkanik naammassinnissinnaanerarlugu.
- Kalaallit Nunaata immikkoortuani tassani suliniutip periarfissaqassusaata misissornissaa aamma Namminersorlutik Oqartussat piiaaffimmik nutaamik ataatsimik arlalinnilluunniit ineriartortitsinermik suleqatiginissaat qilanaaraarput, Carl Popal oqarpoq, taanna Future Greenlandip Nuummi 17.-18. maajimi ataatsimeersuarneranut peqataassaaq.
Eclipse Metals Australiami 8.000 km2-inut agguataarneqartuni 19-inik misissuinissamut akuersissutaateqarpoq. Kalaallit Nunaanni suliniut ingerlatseqatigiiffiup nunani tamalaani akuersissutaani siulliuvoq.
Aviisimi Sermitsiami allaaserisanik allanik aamma atuarsinnaavutit. Aviisi uani pissarsiariuk: