Aarlerisaarisoq: Royal Greenlandimut piumasaqaatit sukannernerulerpata fabrikkinik matusinernik kinguneqassaaq

Aalisarnermut inatsisissatut siunnersuut Inatsisartuni siullermeerneqarmat Royal Greenlandip Namminersorlutik Oqartussanit pigineqartup immikkut inissisimaffeqalernissaa arlalinnit akerlilerneqarpoq, ingerlatseqatigiiffik namminersortutut pisassiissutinik piginneqataanermut tunngatillugu killilersuiffigineqanngimmat.

Ingerlatseqatigiiffik piumasaqaatinut nutaanut suliffeqarfinnut namminersortut atuligassaannut naleqqussarneqassappat, suliffeqarnermut tunitsiveqarnermullu ilungersunartunik kinguneqassasoq, Royal Greenlandip oqallinnermi maanna aarlerisaarutigaa.

Pisortap Susanne Arfelt Rajamandip tunitsiviit 37-usunit 30-t matuneqarsinnaasut nalilerpaa, aamma saarullinnik sinerissap qanittuaniittunik kiisalu nipisat suaannik tunisineq unitsinneqartariaqalissasut.

Royal Greenland suliffeqarfiit namminersortut qummut killilikkamik pisassinneqartalernissaat assigalugu pisassinneqartalissappata, pisortap oqarnera naapertorlugu Royal Greenland ukiumut 200 million koruunit missaanniittunik akileraarutinik annaasaqassagaluarpoq – isertitassat ullumikkut ingerlatseqatigiiffiup aalisarfinni iluanaarutikinnerusuni aalisarnermut atortagai. Taamaammat taamatut pisoqassappat annertuumik sipaaruteqarnissamik pisariaqartitsisoqalissaaq.

Suliffiit 230-t toqqaannartumik sunnerneqarsinnaasut

- Suliffiit 230-t atorunnaarsinneqarnerannik kinguneqassaaq. Taakkuupput fabrikkini sulisut, kisianni toqqaannanngitsumik sunniutaa annertunerujussuussaaq, tassami fabrikkini ikiortitut sulisut amerlasoorpassuupput, Susanne Arfelt Rajamand oqarpoq, nangillunilu:

- Tamanna ullumikkut Royal Greenlandimik ingerlatsinitsinnut sunniuteqartorujussuussaaq.

Fabrikkini suliffiit saniatigut tunitsivippassuit matunerisigut aamma aalisartunut sumiiffiit ilaanni ungasissumut tunisiartortalernissaannik kinguneqarsinnaavoq.

- Najukkami inuiaqatigiinnik pilersitseqataasut

Apeqqut: Allannguinerit tunitsivinnut sooq sunniuteqassappat?

- Ullumikkut tunitsivivut qiviaraanni tamarmik akilersinnaasumik atuuffeqanngillat imaluunniit akilersinnaasumik ingerlanneqanngillat, Susanne Arfelt Rajamand oqarpoq, nangillunilu:

- KNI aamma taamaappoq. Nunaqarfinniinnissamut aamma inuiaqatigiinnit pilersitseqataanissamut tunngavoq, aammalu aningaasaqarnissaanik qulakkeerinninnissaq, taamaalilluni aalisartut nioqqutissanik pisisinnaaniassammata, aamma atuarfeqarsinnaaniassammat allanillu peqarsinnaaniassammat.

Susanne Arfelt Rajamandip erseqqissarpaa demokratii politikkikkullu ingerlaneq tatigingaarlugit, kisianni aalisarnermut inatsisissatut siunnersuutip allanngortinneqarnissaa Royal Greenlandimut qanoq kinguneqarsinnaanersoq nalilersortariaqarlugu isumaqarpoq.

Pisisartunut akisussaasut

Royal Greenland inuiaqatigiinnut akisussaaffini annertuumik isumagisimagaa taanna isumaqarpoq – assersuutigalugu Covidip nunarsuarmi tuniluunnerata nalaani pisisarnini allatigullu suliaqarnini ingerlatiinnarlugit aalajangeramik.

Suliffeqarfiup immikkut inissisimalernissaa Royal Greenlandip iluanaarutigissanngilaa – suli atuisartut aalajangiisuussapput, pisortaq oqarpoq:

- Nunarsuarmi pisisartuvut, nioqqutissaatitta 98 procentiinik tunisisarfivut aalajangiissapput. Taamaalilluta naggataatigut pisisartutsinnit nassuiarneqassaagut, taakkulu eqiasulinnginnissarput isumagissaqqaaraat qularinngilara.