nunatsinnit
Aasiaat pigisaani qilalugarniarneq ammaanneqarpoq
Illoqarfimmi alisartut piniartullu peqatigiiffiata, kommunip Aasiannilu piniarnermik nakkutilliisup ataatsimiinnerisa kingorna Aalisarnermut, Piniarnermut Nunalerinermullu Naalakkersuisoqarfik Qeqertarsuup Tunuani ingerlatsivinnit tamanit pisanut paasissutissanik eqqortunik pissarsivoq
Ingerlatsivinni sisamaasuni pisassat sinnerneqarsimanerat pissutigalugu ingerlaannavik matusiffigineqartuni, ingerlatsivimmi kingullermi qernertanik qilalugarniarneq maanna ammaanneqaqqippoq.
Tamanna tusagassiorfinnut nalunaarutikkut nalunaarutigineqarpoq. Pineqarpoq ingerlatsivik Aasiaat. Tassani Qeqertarsuup Tunuani ataatsimut pisanit nalunaarutigineqarsimanngitsut naalakkersuisoqarfiup pisassanit ilanngaatigai. Pisassat 2013-imi pisassat sinnerinit ilanngaatigineqarput - pisassat kommunimut tunniunneqannginneranni.
– Taamaattumik qernertanik qilalugarniarneq ingerlatsivimmi pineqartumi ingerlaannavik ammarneqarpoq, oqartussaasut nalunaarput.
Qeqertarsuup Tunuani qernertanik qilalugarniarneq matuneqarpoq nalornissutigineqarsimammat pisat ingerlatsivimmut sorlermut nalunaarsorneqassanersut. Tamatuma kingorna inuussutissarsiutigalugu piniartut sunngiffimmilu piniartut assortuussutigisimavaat kiap pisat nalunaarutigissanerai. Nalornissuteqarnerit tamakku Aasianni ammaaqqinnissamut ajornartorsiortitsisimapput.
Naalakkersuisoqarfiup ingerlatsivinnut tamanut kajumissaarutigaa ajornartorsiut ukioq pisassiiffissaq tulleq nallertinnagu aaqqiiffigeqqullugu, piniartullu aaqqiissutissamik saqqummiussaqaqqullugit, oqaatigalugulu ingerlatsivinni tamani piniarnermut nakkutilliisoqartoq.