Aasianni Sømandshjemmet 50-liisoq

Aasianni Sømandshjemmet Kalaallit Nunaanni sømandshjemmit pingajuattut 1974-imi ammarneqarpoq, ukioq mannalu sømandshjemmi ukiunik 50-inngortorsiorpoq. Kaffillernermik naalagiarnermillu tamanut nalliuttorsiutigineqassaaq.

Aasianni Sømandshjemmi juulip arfernani ukiunik 50-inngortorsiorluni nalliuttorsiorpat illoqarfimmi innuttaasunut kaffillertoqassaaq.

Sømandshjemmit, maanna Hotel SØMAmik taajorneqartut Kalaallit Nunaanni unnuisarfinni suliffeqarfinni pisoqaanersaapput.

Aasianni Sømandshjemmi ukiut 50-it matuma siorna sømandshjemmit pingajuattut ammarneqarpoq. Nuummi Sisimiunilu sømandshjemmit 1969-imi ammarneqarput.

Indenlandsk Sømandsmission tusagassiuutinut allappoq 1973-imiilli Kunngip Kalaallit Nunaanni Niuerfiata aallartitaa siulleq Sømandsmissionen Kalaallit Nunaanni Aasianni Qaqortumilu tikeraanut angerlarsimaffinnik marlunnik tigusinissamut soqutiginninnersoq paaserusullugu saaffiginnissimasoq.

Akuersineq

KGH, Kalaallit Nunaanni ministeriaqarfik Sømandsmissionilu ataatsimeeqatigiinnissamut isumaqatigiipput. Kalaallit Nunaanni Siunnersuisoqatigiit, naalagaatitaq, Kalaallit Nunaanni palasit kommunalbestyrelsillu Sømandsmissionip neqeroorummik akuersinissaanut kimigiiserfigaat.

Sømandsmissionip siulersuisuunerisa 1973-imi aggustimi ataatsimiinneranni suliassap tigunissaa aalajangerneqarpoq. Aasianni 1974-imi juunip 15-ianni  pulaartut angerlarsimaffiat tiguaat. Kingorna Qaqortumi aamma ammaapput, ullumikkulli matunikuulluni. 

Kaffisortitsineq

50-liilluni nalliuttorsiorneq biskoppi Paneeraq Siegstad Munk naalagiartitsisoralugu nalliuttorsiorpalaartumik naalagiartitsisoqassaaq. Kingorna Sømandshjemmimi Aasianni kaffisortitsisoqassaaq. Sømandsmissionimi siulersuisuunerit aqutsisullu aamma nalliuttorsiornermi aamma peqataassapput.

Powered by Labrador CMS