Aatsitassarsiorniarnermi suliatoqaq matuneqartoq
Seqimi Maniitsup eqqaaniittumi aatsitassarsiorfissaq matuneqarpoq, sumiiffimmilu pineqartumi piiaanissamut akuersissummik qinnuteqaqqittoqarsinnaavoq. Namminersorlutik Oqartussanit upperineqarlunilu neriuutigineqarpoq, olivineqartoqarneranik soqutiginnittoqarluarumaartoq.
Sverigemi suliffeqarfiup Seqi Maniitsup eqqaaniittoq 2005-imiit 2009-mut ingerlassimavaa. Ingerlatseqatigiiffik olivinimik piiaasimavoq, ukiualuilli ingerlatsereerluni aningaasaqarnikkut ajornartorsiulerami ingerlatsinini unitsissimallugu.
Naalakkersuisut aatsitassarsiorfiup matuneqarnissaa 2013-imi akuersissutigaat. Matusinissamik pilersaarut naammassineqarsimavoq, ataasiinnarli naammassineqarsinnaasimanngilaq - tassalu talittarfik aatsitassarsiutileqatigiiffiup sanasimasaa.
- Aatsitassarsiutileqatigiiffiup talittarfiliani qimassimavaa, akuersissut malillugu talittarfik allamut tunniunneqartussaasimagaluarpoq, Aatsitassanut Inatsisinillu Atuutsitsinerut Naalakkersuisoqarfimmi pisortaq Jørgen T. Hammaken-Holm oqaluttuarpoq.
Namminersorlutik Oqartussat talittarfimmik tigusisut
Aatsitassarsiutileqatigiiffiup talittarfik ukiuni arlaqartuni allamut tunniussinnaasimanngilaa, maannali aaqqiissutissarsisoqarsimavoq, taamaalilluni suliaq naammassineqarsinnaanngorpoq akuersissullu qinnutigineqaqqissinnaanngorluni:
- Namminersorlutik Oqartussat talitarfimmik tigusisimapput suliarlu matusinnaanngorparput. Tamatuma malitsigisaanik akuersissut qinnutigineqaqqissinnaanngorpoq, Jørgen T. Hammeken-Holm oqarpoq. Aatsitassanut Aqutsisoqarfimmit aamma nalilerneqarpoq, Namminersorlutik Oqartussat talittarfimmik ingerlatsilernerisigut siunissami qinnuteqarissamut soqutiginninnerusoqalissasoq Kalaallit Nunaannit soqutigineqartuusoq.
Naalakkersuisoqarfimmi pisortap akuersissummik qinnuteqarnissamut soqutiginnittoqarnissaa neriuutiginerarpaa. Taassuma erseqqissaassutigaa, oqartussat nalilersimagaat, ukiuni 100-ni tunisassiarineqarsinnaasunik Seqimi olivineqartoq.
- Ukiuni 100-ni tunisassiarineqarsinnaasoq
Ukiut tallimat ingerlanerisa missaanniinnaq olivinimik piaasoqarsimavoq, taamaammat annertoorujussuarmik isumalluuteqarpoq atorluarneqarsinnaasumik:
- Aatsitassaq pineqartoq ineriartortinneqartuaannarpoq. Tassa inoqarpoq misiliisartunik, allallu immaqa aningaasaateqarnerusut allanilluunniit attaveqartartut takkussinnaasarput. Aamma ineriartortitsisoqarsimasinnaavoq aatsitassaq allarluinnarmut atorneqarsinnaasunngorlugu. Aatsitassat qaqutigoortut piffissami matumani immikkut illuinartumik ineriartortinneqartarput. Aatsitassarsiorfik 2010-p missaani matuneqarpoq, ukiullu qulit ingerlanerinnaanni arlaatigut pisoqarsinnaasaqaaq, Jørgen T. Hammeken-Holm oqarpoq.
Aatsitassanut Aqutsisoqarfimmit nalilerneqarpoq, Kalaallit Nunaata soqutigisarigaa, talittarfiup Namminersorlutik Oqartussanit ingerlateqqinneqarnissaa, tassa aatsitassarsiorfik qinnuteqarumaartussanit soqutigineqarnerulersinniarlugu: