Aatsitassarsiortitseqatigiiffik: Siullermik piiaanissamut akuersissummik pissarsinissaq anguniagaraarput
Energy Transition Mineralsip siullermik Kuannersuarni aatsitassarsiornermik suliniutip nanginnissaa kissaatigalugu, ingerlatseqatigiiffik tusagassiuutinut nalunaarummi allappoq. Milliardinik taarsiiffigineqarnissamik piumasaqaat kingullertut toqqagassaavoq, sulilu pisussatut saqqummiunneqanngilaq.
Uranisiunnginnissamik atuutilersitsinerup kingunerisaanik ingerlatseqatigiiffiup Kuannersuarni suliniutaanut piiaanissamut akuersissummik pisinnaanermik unitsitsinerup kingorna, Kalaallit Nunaat Danmarkilu Energy Transition Mineralsimit (siornatigut Greenland Minerals) 15 mia. kr.-nik taarsiiffigineqarnissamik piumasaqarfigineqaratarsinnaasut, danskit tusagassiorfiat Politiken sapaatip akunnerata siuliani oqaluttuarpoq.
Eqqartuussissuserisoqarfik Poul Schmith naapertorlugu aatsitassarsiortitseqatigiiffiup suliniutip nalinga, taamaalillunilu ingerlatseqatigiiffiup suliniut Naalakkersuisut aalajangeriigaattut nangissinnaanngippagu, taarsiiffigineqarnissamik piumasaqaataasinnaasoq 15 mia. kr.-t missaannut naatsorsorsimavaa.
Piffissami matuami taarsiiffigineqarnissamik piumasaqaammik suli saqqummiussisoqarsimanngitsoq, Energy Transition Minerals tusagassiuutinut nalunaarummi allappoq, ingerlatseqatigiiffiullu siullermik aatsitassarsiornermik suliniutip assortuussutaasup nanginnissaa kissaatigigaa:
Tusagassiorfitsigut eqqartorneqarneq pakatsissutigigaat
- Kuannersuarnut piiaanissamik akuersissummik pissarsinissamut pisinnaatitaaffeqarnitsinnik akuerineqarnissaq anguniarparput. Kalaallit aningaasaqarnerannut isumannaatsumik atajuarsinnaasumillu iluaqutissanik tunniussaqarniarluta suliaqarnitsinni, maanna tusagassiorfitsigut Kalaallit Nunaata aningaasatigut annaasaqarsinnaaneranik saqqummiussineq pakatsinarpoq.
- Ingerlatseqatigiiffik allanik periarfissaarulluni taarsiiffigineqarnissamik piumasaqartariaqalissappat uggornassaaq, Said Daniel Mamadou, Energy Transition Mineralsimi pisortaq oqarpoq.
Ingerlatseqatigiiffik maannakkorpiaq Namminersorlutik Oqartussanut danskit naalakkersuisuinullu isumaqatigiissitsiniarnermik suliamik ingerlataqarpoq. Suliamilu piumasaqaatit 19. juli tunniunneqareertussat piareersarneqartut, ingerlatseqatigiiffik nassuiaavoq.
Aningaasaliinernut annaasaqaataasunut aamma isertitarisinnaasaraluanut taarsiiffigineqarusuttoq
- Piffissami matumani aalajangersimasumik aningaasanik piumasaqaateqaammik suliaqarsimanngilaq, ingerlatseqatigiiffik allappoq.
Ingerlatseqatigiiffik nangitsinissamut itigartinneqaruni, taava ingerlatseqatigiiffiup aatsitassarsiornermik suliniummut maannamut aningaasaliissutigisimasai kiisalu iluanaarutissanut naatsorsuutigisai tunngaviusumik taarsiiffigineqarnissamut piumasaqaammi tunngaveqassasut, Energy Transition Minerals, Sermitsiaq.AG-mut siornatigut nassuiaanikuuvoq.
Aatsitassanut Naalakkersuisoqarfimmi pisortaq Jørgen Hammeken-Holm, taarsiiffigineqarnissamut piumasaqaataasinnaasoq ernumassutiginagu, Politikenimut oqarpoq:
- Ingerlatseqatigiiffiit taamaattut naalagaaffinnut eqqartuussivitsigut suliassanngortitsisarnerat aamma taarsiiffigineqarnissamik piumasaqaateqartarnerat nalinginnaasuuvoq.
- Aningaasat amerlanerutillugit illuatungiusoq ernumanerutinniarneqartarpoq, taanna Politikenimut taama oqarpoq.