Aatsitassat: Kalaallit Nunaanni aatsitassarsiornermik suliniutit marluk pingaarnerpaat qulit akornanniittut
Tanbreezip Killavaat Alannguanni saffiugassanut qaqutigoortunut suliniutaa aamma Energy Transition Mineralsip Kuannersuarni suliniutaa nunarsuarmi saffiugassanut qaqutigoortunut suliniutit annerpaartaannut allattorsimaffimmi pingaarnerpaat qulit akornanniipput.
Kalaallit Nunaanni aatsitassarsiornermik suliniutit marluk annertussutsini uuttorlugu (total rare earth oxides) nunarsuarmi saffiugassanut qaqutigoortunut suliniutit annerpaat allattorsimaffianni pingaarnerit qulit akornanniipput. Pineqartut tassaapput Tanbreezip Killavaat Alannguanni saffiugassanut qaqutigoortunut suliniutaa aamma Energy Transition Mineralsip Kuannersuarni suliniutaa. Allattorsimaffimmik suliarinnittoq tassaavoq Canadami ilisimatusarnermut suliffeqarfik Mining Intelligence.
USA-p Europallu Kinap saffiugassanik qaqutigoortunik tunisassiornerannik qanoq isumalluuteqartiginerat covid-19-imit ersarissisinneqarsimavoq. USA-mi aatsitassarsiorfiit saffiugassanik qaqutigoortunik imaqartut ingerlanneqartut kisiartaat tassaavoq Mountain Pass, Kinamiut ingerlatseqatigiiffiannit ilaannakuusumik pigineqartoq, atortussiassanillu suliaqarnerup Kinami aamma ingerlanneqarfigisartagaa.
Kisianni sumiiffinni allani aamma annertuunik periarfissaqarpoq. Ilaatigut Canadami Kalaallit Nunaannilu, nunarsuarmi annerpaat ilaannik peqarfeqartuni.
Siullerpaatut ersarissumik inissisimaffeqartoq
Tanbreezip Kujataani Killavaat Alannguanni suliniutaa siullerpaatut ersarissumik inissisimaffeqarpoq tassani isumalluut missingiineq malillugu 28,2 millioner tonsinik annertussuseqarluni. Mining Intelligens naapertorlugu, Kalaallit Nunaat oqaatigineqarpoq, saffiugassanik qaqutigoortunik ineriartortinneqanngitsunik nunarsuarmi annerpaamik peqarfeqartutut.
– Killavaat Alannguanni peqarfiup qanoq annertutiginera inuppassuarnit ilisimaneqanngilaq. Aamma maluginiarneqassaaq aatsitassaqarfiusinnaasup 10 procentiinnaata missinga nalilersorsimagatsigu, taamaattumik isumalluut missingerneqartoq suli annertunerujussuusinnaavoq, Tanbreezimik piginnittoq pilersitsisorlu, ujarassiooq Greg Barnes, oqarpoq.
Allaaserisaq tamaat Sermitsiami sapaatip akunnerani matumani saqqummertumi atuaruk:
