Aatsitassat: Kalaallit Nunaat soqutigineqaqqilersoq
PDAC pillugu Torontomi ataatsimeersuarnermut kalaallit peqataasut isumallualaalersimarpasipput. Donald Trumpip Kalaallit Nunaannik soqutiginninnera matunik ammaasimavoq. Aatsitassarsiorfiilli saaffiginnittarnerat pitsaanerusumik tigusalissavarput, inussutissarsiortut naalakkersuisorlu oqarput.
Nunarsuarmi aatsitassarsiorneq pillugu ataatsimeersuartarnerit annersaat PDAC Torontomi martsip aallaqqaataaniit sisamaanut ingerlanneqaqqammerpoq, nunarsuarmilu pisartut allat assigalugit Coronap tuniluunneranit ernummateqarnermit sunnerneqarsimalluni. Ilaasussarpassuit angerlarsimaannarniarlutik naggaterpiaatigut aalajangersimapput, ataatsimiigiaqataasimasullu ataatsimiinnerit tamatigut naammassineqaraangata assatik spritsimik salittarpaat.
Xploration Services Greenlandimut, aatsitassarsiorfiit misissuineranni najugaqarfissanik, ataqatigiissaarinermik, pilersaarusiornermik allaffissornermillu kiffartuussinermik immikkut ilisimasalimmut, ukioq manna ataatsimeersuarneq iluatsitsiffiulluarpoq.
– Ukiup siulianut sanilliullugu amerlanerujussuarnit saaffigineqarlutalu aperineqartarsimavugut, ilimanarpoq Donald Trumpip nalunaaruteqarneratigut nunarsuarmiunit soqutigineqarnerulersimanerput. Taamaammat 2020-mut 2022-mullu tunngatillugit isumalluartupilussuuvugut, tassa aatsitassarsiortut najugaqarfissaannik sananissamut, imaatigut angalanermi aaqqiissuteqarnissamut qulimiguulimillu ikorfartuinissamut suliassarpassuaqaratta, pisortaq Bent Olsvig Jensen oqaluttuarpoq.
Ingerlatseqatigiiffissuit nunami suliaqarnissaat
Ukiuni kingullerni pingaartumik ingerlatseqatigiiffiit immikkoortortaqarfii Kalaallit Nunaanni suliaqartarsimapput. Taakkulu nalinginnaasumik ukiumut ataasiinnarmut atuuttussanik aningaasaliissuteqartarlutik. Tamanna isumaqatigiissutinut, assersuutigalugu Xploration Services Greenlandimut isumaqatigiisutigineqarsimasunut sunniuteqartarpoq. Taamaammat ingerlatseqatigiiffissuit, soorlu Anglo Americanip aamma Rio Tintop Kalaallit Nunaannik takunnilersimanerat soqutiginartunik periarfissaqartitsisoq Bent Olsvis Jensenip takusinnaavaa. Amerlanerusunik suliakkinneqarnissamut tamanna periarfissaqartitsilersinnaavoq.
– Ingerlatseqatigiiffissuit piffissami sivisunerusumi suliaqarsinnaasarput. Ingerlatseqatigiiffissuit soqutiginninnerisa aningaasaliissuteqartartut soqutiginnilersissinnaavaat. Taamaammat mianersortumik siunissamut isumalluarpugut, soorunami Naalakkersuisut aatsitassarsiornermut periusissiaat nutaaq malitseqartillugu iliuuseqartoqarnissaa aalajangiisuulluinnassaaq, Bent Olsvig Jensen oqarpoq.
Aatsitassanut Naalakkersuisoq Vittus Qujaukitsoq tassunga isumaqataavoq.
– Aatsitassarsiornermi periusissiami nutaami maanna aqutsinitsinni ssanngiiffigisimasavut iliuuseqarfigaavut. Aatsitassarsiorfinnit isornartinneqartarsimavoq paasiuminaattumik ingerlatsisarnerput, tassa ingerlatseqatigiiffiit ilisimatissanagit utaqqisittarsimavanut. Tamanna pitsaanngilaq. Unammillersinnaassuserput pitsaanerulersissavarput, aamma suleriaatsivut inatsisivullu atuisunut paasiuminarninngortillugit aaqqissuuttariaqarpavut. Aatsitassanut inatsiseqarpugut ukiut qulit ingerlaneranni sisamariarlugu allanngortinneqarsimasumik. Inatsit tamaat ataasimut isigalugu paasiuminaallisimavoq. Kalaallit Nunaat aatsitassarsiorfittut imminut tuniniassappat tamanna pitsaanngilaq, Vittus Qujaukitsoq oqarpoq.
Ukioq manna PDAC pillugu Torontomi ataatsimeersuarnermut inuit 23.144-t peqataapput, siorna inuit 25.843-t ataatsimeersuarnermut peqataasimasut.