Aatsitassat: Kommune Kujalleq anguniagaqarpoq
PDAC-mi saqqummersitsinermi Kommune Kujalleq borgmesteri Kiista P. Isaksen siuttoralugu aallartitaqarluarpoq, tassani Greenland Minerals qanoq pilersaarnermik nalunaarummik atsioqatigineqarnera iluatsinneqarpoq.
Kommune Kujalleq aatsitassarsiornermut suliassaqarfimmi anguniagalimmik periusissiorsimavoq.
Ingammik aatsitassarsiornermik suliniutit marluk - Tanbreez aamma Greenland Minerals – ukiuni arlalinni ingerlanneqareerput, kisianni piiaasinnaanermut akuersissutit suli Namminersorlutik Oqartussanit tunniunneqanngillat.
Suliassaq pimoorukkaat
- Maani saqqummersitsinermut peqataanitsinni suleqatiginnikkumanerput aamma suliassamik pimoorussinerput aatsitassarsiornermik sulialinnut naqissuserparput, Kiista P. Isaksen Sermitsiaq.AG-mut nassuiaavoq. Taanna ilaatigut pisortap tullersortaanit Carsten F. Hansenimit ingiaqatigineqarpoq.
Qanoq pilersaarnermut nalunaarut marlunngornermi atsiorneqartoq, sapaatip-akunneri marluk matuma siorna kommunip Tanbreezillu atsioqatigiissutaannut assinguvoq.
Aatsitassarsiorneq aallartinneqarpat kommunimi suliffeqarfiit sapinngisaq tamaat iluaqutserneqarnissaasa qulakkeernissaa siunertaavoq.