Aatsitassat: Rubinisiorfik sulisunit kingullernit maanna qimanneqalerpoq
Rubinisiorfimmi sulisut 30-t ukiut nikinneranni soraarsinneqarput. Sapaatip-akunneri marluk qaangiuppata sulisuerutissaaq. Greenland Rubyp nammineq aningaasaatit annaasimavai, taakkualu -509 millioner koruuniulersimallutik.
LNS Greenland A/S, ingerlatseqatigiiffik pigisani Greenland Ruby A/S sinnerlugu Aappaluttumi rubinisiorfimmik 2022-p naanissaata tungaanut ingerlatsisuusimasoq, piiaaffimmi sulisuerutingajalerpoq.
– Aggustip 19-iani sulisuerutissaaq, Peter Christian Madsen oqarpoq.
Taanna Kalaallit Nunaanni ingerlatseqatigiiffinnut marlunnut, anpartsselskabet LNS Greenlandimut aamma aktieselskabet Greenland Rubymut, pisortaavoq.
Maannakkorpiaq piiaaffimmi Kalaallit Nunaanni rubinisiorfituaasumi sulisut arfineq-marluupput. Taanna sinerissami Nuummiit 160 kilometerinik missaannik kujasinnerusumiippoq. Piiaaffik ukiut nikinneranni 2022/23-mi matugallarneqarpoq tunisassiornerlu unitsinneqarluni. Taamani sulisut 30-t soraarsinneqarput.
Kisianni aggustip 19-iani oqartoqarsinnaalissaaq, rubinisiorfik matuneqarlunilu qaminneqartoq.
Greenland Ruby A/S Namminersorlutik Oqartussani piiaanissamut akuersissummik tunineqarsimavoq. Rubinit pisuussutini pingaarnerpaajupput, safirillu pingaarnerpaanut tulliullutik.
500 millioner koruunit sinnerlugit akiitsoqartoq
Piiaanermik ingerlatseqatigiiffik Norgemiunit pigineqartoq, holdingselskabet Greenland Ruby DK ApS., Danmarkimi nalunaarsorneqarsimasoq, aningaasanik sukkasoorujussuarmik annaasaqariartuaarpoq.
Allaaserisami ”Greenland Ruby kingumut amigartoorujussuaqqippoq” oqaatigineqartutut siorna akileraarutit ilanngaatigereerlugit 355 millioner koruuninik amigartoortoqarpoq.
Ingerlatseqatigiiffik 2022-p naanerani nammineq aningaasaateqarpoq minusiusunik 509 millioner koruuninik ataatsimullu katillugit 513 millioner koruuninik akiitsoqarluni.
Rubinit nalilerujussuit – tunisalli ikittuinnaallutik
Rubinip pink safirillu ujaraapput erlinnartut, rubinillu qaffasissumik pitsaassusillit diamantinit naleqarnerusinnaapput.
Sermitsiap siusinnerusukkut allaaserisimasaatut Greenland Ruby Thailandimi rubininik uninngasuuterpassuaqarpoq, 2022-lli naanissaata tungaanut tunisat annikitsuaraarsimallutik.
Rubinisiornermik ingerlatseqatigiiffik 2022-mi kaaviiaartitanik suliffeqarfissuup aningaasartuutaanit amerlanerusunik suli angusaqarsimanngilaq. Suliffeqarfissuaq akiitsoqarfigineqarpoq, tassa imaappat pissarsiassaqarpoq 906 millioner koruuninik Kalaallit Nunaanni ingerlatseqatigiiffinnit pigisaminit Greenland Ruby A/S-imit aamma LNS Greenland A/S-imit.
Allaaserisaq tamaat Sermitsiami atuaruk:
