ACB-p Maniitsumi inuussutissarsiorneq ineriartortikkusukkaa
Arctic Circle Businessip Arnaaraq Hansen Maniitsumi immikkoortortaqarfimmi project manageritut atorfinitsippaat.
32-nik ukiulik Arnaaraq Hansen Arctic Circle Businessip Maniitsumi immikkoortortaqarfiani project manageritut atorfinippoq. Taassuma Ilisimatusarfimmi inuiaqatigiilerinermi kandidatitut ilinniarnini naammassingajalerpaa.
Arctic Circle Business taama ilisimatitsivoq.
Arctic Circle Business inuussutissarsiornermik nammineq ingerlataqartunit namminersortunut kattuffiuvoq, Qeqqata Kommunianiilluni. ACB Sisimiuni qitiusumik allaffeqarpoq, Maniitsumilu immikkoortortaqarluni.
- Qilanaarivara ilisimasannut tunngassuteqartunik suliaqalernissara, Qeqqatami minnerunngitsumillu Maniitsup eqqaani siuarsaaqataanissannut qilanaarpunga. Suliffik uannut ineriartorfiusussatut takorloorpara, inuussutissarsiuteqartullu suleqatiginissaannut qilanaarlunga, Arnaaraq Hansen Maniitsumi peroriartorsimasoq oqarpoq.
Inuussutissarsiutit ineriartortinneqassapput
Arctic Circle Business Qeqqata Kommuniani namminersorlutik inuussutissarsiuteqarnissamut periarfissanik inerisaaqataanermik suliaqartarpoq, immikkoortullu arlallit, soorlu Destination Arctic Circle aamma Qulleq Fab Lab ingerlataralugit.
ACB naapertorlugu Arnaaraq Hansen suliniutinik aqutsinermik inerisaanermillu ingerlataqassaaq, Maniitsumi eqqaanilu inuussutissariutinik periarfissagissaarnerulernissaq siunertarineqassalluni.
- Suliassaasa ilagivaat Maniitsumi inuussutissarsiuteqartuni suleqatigiinneq nukittorsassallugu, minnerunngitsumillu takorluugarput nunani issittumi inuussutissarsiornikkut ingerlatsinerup ajornannginnerpaanissaanut anguniagarput siammartissallugu, ACB allappoq.
Arnaaraq Hansen, kandidatitut ilinniakkaminik naammassinningajalersoq, ACB-mi 1. august aallarnerfigalugu atorfinippoq.