AECO: Ilisimatusaatigaluni takornariartitsisarneq isumannaatsuuvoq

Avatangiisinut naalakkersuisoq, Kalistat Lund, ilisimatusaatigaluni takornariartitsisarneq, nammineq Naalakkersuisutut akisussaaffiginneqataaffigisani pillugu isornartorsiuvoq. Ilisimasassarsiuutigaluni takornarialerisut tungaannit takornariariaaseq taamaattoq illersorneqarpoq.

Nalinginnaasumi umiarsuit takornariartaatit aqqutigalugit nunatsinnukartartut inoqarfinni sumi tamaani aqqusinermi takornariat takussaasarput, ilisimasassarsiuutigaluni takornariartitsisut inuilaarsuarmiinnerusarput, ilaatigut Avannaarsuani nunami eqqissisimatitami aammalu kangerlunni ileqqut malillugit piniariartarfiusuni aalisarfiusartunilu taakku angalasarlutik. Anders La Cour Vahl AECO-meersoq isumaqarpoq isumannaallisaaneq pitsaasorujussuusoq, taamaattorli Ocean Explorerip ikkarlinnera ilinniutigineqassasoq aamma kaammattuivoq.

Nunalerinermut, Imminut Pilersornermut, Nukissiutinut Avatangiisinullu Naalakkersuisoq, Kalistat Lund (IA) isumaqarpoq takornarialerisut umiarsuarnik takornariartaatinik ingerlatsisut imminnut ilisimasassarsiortutut taasinnaanissaat ajornanngippallaartoq. Taamatut taaguuteqarluni nunatta avannaarsuani nunaa eqqissisimatitaq aammalu kangerluit ileqqut malillugit piniariartarfiullutillu aalisarfiusut umiarsuit angallavigisinnaavaat, tamannalu ullumikkut ajornanngippallaaarnarpaa.

Taamaattorli AECO-mi, ilisimatusaatigalutik umiasuit takornariartaatit kattuffianni pisortamut tullersorti, Anders La Cour Vahl naapertorlugu ilisimatusaatigaluni takornariartitsisarneq pinngortitamik mianerinneqqissaarluni aammalu nunap inuisa inooriaasiannik ataqqinnilluni ingerlanneqartarpoq:

- Aallarniutigalugu erseqqissaatigissavarput, ilisimatusaatigaluni takornariartaatitut imminut taasinnaanissaq anguneqartarmat nunarsuaq tamakkerlugu akuerisaammat ukiorpassuarnilu taamatut takornariartitsisarneq inerisarneqarnikuummat.

- Ukiuni qulikkaani arlalissuarni ilisimatusaatigaluni takornariartitsisarneq Nunap avannaarsuani nunami eqqissisimatitami kangerluinilu ingerlanneqartarpoq. Taamatut nunami eqqissisimatitami imaatigut angalaarnerit inatsisitigut inerteqqutaanngillat aammalu sukannersorujussuarnik piumasaqaatitaqarpoq, aatsaallu sukumiisorujussuarmik qinnuteqaateqartoqarneratigut akuersissummik pissarsisoqarsinnaavoq, Anders La Cour Vahl Sermitsiaq.AG-mut erseqqissaavoq.

"Ocean Explorerip ikkarlunnera ilinniutigissavarput"

Anders La Cour Vahl oqaluttuarpoq, AECO-mi ilaasortat inatsisitigut piumasaqaatit saniatigut aamma namminneerlutik isumaqatigiissutigisaminnik suli sukannernernik malittarisassaqartut:

- AECO-mi isumannaallisaaneq, ujaasisoqassagaluarpat annaassiniartoqassagaluarpalluunniit pilersaarusiorluaqqissaakkamik aaqqissuussaaneq pillugit sukumiisorujussuarmik suleqatigiittoqarpoq.

- AECO-p tungaaniit isumaqarpugut, Ocean Explorerip ikkarlinnerani pisimasoq pillugu aqqusaarneqartut tunngavigalugit paasiniaaqqissaarnissamut ilinniutiginissaanullu nukiit atortariaqarigut, taamaalilluta taamatut pisoqaqqinnginnissaa sapinngisamik annerpaamik qulakkeerniarsinnaagatsigu. Matumani Avannaarsuani nunami eqqissisimatitami angalaarnissamut akuersississut pineqaannanngilaq, tassami imaatigut angallatit qanorluunniit ikkaluartut nalaassinnaavaat, aammalu ilungersunartorsiorsinnaapput taamatut nalaataqarnermi, sumiluunniit pigaluarpat.

- Pisut taamatut ittut ilinniarfigineqartariaqarput, isumannaallisaanermut tunngatillguu annertusaasoqarnissaanut sakkussatut aammalu nukiit tamaasa atorlugit taamatut nalaataqartoqaqqinnginnissaa qulakkeerniagassaavoq pingaarutilik, assingusumik pisoqariataassagaluarpat iliuuseqarnissamut piareersimaneq annertunerpaaqqullugu.

Umiarsuit takornariartaatit amerlanersaat ilisimatusaatigaluni takornariartitsinermik ingerlatsisuupput

2023-mi ilisimatusaatigaluni takornariartaatsit qassit nunatta imartaaniissanersut pillugu AECO kisitsiseqqissaanik piareersimasuuteqanngilaq, taamaattorli nunatta takornarilerinermik aqutsivianit Visit Greenland-imit paasissutissaagallartut naapertorlugit ataatsimut isigalugu umiarsuit 621-it tikittussaapput, 2022-mi 425-iusimariarlutik, tassa ukiup ataatsip ingerlanerani 46 procentimik amerleriarsimapput.

Taakkunannga tikittussat 457-it akornanni amerlanerpaamik 500-nik ilaasullit amerlanersaapput, taakku tikittussat tamarmik 73,6 procenterivaat. Umiarsuit taakku "expedition cruises"-nik nalunaarsorneqarsimapput, tassa ilisimatusaatigaluni takornariartaataapput.

Umiarsuarsuit 161-it 500-it sinnerlugit ilaasoqarput, taakkulu nalinginnaasumik takornariartaataapput "conventional cruises"-nik taaguutillit, procentinngorlugu taakku taamaallaat 26,4 procentimik amerlassuseqarput.

Anders La Cour Vahl erseqqissaavoq umiarsuit pineqartut, tassa ilisimatusaatigaluni takornariartaatit, nunatta qanoq aningaasarsiutiginerai imaaliallaannaq kisitsisinngortinneqarsinnaanngitsut. Taamaattorli Svalbardimi kisitsinngortitsisimanerup ersersippaa ilisimatusaatigaluni takornariartitsinerit nalinginnaasumik takornariartitsinermiit inuiaqatigiinnut tikitanut isaatitsissutaanerusartoq:

- 2018-mi Svalbard-imi takornariartitsisarneq kisitsisinngorlugu misissoqqissaarneqarmat paasinarsivoq ilisimatusaatigaluni takornariartitsisarneq nalinginnaasumik umiarsuarnut takornariartaatinut ilaasunut sanilliullugu tallimariaammik isaatitsisoqartartoq, Anders La Cour Vahl erseqqissaavoq.

Pinngortitami misigisassarsiorneq inuillu nunaqartut pulaarneqartartut

Taamaammat AECO-mit isumaqarnerarput, umiarsuit ilisimatusaatigaluni takornariartaatsit iluatinnartuusut, taakkumi pinngortitami misigisassarsiornerusarmata aammalu ilutigisaanik sumiiffinni nunaqavissut tikinneqartarmata.

- Taamaammat ilisimatusaatigaluni umiarsuartigut takornariartitsisarnerit kangerlunnut pulatersinnaallutik sineriammi angalaarsinnaanerat pingaaruteqarpoq, taanna tikkuaavoq.

Taamaattorli kikkut immikkut ilisimatusaatigalutik takornarianik angallassisinnaanersut pillugu, aammalu kikkut Avannaarsuani nunami eqqissisimatitami kangerluinilu aammalumi kangerlunni allani angalaarsinnaanersut pillugit Naalakkersuisut ilimasaarereerput sukaterisoqassasoq, sulili ulluliisoqanngilaq sukaterumaagassat qaqugu atuutilerumaarnersut.

Powered by Labrador CMS