Air Greenland 2006-imi 90 mio. kr.-nik sinneqartoorpoq
Air Greenland 2006-imi akileraarutit suli ilanngaatiginagit 90,8 millioner koruuninik sinneqartooruteqarsimavoq, ukiup siuliani 67,8 millioner koruuninik sinneqartooruteqarsimalluni.
Akileraarutit ilanngaatigereerlugit angusat 75 millioner koruuniupput, ukiup siuliani 40,8 millioner koruuniusimallutik. 2006-imi kisitsisinut ilaapput 16 millioner koruuninik ilorraap tungaanut iluarsiissutit, 2007-imi selskabinut akileraarutip procentiata allanngortinneqarnerata kingunerisaanik, taamatut paasissutissiivoq selskabi.
Billetsit aappalaartut akiisa appariartortuarnerat, ikummatissamut aningaasartuutit qaffakkiartornerat, unammillerneq, Atlantikoq qulaallugu timmisartuussinerup nalinginnaasumik annikinnerusumik siuariartornera aammalu inissat neqeroorutigineqartut amerlanerulernerat pissutigalugu timmisartuussivinni isertitat ingerlalluarunnaarsimapput. Tamanna peqatigalugu assartukkat allakkallu ikileriarsimapput.
Akerlianik selskabip isertitai qaffariarsimapput selskabip helikopteriisa attartorneqaleraluttuinnarnerat pissutigalugu, minnerunngitsumik heliskiingimut aatsitassanillu ujaasinermut kiisalu Uummannap eqqaata helikopterimik angallassiffiginerata nangiinnarneqarnera. Tamatuma saniatigut selskabip Atlnatikioq qulaallugu timmisartorsui annertusigaluttuinnartumik attartorneqartalersimapput.
Hotel Arctic ukiumi tassani ingerlalluarsimanngitsoq Kalaallit Nunaanni Angalatitseqatigiiffimmi aammalu pisiareqqammisami Air Alpha Greenlandimi angusat naatsorsuutigisatut issimapput, selskabi paasissutissiivoq.
2007-imi Atlantikioq qulaallugu unammillertoqassaaq aammalu USA-mi Baltimoremut timmisartuussivik unammilligassartaqassaaq. Air Greenlandillu qullersai naliliipput selskabip ukioq manna aningaasaqarniarneranut apeqqutaaqqissasoq timmisartunik attartortitsinerup qanoq ingerlanera. Tamatuma sanitigut qullersat Atlantikoq qulaallugu timmisartuussiviup siuariarforfiunissaa allatulli isumalluarfigitigiinngilaat, taamatut paasissutissiivoq Air Greenland.