Air Greenland Aalborgimik oqaloqateqarpoq
Kalaallit Nunaata Aalborgillu akornanni attavimmik pilersitsisoqarnissaa pillugu Air Greenland aalajangernialertinnagu timmisartumut ilaasartutigut toqqammavissat sukumiisumik misissuiffigeqqaartussaapput.
– Aalborg Lufthavnip ilaasartunik misissuigallarnerit tunngavigalugit Air Greenland attavigismavaa. Isumaqarpunga aamma timmisartuutileqatigiit allat attavigisimagaat, Air Greenlandip pisortaa Michael Binzer sermitsiaqgl-imut oqarpoq.
JyllandsPosten allappoq, Aalborg Lufthavn Kalaallit Nunaannut toqqaannartumik attaveqalernissamik isumaqatiginninniartoq. Kisianni toqqaannartumik attaveqalernissamik pilersitsinissaq pillugu Aalborg Lufthavn aamma Air Greenland oqaloqatigiikkaluartut maannakkorpiaq sumilluunniit aalajangertoqanngilaq, Michael Binzer erseqqissaavoq.
– Aalborgimut toqqaannartumik attaveqalernissami inuussutissarsiortut pisariaqartitsinerat misissuiffigeqqaassavarput aamma Kalaallit Nunaata Aalborgillu akornanni angallannikkut pisariaqartitsineq. Siusinnerusukkut sullitatigut toqqammavissat pillugit sukumiisumik misissuisoqartarsimannginnera peqqutigalugu aqqutit ammartarlugillu matusarsimavagut. USA-mi Baltimore-mut Islandimilu Akureyri-mut attaviit assersuutigisinnaavagut.
– Oqareernittut Aalborg Lufthavn oqaloqatigaarput, maannakkullu pisut utaqqimaarallarpagut, sulilu aalajangiisoqarnani, Michael Binzer oqarpoq.