Air Greenland naqissusiivoq: Upernavimmut minnermi navianartorsiortoqanngilaq
Air Greenlandip qulimiguuliutaasa ilaat tallimanngornermi timminermini teknikikkut ajoquteqarpoq, tamannalu pissutigalugu upalungaarsimasut milinnginnermi attaveqarfigineqarput. Ajornartoorlunili mittoqanngilaq, isumannaallisaanermili periuseq taamaallaat atorneqarpoq.
Air Greenlandip tallimanngormat Upernavimmi qulimiguullip minnerani qanoq pisoqarsimanersoq misissorpaa, Kalaallit Nunaanni Politiini pigaartut pisortaata ajornartoornermi mittoqarnerarpaa. Ajornartoornermili mittoqarsimanngilaq, Air Greenland ilisimatitsivoq.
- Pisumi ilaasut navianartorsiorsimanngitsut Air Greenlandimit oqaatigissallugu pingaaruteqarpoq, periutsillu maleqqissaarneqarsimapput.
Angallassineq pilersaarutit malillugit ingerlaqqittoq
Kullorsuarmit Upernavimmut qulimiguulimmik OY-HJB-mik timminermi qulleq aarlerisaarut ikissimasoq, Air Greenland ilisimatitsivoq.
- Taamatut pisoqartillugu minnermi upalungaarsimasunik kissaateqartoqarnersoq nakkutilliisut aperisarnerat periuseq nalinginnaasuuvoq, tassanilu akuersivugut.
Sakkortuumik mittoqanngitsoq
Qulleq aarlerisaarut ikumatillugu timmisartornernermi ajoquteqartoqarnerata qanoq iliuuseqarfiginissaanut iliuusissat pingasuukkajupput, Air Greenland ilisimatitsivoq.
- Qulimiguulik ingerlaannaq missaaq (ajornartoorluni milluni)
- Qulimiguulik miffiusinnaasumut qaninnermut missaaq
- Qulimiguulik mittarfimmut qaninnermut teknikikkut aserfallatsaaliiffigineqarsinnaasumut timmissaaq
- Tallimanngormat ajoqutaasoq tassaavoq qulaani pineqartuni kingulleq, tassa qulimiguulik tikiffissaminut Upernavimmut ingerlaannarsinnaavoq.
Tamatuma kingorna qulimiguulik misissorneqarpoq, teknikikkullu ajoqutaasoq paasineqarpoq.
- Ajoqutaasoq sanaartortumut nalunaarutigaarput, ingerlaqqinnissamullu akissuteqarfigineqarnissaq utaqqivarput.
Kingoraartissat ajoqutaapput
Air Greenlandip Upernaviup eqqaani kiffartuussinerminni piffissami matumani unammillernartoqartitsinini nassuerutigaa, kisianni qulimiguulik taanna pineqannginnerarpaa.
- Qulimiguulik nalinginnaasunik unammillernartunik peqanngilaq, kisianni kingoraartissanik pissarsinissaq unammilligassat annersaraat. Maanna gearboksimik amigaateqarpugut, taanna sanaartortuisa tunniussinnaanngilaat.
Teknikikkut unammilligassat iluarsiniarlugit, Air Greenland sapinngisaminik iliuuseqarluni ilisimatitsivoq.
- Teknikerigut sulilluaqaat, kisianni kingoraartissanik pissarsinissamik ajornakusoortitsitilluta suliffeqarfipput tatineqarnerulertarpoq. Upernavimmi angallassineq pillugu nutaarsiassaateqalerutta nalunaaruteqassaagut, ilaasutsinnullu taamaatitsinerit akornutaasut ajuusaarutigaagut.