Air Greenland Nuummit Aalborgimut timmisartuussisarnissamut nutaamik suleqateqalersoq

Angalatitsiviup Ruby Rejserip aasaru Aalborgimit Nuummut timmisartuussisalerniarnera Sermitsiap siusinnerusukkut oqaluttuaraa. Angalatitsiviup bilitsit akikitsut pillugit nalunaaruteqarnera uitsataavoq.

Timmisartuussinermi bilitsinik tuniniaanermi avitseqatigiinnissamik Namminersorlutik oqartussat timmisartuutileqatigiiffiutaat Ruby Rejserimik isumaqatigiissuteqarfiginnissimasoq, pingasunngornermi Air Greenland ilisimatitsivoq.

Taamaalilluni Air Greenland sapaatip-akunneranut marloriarluni aqqummi tassani timmisartuussinissamik neqerooruteqarsinnaalissaaq, tamannalu Air Greenlandimi niuernermut pisortap Kasper Rungfeldtip nuannaarutigaa:

- Timmisartumi inissat affaasa tuniniarnissaannik Ruby Rejserip suleqatigilerneratigut timminerillu Kalaallit Nunaaannit Nunaannullu sapinngisamik amerlanerpaatinniarnerisigut, nunap iluani angallassivitsinni angalasut amerliinnassanngilavut.

- Aqqutip iluatsilluarnissaanut iluaqutaasumik isumaqatigiissut ineriartortitsisinnaavoq, Kasper Rungfeldt tusagassiuutinut nalunaarummi oqarpoq.

Timmisartuussisarnerit ima isikkoqassapput:

Timmisartoq attartortittagaq AirSeven-imeersoq timmisartuussissutaasassaaq.

Aalborgimi Ruby Rejsersip immikkoortortaqarfiani pisortaq Morten Meyer oqarpoq Air Greenlandimik suleqateqarnerup kingunerisaanik timmisartuutileqatigiiffiit taakku marluk aqqutip akilersinnaasunngortinnissaanut siunissamilu annertusinissaanut nukittunerulersimasut:

- Kalaallit Nunaat angalasunut nalinginnaasunut tamanut angalaffissatut ajornannginnerulersikkusullugu siusinnerusukkut oqaatigisimavarput. Isumaqatigiissuteqalernikkut isumaqarpugut taamaaliorniarnitsinni periarfissaqarnerulersimasugut, Morten Meyer oqarpoq.