Air Greenland timmisartumik innaallagiatortumik pissarsiniartoq
Timmisartoq Co2-mik mingutsitsinngitsoq aamma qummut ammullu qangattarlunilu mittartoq, timmisartuuvoq innaallagiatortoq Air Greenlandip pissarsiariniarlugu pilersaarutigisaa.
VX4 eVTOL timmisartumut innaallagiatortumut taaguutaasoq Kalaallit Nunaanni piujuartitsinermik tunngaveqarluni silaannakkut angallassisalernissamut aallarniutaasinnaavoq.
Air Greenland ingerlatseqatigiiffimmik Avelon-imik suleqateqalersimavoq, timmisartumillu innaallagiatortumik attartornissamik pisiaqarnissamilluunniit siunnerfeqarneq atsiorsimallugu, tassa timmisartoq taamatut ittoq piareerpat, naatsorsuutigineqarporlu timmisartoq ukiut pingasut ingerlaneranni atorneqarsinnaalissasoq.
- Siunissaq ungasissoq eqqarsaatigalugu Air Greenlandi ullumi nalunaaruteqarnikkut piujuartitsinermik tunngaveqarluni suliniuteqarnerup ingerlaqqinnissaanik aallartitsivoq. Ullut tamaasa silap pissusaata allanngoriartornera malugisarparput, nunatsinnilu angallannerup CO2-mik mingutitsiviunngitsup angunissaa sulissutigiuarlugu. Pilersaaruteqarnermik nalunaarut tunngavigalugu suliffeqarfittut silaannakkut angallannerup allannguiviginissaanut siuttuussaagut, direktør i Air Greenlandimi pisortaaneq Jacob Nitter Sørensen isumaqatigiissut pillugu oqarpoq.
Takornariat Ilulissat kangerluanut timmisartuunneqarsinnaasut
Timmisartoq aquttup saniatigut inunnut sisamanut inissaqarpoq, nal.ak. 322 kilometerinik sukkassuseqarluni 160 kilometerinik isorartussusilik ingerlasinnaallugu. Timmisartoq nipiliunngingajattoq CO2-millu mingutsitsinngitsoq, qulimiguulittut qummut ammullu qangattarlunilu mittarpoq.
Air Greenlandip timmisartunik VX4-nik qassinik pisinissaa pisariaqartitsitsineq naapertorlugu suleqatigiissitamit nalilersorneqassaaq. Timmisartullu siunissami Ilulissat Ilimanallu akornanni piffissami qanittumi atorneqarsinnaalernissaa Air Greenlandimit piukkunnartutut nalilerneqareerpoq.
Avolon-ip timmisartuliorfik Vertical Aerospace VX4 eVTOL-nik sanaartortuusoq timmisartunik taakkunannga 500-nik inniminniiffigereerpaa. Timmisartuliorfik taanna ukiuni tallimani kingullerni eVTOL-imik sanaartornermik aallussinermini sulisut misilittagaqarluartut pigai, innaallagiarlu ingerlatigalugu silaannakkut angallassinerup ineriartortinnerani siuttutut inissisimavoq.
Issittumi CO2-mik mingutsitsiviunngitsunik angallannissanut suleqatigiissitaq
Air Greenlandilu pilersaaruteqarnermik nalunaarummik Avalonimik atsioqateqarnikkut, suleqatigiissitamut issittumi niuernermik tunngaveqarluni angallannerup CO2-mik mingutsitsiviunngitsumik ingerlanneqarnissaanut periarfissanik nalilersuisussamut peqataanissaminut akuersivoq.
- Suleqatigiissitami peqataanitsigut timmisartup innaallagissamik ingerlatillip sumi atugassatut piukkunarneranik qulaajaaqataallutalu, niuernermik tunngaveqarluni timmisartuussisarnernut nunarsuarmi piumasaqaatit tunngavigalugit akuersissutit nunatsinninni pisariaqartitat, qulakkeernissaannut peqataassaagut, Jacob Nitter Sørensen nassuiaavoq.
Air Greenland Europami timmisartuutileqatigiinnit siullersat ilaanut timmisartumik taassuminnga inniminniivoq, aammalu Brasilien 250-nik, Japan Airlines 100-t angullugit Air Asia-lu ikinnerpaamik 100-nik inniminneereersimapput.