Air Greenland ukiup affaanut angusaminik pitsaanerulersitsivoq

Air Greenlandip ukiup affaanut naatsorsuutiminik ukiup siulianut sanilliullugu pitsaanerulersitsivoq.

Namminersorlutik Oqartussat timmisartortitseqatigiiffiat 2023-p affaani siullermi 8,2 mio. kr.-nik sinneqartooruteqarpoq. Air Greenland 2022-mi piffissami tassani 7,7 mio. kr.-nik amigartooruteqarsimavoq.

Air Greenlandip ukiup affaanut naatsorsuutit naammaginartutut nalilerpai, tassanilu ”nunatsinniit tassungalu aammalu nunatta iluani timmisartunut ilaanissat ajornannginnerulernissaannik qulakkeerinninnerit” angusat pitsaanerunerinut pissutaapput.

Ingerlatseqatigiiffiup niuerfiup annertusinissaanut aamma angalaffissat nutaat ammarnissaannut periusissani malikkai, siulersuisuni siulittaasup Bodil Marie Damgaardip, tusagassiuutinut nalunaarummi oqaatigaa.

Angallaffiunnginnerusumi siuariarnermik pilersitsisut

- Angallannerpaaffiulli nalaani unnuiffissanik amigaateqartarnerup ineriartortitsineq killiliiffigaa.

- Pitsaasumillu siuariaateqarnerup angallannerpaafiup avataaniinnera timmisartuutinik atorluaanermik takornariaqartarnerullu sivisuneruneranik nassataqarpoq, Bodil Marie Damgaard oqarpoq.

Air Greenlandip nalunaarutaa naapertorlugu nunatsinni angalasut amerleriarsimapput, aamma nunanit tamalaanit angalasut ukiup affaani siullermi amerleriarput.

- Nunatsinni Naatsorsueqqissaartarfik naapertorlugu timmisartunut ilaasut nunanit allaneersut 15%-mik qaffariarput, taakkulu amerlanersaat Air Greenlandimut ilaasuullutik, Air Greenland allappoq.

Billund sunniuteqartoq

Ilaatigut Billundip Kangerlussuullu akornanni aqqutip ammarneqarnera siuariarnermut pissutaaqataasoq, pisortaq Jacob Nitter Sørensen oqarpoq.

- Atlantikoq qulaallugu timmmisartuussinerit taakkunanilu inissat amerlineri, nutaatullu Billundimut tassanngalu timmisartuussisalernerit aammalu bilitsinik akikitsunik pisiassaqarnerunera qaffariaammut pissutaarpiarput, pisortaaneq Jacob Nitter Sørensen oqarpoq.

Air Greenlandip 2023-mi 100 mio.kr. -nik sinneqartoornissani naatsorsuutigaa, tamannalu siusinnerusukkut nalunaarutigineqartunut naapertuuppoq.

Air Greenlandimi juunip 30-ani sulisut 581-upput, tassa siorna piffissami tassani 548-uusunit 33-nik amerlanerupput.

Angallaffiunerpaaq ingerlalluarnerusoq

Tenkik pissutigalugu taamaatitsinerit aamma kinguaattoornerit ikinnerunerat, Air Greenlandimi pisortap aamma nuannaarutigaa.

Silalli allanngorarnera suli ilungersunartoqartitsisimavoq, ilaasunut nerisaqarnermut unnuinermullu aningaasartuutit suli qaffasipput:

- Qujanartumillu timmisartuussinerit patajaannerunissaannik ingerlanneqartarnissaannut sulissuteqarnerit arlaqartut siunniussagut iluatsimmata, suliffeqarfissuarmi sulisut tamavimmik nersualaagassaapput. Sulisummi taakkuupput ingerlatsivitsinni pingaarnerpaat, sullitatsinnullu iluaqutaasunik misilittagaqarluarlutillu pissutsini unammillernarsinnaasuni silaannakkut angallassinermik immikkut ilisimasaqartut.

- 2023-milu silap unerisimannginneranik kinguaattoortoqartillugu ilaasut piaarnerpaamik apuunneqartarneri suli pitsanngoriaateqarsimapput, Jacob Nitter Sørensen oqarpoq.