Air Greenlandip Kangerlussuarmi sulisui
Nuummut Ilulissanullu nuussasut
Air Greenland Kangerlussuarmi 40-50-it missaannik
sulisoqarpoq. Taakkunannga 22-t suliffimmik
qulakkeerinnissut akueraat Nuummilu atorfittaassallutik,
sisamat Ilulissani sulissapput marlullu neqeroorut suli
eqqarsaatigaat
Pele Knud Mathiessen er en af Air Greenlands medarbejdere i Kangerlussuaq, der har takket ja til jobgarantien, hvilket betyder, at han og familien flytter til Nuuk i november
Foto: Privat
Air Greenlandip suliffimmik qulakkeerinnissutaanik sulisut 26-t akuersisimasut ilagaat SIK-mi sulisut sinniisuat Pele Knud Mathiessen, taannalu ilaquttanilu Nuummut nuussaaq.
– Sulisuusugut piffissami matumani allamik oqaluuserisaqanngilagut. Piviusuunngitsutut misinnarpoq, aammali novembarimi Nuummut nuunnissarput qallivoq. Suliffimmik qulakkeerinninneq qujamasuutigaarput, suliffittaarnissatsinnik inissatsinnillu qulakkeerinnittuummat. Kangerlussuarmit inuit nuuttut malugineqarsinnaassapput, Pele Knud Mathiessen, ukiuni aqqaneq-marlunni Kangerlussuarmi najugaqarsimasoq, oqarpoq.
PISARTAGAQARTUNUT
Allaaserisaq una Nutaarsiassaqartitsivimmi aviisit naqitat
ilaanni allaaserisaavoq.
Allaaserisat pisartagaqartunit siunissami taamaallaat
atuarneqarsinnaajumaassapput.
Atuarluarna.
– Kangerlussuarmi sulisut 40-t 50-illu akornanniipput, 26-t Nuummut Ilulissanulluunniit nuukkusupput suliffimmik qulakkeerinninneq aqqutigalugu, marlullu maajip aallaqqaataanut eqqarsaatiginninnissamut piffissalerneqarput. Sulisut nuukkusunngippata nutaanik ilinniartitsinissamut piffissaqartariaqaratta ulloq taanna aalajangiunneqarpoq, Air Greenlandimi sulisoqarnermut pisortaq Mads B. Christensen oqarpoq.
Kangerlussuarmi sulisut siunissaat sivisuumik nalornissutigineqarpoq. Nuummi Ilulissanilu mittarfiit nutaat sanaartorneqalerneranniilli, Air Greenlandimi qullersat ukiumut marloriarlutik pingasoriarlutilluunniit Kangerlussuarmut angalasarput, sulisutik 40-50-it Kangerlussuarmi siunissaq pillugu nalornissuteqartut ataatsimeeqatigiartortarlugit.
– Piffissami nalorninartorsiorfiusumi matumani timmisartut Kangerlussuarmut mittartut kiffartuussiffigineqarnissaat qulakkeerniarlugu isumaqatigiissuteqarpugut. Tamanna ingerlalluarpoq, sulisullu amerlanerpaartaat sulisiinnarnissaat iluatsippoq, Mads B. Christensen oqarpoq.
– Aqutsisut apeqqutivut akilluartarpaat, tamannalu eqqissisitsisarpoq. Aallaqqaammut nalorninartorsioqaagut, soorunami qisuariarpugut suliffittaarnissatsinnik inissaqarnissatsinnillu piumasaqarluta, suliinnarnissarpullu qulakkeerniarlugu siorna isumaqatigiissut takkuppoq, tamannalu akueraarput, Pele Knud Mathiessen nassuiaavoq.
Nuummi suliffiit inissallu
Air Greenlandimi suliinnarnissamik isumaqatigiissuteqarnerisa kingunerisaanik, Nuummi mittarfissap nutaap atulersinneqarnissaa tikillugu sulisut atorfimminniiginnarunik ukiup affaanut akissarsiaqartinneqassapput.
Sulisut taakku tassaapput ingerlatsinermi sulisut soorlu trafikassistentit, timmisartunik usilersuisartut teknikerillu.
– Ingerlatsineq ingerlaannarsinnaanikuuvoq, Nuummilu qanoq pisoqassanersoq, uagut qanoq iliussanersugut Greenland Airportilu nutaaq qanoq iliussanersoq maanna paasilluarparput. Air Greenlandimi atorfittaarnissamut periarfissaq suliffimmik qulakkeerinninneq kikkut atorluarusunneraat sulisut aperisimavagut, Nuummut Ilulissanulluunniit nuussanerlutik namminneq aalajangersinnaallugu, tassanimi pingasunik immikkoortortaqarfeqarpugut nuuffigisinnaasaannik, sulisoqarnermut pisortaq oqarpoq.
Nuummi inissiat amigaataammata, sulisunut Nuummut nuuttunut Qinngutsinni inissiarsuarnik marlunnik Air Greenland sanaartorpoq, novembarimilu naammassinissaat naatsorsuutigineqarpoq.
– Inissiarsuarnik marlunnik sanaartorpugut, taakkualu isikkivigissaarlutik ataat- simoortarfeqarput, tassanilu grillersinnaallutillu katerisimaarsinnaapput, Kangerlussuarmiullu ataatsimoortarnermik anersaavat attatiinnarsinnaavaat, Mads B. Christensen oqarpoq.
Kingulliit qamiterillutillu matusissapput
Air Greenlandip timmisartua Tuukkaq pilersaarutit malillugit marlunngornermi novembarip 26-ani Kangerlussuarmut naggammik missaaq. Tamatuma kingorna sulisut Nuummut nuussapput, ukioq mannalu Nuummi aappaagulu Ilulissani Tuukkaq mittalissaaq.
– Novembarip 26-ani 27-anilu Kangerlussuarmit tingissapput. Immaqa ilaat siusinnerusukkut nuussapput, Mads B.Christensen oqarpoq.
Sulisut meerartallit ilaqutaqartullu siulliullutik Kangerlussuarmit nuuttussaasut, kingulliillu matusillutillu qamiterisussaasut, Pele Knud Mathiessen nassuiaavoq.
– Suut tamarmik matuneqassapput. Trafikkimi, terminalimi hangarimilu sulisut tamarmik matusissapput, taamaallaallu upalungaarsimasussat kiserngorutissapput, Pele Knud Mathiessen oqarpoq.
