Air Greenlandip Ilulissani
akunnittarfissualiornissani maanna taamaatiinnarpaa.
Suliniut Air Greenlandip,
Namminersornerullutik Oqartussanit tamakkiisumik pigineqartup, siulersuisuinit
taamaatinneqarpoq.
Air Greenlandip Ilulissani
akunnittarfissualiornissani maanna taamaatiinnarpaa.
Suliniut Air Greenlandip,
Namminersornerullutik Oqartussanit tamakkiisumik pigineqartup, siulersuisuinit
taamaatinneqarpoq.
Tamanna Air Greenlandip siulersuisuini siulittaasumit Malik
Hegelund Olsenimit uppernarsarneqarpoq.
Air Greenlandip Ilulissani Hotel Arctic
sisamanik ullorialik nunarsuarmilu tusaamasaq immikkoortortaqarfini Arctic
Hospitality Corporation aqqutigalugu pigereerpaa.
Kalaallit Nunaanni, minnerunngitsumik
Ilulissani, unnuisarfissanik pisariaqartitsineq annertugaluaqisoq, Malik
Hegelund Olsen naapertorlugu Air Greenlandip assigiinngitsunik pissuteqarluni
akunnittarfiliornissamik pilersaarutini unitsikkallarpaa.
- Suliniummik taamaatitsiinnartariaqarnerput
soorunami uggornarpoq. Aningaasaliisinnaanitta maannakkut tatineqarpallaarnera
taamatitsiinnarnitsinnut pissutaanerpaavoq. Aamma nunaqavissut allat
akunnittarfiliornissamik pilersaaruteqartut takusinnaavarput. Taamaammat
akunnittarfiliornissaq unitsinniarlugu aalajangerpugut, taanna Sermitsiamut
oqarpoq.
Sanaartornermi akit qaffarujussuartut
Air Greenland 2023-mi 2024-milu Nuummi
Ilulissanilu mittarfinnut nutaanut 400 millionit koruunit sinnerlugit
aningaasaliissuteqarsimasoq Malik Hegelund Olsen nassuiaavoq.
- Hangarinut,
assartuinermut atortussanut, sulisut ineqarfiinut atortunullu allanut
aningaasaliinikuuvugut. Taakku saniatigut sanaartornermut akit
qaffarujussuarput. Taamaammat Ilulissani akunnittarfiliornissarput
taamaatiinnarparput, taanna oqarpoq.
Greenland Airportsip Ilulissani mittarfik
nutaaq nunanut tamalaanut mittarfiusussaq 2026-p affaani kingullermi
ammarneqarsinnaassasoq naatsorsuutigaa. Air Greenland timmisartumik Airbus
320neo-mik nutaamik attartornermut aningaasaliisimavoq, taannalu 2027-mi
upernaakkut ilaatigut Københavnip Ilulissallu akornanni
timmisartuussisalissaaq.
- Tamanna
Ilulissani akunnittarfeqarnerunissap pisariaqarneranik isumaqarpoq,
taamaammallu illoqarfimmi aningaasaliisartut illoqarfimmi
akunnittarfeqarnerunissaq salliutittuassagaat neriuutigaarput, Malik Hegelund
Olsen oqarpoq.
Timmisartortitseqatigiiffiup
aningaasaliissutit tulleriiaartariaqarai, taamaammallu akunnittarfimmut
nutaamut aningaasaliinissamut periarfissaqanngitsoq, taanna erseqqissaavoq.
Suliffeqarfik ukiorpassuarni Kalaallit
Nunaanni illoqarfimmi takornariaqarfiunerpaami akikitsumik
akunnittarfiliornissamik pilersaaruteqarsimavoq. Akunnittarfik nutaaq Greenland
Airportsip mittarfittaava ammarpat naammassereersimasussaagaluarpoq.
Hotel Arctic 100-ngajannik initaqarpoq, Air
Greenlandilu aallaqqaammut akikitsumik marluuttarissanik 160-inik initalimmik,
150-200 million koruunit akornanni akeqartussamik akunnittarfiliorniarluni
pilersaaruteqarsimavoq.
Tamanna Hotel Arcticip pisortaata Morten
Nielsenip 2023-mi marsimi Sermitsiamut oqaluttuaraa.
Ilulissani maajimiit septembarimut
takornariarpassuaqartillugu akunnittarfimmi inissat piumaneqarluartarmata
akunnittarfimmik sanaartornissaq pilersaarusiorneqalerpoq.
Ilulissani unnuiffissat amigaataangaatsiartut
Ilulissani akunnittarfinni inissat
amigaatigineqangaassasut Kalaallit Nunaanni takornariaqarnermut
siunnersuisoqatigiit, Visit Greenlandip, 2024-mi ukiakkut misissuinerata
takutippaa.
Timmisartut anginerusut ilaatigut
Danmarkimiit toqqaannartumik Ilulissanut timmisartuussilerpata, mittarfissap
nutaap ammarneqarnerani takornariat amerleriarujussuassagunararmata
akunnittarfiit qanoq inissaqartigissanersut Visit Greenlandip misissorsimavaa.
“Ilimagineqarsinnaasutut Ilulissani inissat
2026-miilli amigaatigineqangaalissapput, ingammik juulimi aggustimilu.”
Taama Visit Greenlandip Explore North
Greenland suleqatigalugu misissuinerani inerniliisoqarpoq.
Namminersortut arlallit
akunnittarfiliornissamik pilersaaruteqarsimasut Malik Hegelund Olsen oqarpoq.
- Taamaatitsiinnarnitsinni
allat pilersaarutitik piviusunngortinniarnerusinnaavaat. Tamanna
tapersersorumavarput.
- Nutaamik
akunnittarfiliornissarput taamaatiinnarlugu Sermitsiami nalunaarutigigutsigu,
tamanna akunnittarfiliornissamik suliniutinik allanik aallartitsissasoq
neriuppunga. Ilulissanimi akunnittarfimmi ininik amerlanerusunik
pisariaqartitsivugut. Taamaatitsiinnarnerput allat iluaqutigisinnaappassuk
tamanut pitsaassaaq, Air Greenlandimi siulersuisuni siulittaasoq Malik Hegelund
Olsen oqarpoq.
