Akileraartarnrmut inatsit kinguartinneqassasoq SIK-p aamma GA-p kissaatigaat
Akileraartarnermut inatsisip assortuussutaasup allanngortinnissaa ukiakkut ataatsimiinnermi naalakkersuisut tuaviuullugu akuersissutiginiarmassuk kattuffiit angisuut isornartorsiorpaat.
Akileraartarnermut inatsit nutarterneqarsimasoq atorlugu Kalaallit Nunaat isertitaqqortussuseq malillugu akileraartitsiniartalissammat sulinermik inuussutissarsiutillit kattuffiata SIK-p aamma Sulisitsisut Peqatigiiffiata isornartorsiorpaat.
Tamatumani kinguneranik sulisut tikisitat annertuumik akissaatillit illoqarfiit nunaqarfiillu avataanni annertuunik suliaqarfinni sulisorineqartut, sulisunut nunaqavissunut naleqqiullutik annikinnerusumik akileraartassapput.
Inatsisissatut siunnersuutip Inatsisartuni aappassaaneerlugu oqallisigineqarnerani naalakkersuisut aamma siunersuutigaat, aatsitassarsiornerup iluani sulisorineqartut akileraartarnermi maleruagassanik sakkukinnerusunik atugaqassasut, Kalaallit Nunaanni aningaasaliissutinik tigooraasartut.
- Inatsisiliornerup taama kingusitsigisumut killinnerani taama annertutigisumik allannguutissamik siunnersuuteqartoqarmat uatsinnut tupannartorujussuuvoq. Ilaatigut qularutiginngilarput siunnersuut annertoorujussuarmik sunniuteqartussaq pillugu piffissaq kingullerpaaq atorlugu allannguutissamik nassaartoqarsimanngitsoq. Ilaatigullu oqaaseqaatini allassimavoq, inatsisissatut siunnersuutip kinguneranik aningaasatigut sunniutissat suunersut ilisimaneqanngitsoq, SIK-p siulittaasua Jess G. Berthelsen aamma Peqatigiiffiup pisortaa Henrik Leth inatsisissatut siunnersuummik isornartorsiornerminni allapput.
Siunnersuummut nutaamut atatillugu nalinginnaasumik pisarnertut tusarniaasoqarsimannginnera kattuffiit aamma isornartorsiorpaat - siunnersuutip peqqissaartumik suliarineqannginnerani akileraartarnermut inatsisip nutarterneqarnissaa SIK-p aamma Peqatigiiffiup politikerinut kajumissaarutigalugu.