Akinik misissuineq: Iluanaarniapiluttoqanngilaq
Atuisartoqarnermut unammilleqatigiinnermullu aqutsisoqarfik ulluinnarni nioqqutissat akiinik misissuerrerluni inerneranik nalunaaruteqaqqammerpoq. Misissuisimanerup inernerata ersersippaa Kalaallit Nunarput Danmarkimut Europamullu sanilliullugu aningaasat naleerukkiartornerannik eqqorneqarnikinnerusimasoq, aammalu pisiniarfiit iluanaarniapilussimasinnaanerinik takussutissaqanngitsoq.
Innuttaasut ikigisassaanngitsut piffissami sivitsortumi naammaginnikkunnaariartorput ulluinnarni nioqqutissat akitsoraluttuinnarnerat pillugu kiisalu ikigisassaanngitsut erseqqissaateqartarput akiligassat tamaasa akilereerlugit ulluinnarni inuussutissanik pisiniutissatik ikiligaluttuinnartut.
Taamaattorli atuisartoqarnermut unammilleqatigiinnermullu aqutsisoqarfik, Nunatta Naatsorsueqqissaartarfiata aammalu Europami Naatsorsueqqissaartarfiup Eurostat-ip kisitsisaatai tunngavigalugit ulluinnarni nioqqutissat akiinik misissuisimanermini imatut inerniliivoq:
- Kalaallit Nunaanni akit Danamarkimiit EU-miillu ataatsimut isigalugit annikinneerarsuarmik qaffariarsimapput.
- Kalaallit Nunaanni, Danmarkimi EU-milu nerisassat akii assigiittut ineriartorsimapput.
- Neqit aaliangersimasut pillugit akileraarutip annikillisinneqarnera ersarissumik takusassiarineqarsinnaavoq, taannalu ulloq 1. januaari 2023-mi atuutsinneqalerluni, atuisunut iluaqutaalersimalluni.
- Atorfimmik atornerluilluni imaluunniit Kalaallit nunaanni nerisassat nioqqutissat akiinik aaqqissuussisoqarsimaneranik annertuumik isertitaqarsimanermut pasitsaassisoqanngilaq.
Uani ataatsimut isiginnilluni akit Kalaallit Nunatsinni, Danmarkimi Europamilu qanoq ineriartorsimanersut takusutissiissutigineqarpoq:
Aningaasat naleerukkiartornerat politikkikkut pakkersimaarneqartoq
Atuisartoqarnermut unammilleqatigiinnermullu aqutsisoqarfik naapertorlugu piffissap ingerlanerani politikkikkut aalajangiunneqarsimasut ilai aningaasat naleerukkiartornerisa sunniutaannik pakkersimaarinnissimapput.
Ilaatigut pineqarput ineqarnermut akiliutit nikitsaaliorneqarneri aamma neqinut akitsuutit atorunnaarsinneqarneri, taakkulu saniatigut aamma KNI-ip ukiut arlalissuit ingerlanerini orsussat ikummatissat pillugit isumaqatigiissuteqartarnerisigut akit aalaakkaatinneqarsinnaasimaneri.
Polaroil, ingerlatseqatigiiffissuup KNI-p ataaniittoq, pisussaaffeqarpoq Kalaallit Nunatsinni uuliamik ikummatissanillu pilersuinissaminut kiffartuussinissamut isuamqatigiissut aqqutigalugu ikummatissat imerpalasut akiinik aalaakkaatitsineq ingerlanneqarluni. Isumaqatigiissut taanna 2023-mi naavoq.
Ilaatigut siuliani taaneqartut aqqutigalugit akinik apparsimaarinninniutitut iliuuseqartoqartaraluartoq, atuisartoqarnermut unammilleqatigiinnermullu aqutsisoqarfiup innersuussutigaa Aningaasaqarnermut Siunnersuisoqatigiit akit nikerartarnerat pillugu siulittuisimanerat, tassalu Kalaallit Nunatsinni aningaasat naleerukkiartornerat 2023-2024-mi 7 procentiusinnaasooq, taamaalillunilu akit suli qaffakkiartortussaasut.
Ulluinnarni nioqqutit toqqakkat akiisa ineriartornerat imatut ilusilimmik takussutissinneqarpoq:
