Akit qaffanneri RAL-imut millioninik naleqarsinnaapput
Assartukkanut akit qaffanneqarneri pillugit nalunaaruteqartoqarnerata kingorna, Canadamiut kilisaataatileqatigiiffiit Kalaallit Nunaat aqqutigiunnaarniarlugu isumaliuteqarput.
Canadamiut kilisaataatileqatigiiffii, Arctic Fishery Alliance aamma Baffin Fisheries, ukiut tamaasa pisamit ilaat Kalaallit Nunaanni usingiartarpaat.
Maanngaanniillu Royal Arctic Line (RAL) aqqutigalugu avammut tunineqartarlutik. 2022-p ingerlanerinnaani Canadamiut 40-fods containerit 500 missingerlugit RAL aqqutigalugu assartortippaat. Taakku kaaviiaartitat 10 millionit koruunit assigaat.
Canadamiut umiarsuaatileqatigiiffiisa containerit taama amerlassuseqartut suli usingiartassagunikkit, 4 millionit koruunit missaannik akiliinerusalissapput. Tamannalu qiimmatsaatigineqanngilaq.
- Assartuinermut aningaasartuutinik qaffariaateqarnernut taama annertutigisunut aalisariaaserput nalilersoqqittariaqarparput aammalu ilumut Kalaallit Nunaat aningaasatigut pitsaasuunersoq piujuaannartitsinermullu atatillugu periarfissaanersoq ilumut uatsinnut aqqutissaaginnassanersoq nalilersortariaqarparput, Chris Flanagan, Baffin Fisheriesimi pisortaq oqarpoq.
- Sisimiuni Nuummilu kiffartuunneqarnerput iluarisimaarparput, kisiannili aaliangernissatsinnut aningaasaqarneq annertuumik tunngaviussaaq, pisortaq oqarpoq.
Aamma inuussutissarsiutini allani kaaviiaartitat
RAL-ip Canadamiunit aningaasanik isertitaqarnerisa saniatigut kilisaataasa Kalaallit Nunaanni umiarsualivimmiittarnerini allatigut aamma isertitaqarfiusartut, Sulisitsisut oqaatigaat.
Ilaatigut timmisartumut billetit aamma ineqarneq, pisiniarfinni pisiniarnerit aamma orsernerit kiisalu tassunga atatillugu kalaallit suliffeqarfiutaannut niuernerit aamma kiffartuussinerit.
Kisiannili RAL-miit assartuinermut akitigut qaffariaatigineqartussaq 32%-iusoq nalunaarutigineqareersorlu ingerlatseqatigiiffiit qisuariarput. Ingerlatseqatigiiffiit maanna Kalaallit Nunaanni usingiartarnerup ilumut piujuaannartitsinissamut naleqqunnersoq aammalu aningaasatigut nammineq illersorsinnaanersoq imaluunniit canada talittarfii aqqutigalugit avammut tunisassiorneq ingerlanneqassanersoq eqqarsaatersuuteqarfigissallugit tusagassiortunut nalunaaruteqarput.
Kissaatigisamik ineriartortoqarnissaata akerlianik ingerlasut
Ingerlatseqatigiiffiit Canadap pisassiissutaanik aalisarput, tulaassinissamulli tulattarfiit namminneq aalajangersinnaavaat.
Sulisitsisuniit, ingerlatseqatigiiffiit canadameersunit attaveqartartuaniit attavigineqarsimasumit, RAL periusissiatut pilersaarutaa, nunarsuup sinneranut niuernermut ajornannginnerulersitsillunilu pitsaanerulersitsisussamut tunngaveqarnera, taamatullu Amerika Avannarlermut suleqateqarnerulernissamut Naalakkersuisut annertusaanerat tusaatissatut tiguaat.
- RAL aamma Naalakkersuisut akitigut aaqqissuussamut allannguinissamut aaliangersimanermut kingunissat ernummatigineqarsinnaasunut nalilersuisimanissaat naatsorsuutigisariaqarparput. Kisiannili politikki ingerlanniakkamut assortuinera eqqarsaatersuutigineqarsinnaavoq, aammalu imminut mattunnerulernissarput nunattalu avataaniit aningaasatigut isaatitsiffiusussat unitsinneqarnissaat ernummatissaallutik, Sulisitsisuni pisortaq, Christian Keldsen oqarpoq.