Aktiespellimi kitsisitaappaluttorpassuit
Niuerneq pillugu oqaaseqaatit - sap. ak. 9. AktieSpil 2007-mi sapaatip akunnerani siullermi aktianit peqataasunit 40-it qulingiluaannaat iluanaaruteqarfiupput
Grønlandbankikkut Sermitsiallu ukiumoortumik aktiespillertitsineranni sapaatip akunnera siulleq naavoq. Ukiormanna internetti atorlugu ingerlatsinermut 400-nit amerlanerusut peqataajumallutik nalunaarsimapput.
Peqataasut ukiormanna aktiat 40-it qinaasivissaraat, sapaatillu akunnerani siullermi nuannarineqarnerpaaq tassaavoq A.P. Møller-Mærsk B siuttuusoq, malitsigisungarlugit Grønlandsbanken aamma Danske Bank.
Sapaatip akunnerani siullermi Jens Alstrup Nuummeersoq angusarissaarnersaavoq 2,06 procentinik siuariarsimasoq. Tullersortigaa Frederik Lange Kristensen, Nuussuaq, 1,11 procentinik siuariarsimasoq malitsigalugu Flemming Andersen 1,05 procentinik siuariarsimasoq.
Appariartorpassuit
Sapaatip akunnerani kingullermi silarsuarmi aningaasanik niuerfinni tusarnersunik tusagassaqanngeqqaaq, kinamiut aktiaataat nalikilleriarujussuarmata, Kinami indeks malunnarnerpaaq unnuap ataatsip ingerlanerinnaani 9 procentinik nalikilleriarluni.
Taamaalillutik Europami aningaasanik niuerfiit tamarmik appariarfiulerput, ilaatigut Danmarkimi, Norgemi Finlandimilu pingaaruteqarnerpaat aqaguani 3 procentit sinnerlugit nalikilleriarlutik.
Sapaatilli akunnerata naajartornerani isumalluarneq malunnnarseqqippoq, tallimanngornermi omxc20 1,2 procentiniit 455,59-nut qaffariarlutik.
Vestas aamma FLSmidt tallimanngornermi niuerluarneq iluaqutigalugu qaffarialaavillutik. Aktiat taakku ulluni siuliini appariarnerpaanut ilaasimagaluaramik. Vestas 3,3 procentinut 269,5-inik nalilinnut killilluni. FLSmidt 4,2 procentin ut 376-inik nalilinnut killilluni.
Sapaatilli akunnerani tassani ingerlanerliorneq A.P. Møller-Mærskip aktiaataasa malugivissorpaat. Niuernermi nalitigut 22 milliarder kronit tikillugit annaasaqaramik. Tallimanngornermili 0,87 procentinik qaffariarput nalinullu 58,200-nut killillutik.
Taamatut pisoqartarpoq
Naliliisartut amerlanerpaartaat isumaqarput, aktiat sivisuumik nalittoriartorsimanerisa kingunerisaannik pinngitsoorani taamatut pisoqartariaqarsimasoq.
Isumaqartoqarpoq uuliap akiisa qaffakkiartortuarsimanerisa kingunerisaannik uulia allatut nalilerneqartalersimasoq, tallimanngormallu nappartamut 62 dollareqalersimalluni. Qaffakkiartornerlu taamaassimappat tamanna ilaatigut Vestasip A.P. Møllerillu piffissami aggersumi iluaqutigiumaarpaat.
Sapatip akunnerani 10-mi ilaatigut NKT, Neurosearch, H. Lundbeck, Codan aamma William Demant Holding naatsorssuutiminnik saqqummiussereeriarpata nalunarunnaarumaarpoq taamatut ingerlaneq ataannarumaarnersoq, tamannalu qularnanngitsumik Danmarkimi niuernermut malunniusimagallarumaarpoq.
Naggataatigut qaffalaarneq
USA-mi kisitsisit pingaarnerit sapaatip akunnerani appariarnermut pissutaaqataapput, atuisartut tatiginninnerat 93,5-imiit 91,3-mut appariarsimalluni. Pingaartumik atortorissaarutit iluaqutaasut piumaneqarnerat januarimi malunnartumik 7,8 procentinik appariarsimagami 3 procentiinnaanissaat ilimagineqarsimagaluarluni, tamannalu aningaasaliisartun it malugineqarluarsimalluni.
Sapaatilli akunnerani ullormi kingullermi USA-mi Europamilu pitsanngoriartoqarpoq. USA-mi Nasdaq 1,9 procentinik qaffariarpoq Dow Jonesilu 1,3 procentinik qaffariarluni. Danmarkimi aktieindeks ullormi kingullermi 449,09-mut killippoq. Sapaatip akunnerata ingerlanerani 440,09-miissimagaluarluni.
Aktiespillernermi aktiat sapaatip akunnerata ingerlanerani eqqugaanerlupput aktianillu 40-sunit qulingiluaannaat ajunngitsumik angusaqarlutik.