AktieSpil 2008 – aningaasaqarniarnikkut ajornartorsiornerup tamanna pissanganartorujussuanngortippaa

AktieSpil 2008 piariingajalerpoq. Ukiut qulingiluassaannik taamatut unammineq nuannarineqaqisoq Grønlandsbankenip Sermitsiallu ingerlatilerpaat.

Peqataasussat periarfissaqarput 10.000 koruunit tungaannut eqquinissamut, taakkununnga ilanngunneqassapput spillernerup ingerlanerani eqqugassat allat pilerinartut.

Ullutsinnut tulluarsarlugu spillerneq computeri atorlugu internettikkut ingerlanneqassaaq.

Aktiat 40-t unamminermi atorneqassapput, aamma periarfissaqarpoq ataatsimi aktiat pingasut aamma arfineq pingasut spilleplademi ataatsimi toqqassallugit.

Sapaatit akunnerini arfinilinni unammisitsisoqassaaq.

Aamma ukioq manna aktiat nalingat ullut tamaasa saqqummiunneqartassaaq, taamaalillutik peqataasut aktiat ullormiit ullormut qanoq naleqarnerannik namminnerlu spillernerminni qanoq inissisimanerminnik malinnaasinneqassallutik.

Nalunaarfissaq: 27. oktober

AktieSpil 2008-mi peqataaniartut namminneq nalunaassapput aktianillu toqqaassapput kingusinnerpaamik ataasinngornermi 27. oktober nal. 20.00.

AktieSpil 2008-mut peqataarusulluni nalunaartoqarsinnaanngilaq, imaluunniit toqqaasoqarsinnaanngilaq 27. oktober 2008 nal. 20.00-ip kingorna, tamatumani unammineq aallartereersimassammat.

Piviusorsiorpalaarneruvoq

AktieSpil 2008 siornatigumut naleqqiullugu piviusorsiorpalaarneruvoq, tamannalu aningaasarsiornikkut ajornartorsiornermit sunnersimaneqaqaluni.

Aktiat 40-uusut selskabinut pissanganarluartunut ataasiakkaanut tunngasuupput, Københavnip Fondsbørsiani niuerutaasunut ilaasut, nunallu avannarliit aningaasanik niueqatigiinnerminni suleqatigiiffiannut OMX-imut ilaasuullutik.

Selskabinut pineqartunut ilaapput aningaaseriviit arlaqartut – mikinerillu aamma akunnattut – aamma sillimmasiisarfiit, aningaasarsiornikkut ajornartorsiornerup kinguneranik soqutiginartuusut, A.P. Møller-Mærsk, Danmarkimi selskabit annersaat, aamma Carlsberg, Bang & Olufsen, FLSmidth & Co., Vestas Wind System aamma Novo Nordisk. Grønlandsbanken, Nunatsinnit selskabinit kisiartaalluni børsenimi allatseqqasuusoq, soorunami aamma ilaavoq. NunaMinerals aamma Nordatlantisk Venture aamma ilaatinneqarput.

Aktia pissanganarnerpaaq

Ukioq manna aktiaspillernermi Danske Bankimut tunngasut aktiat pissanganarnerpaanut ilaapput. Aktiat nalingat februar 2007-mi qaffasinnerpaagami naligaa 274, tamatuma kingorna selskabip børsimi nalingata 2/3-ia annaaneqarpoq. Tassunga assersuutigalugu Nunani Avannarlerni unammillertaanerpaasup Nordeap piffissami tassanerpiaq børsenimi nalingata 40 procentiinnaa annaaneqarpoq.

Nunat Avannarliit aningaasaqarniarnerannut naliliinerit ullumikkut qaamavallaanngillat, kisianni apeqqutaavoq Danske Bankip aktiaatigut nalilersuinermi naatsorsuutaareernersoq aningaasaqarniarnikkut ajornartorsiorneq.

Aningaasatigut ajornartorsiornermi aningaaserivinnut pingaaruteqartarpoq suliffimminni ingerlatsineq aningaasartuutillu aqulluarnissaat, Danske Bankillu arlaleriarluni takutittareerpaa pikkoriffigilluarlugu aningaasartuutiminik appasitsitsisinnaaneq. Taamaattumik 2008-mi aningaasartuuteqarnerup 50 procentiuginnarnissaa naatsorsuutigaarput.

Danske Bank aamma pikkorissunik siunertaqarluartumillu ingerlatsisunik aqutsisoqarpoq, arlaleriarlutik uppernarsareerpaat pikkorilluinnartumik pisisarsinnaallutillu aningaaserivik killilersimaartissinnaallugu. Tassani Danske Bankip National Irish Bankimik, Northern Bankimik aamma Sampomik pisinera pissanganarluinnartuuvoq, pissutigalugit:

Aningaasartuutit ataatsimoortinnerisigut malunnaatilimmik periarfissanik pilersitsisinnaaneq

Makroøkonomi tunngavigalugu soqutiginartunik ineriartortitsinissamut periarfissat ingammik Irland aamma Nunat Baltikumimiitut eqqarsaatigalugit

Pigilerneqartut tassaapput Danske Bankip Nunani Avannarlerni aningaaserivitut inissisimaneranik patajaallissaasut, tamatumani niuerfiit ingerlateriikkat akornusinngikkaluarlugit

Danske Bankip IT-kkut suliamik ingerlatsinerata kingunerivaa suliffeqarfiup unammillertiminik pisiortornermigut ataatsimoortitsinermik annertunerusumik iluaquteqarsinnaaneq. Tamatuma kinguneranik Danske Bank annertunerusumik eqqugassaqartitsisinnaavoq, taamaalillunilu periarfissaqarnerulluni, aningaaseriviit kattussuunneranni tamanna pingaaruteqarluarsinnaavoq.

Aningaasarsiornikkut ajornartorsiorneq aktia-spillimut aktianullu qanoq sunniuteqassava

Piffissami qanittumi aningaaseriviit aktiaataat qimerloorniarneqarnerulersut malunnarpoq, tamatumunnga pissutaavoq amerikami aningaasarsiornikkut ajornartorsiornerup kinguneranik børsimi nalingi ukiami 2007-p kingorna appartinneqangaatsiarmata.

Sapaatit akunnerini kingullerni InvestorNyt-imi allaaserineqareersutut aningaaseriviit imminnut tatiginnginnerat aningaasanik niueqatigiinnermi ajornartorsiutaangaatsiarpoq. Tatiginninnginneq Interbankip, aningaaseriviit akornanni niueqatigiinnerup, ajalusoorneranik kinguneqarpoq.

Danmarkimi naalakkersuisut sapaatiummat unnukkut saqqummiuppaat aningaaserivinnut ajornartorsiortunut sillimmasiissuteqarnissamut aaqqissuussineq. Tamatuma kinguneranik qallunaat aningaaserivii DKK 35 milliardinik aningaasaliissapput, taamaaliornikkut aningaaserivinni aningaasanik toqqortaatillit akiliuteqarsimasullu annaasaqannginnissaat anguniarlugu. Aamma tassunga ilaavoq aningaaserivinnut akiliisinnaassuseqartunut atukkiisinnaanermut aaqqissuussineq ukiuni marluugallartuni atuuttussaq, aammattaaq qallunaat aningaaseriviisa &&..

Matuma allannerata nalaani (ping. 8. Oktober) Den Europæiske Centralbank aamma USA-mi, Canadami, Sverigemi, Storbritanniami, Schweizimi, Nunat Aningaaseriviisa erniaat tunngaviusut 0,5 procentimik apparpaat, maannalu pissanngatigineqalerpoq Danmarkimi Nationalbankip aamma taamatut appaanissaa, naak ippassigami (marl. 7. Oktober) erniaanik appaareeraluarluni.

Oqartoqarsinnaalluarpoq aningaasanik niueqatigiinnermi pisorpassuaqartoq. Taamaattumik ukiami aktiaspillerneq soqutiginarluassaaq. Aningaaseriviit aktiaataat 20-30 procentinik qaffassappat? Aningaaseriviit mikinerit akiliisinnaajunnaassappat? Illit sorleq toqqassaviuk?

Ilaaniaruit ugguuna naluanaarsinnaavutit www.aktiespil.gl

Suliffeqarfiit sorliit aningaasaliiffigisinnaanerlugit uani allattorsimanerat takusinnaavat her