Akunnittarfimmik quleriinnik aqqaneq-marlunnik portussusilimmik sananiartoq

Avannaata Kommuniata Ilulissat illoqarfiata qeqqani aqqaneq-marlunnik quleriilimmik akunnittarfiliornissamik pilersaarut akuerissappagu akunnittarfik ukiut marluk pingasulluunniit qaangiuppata naammassineqarsinnaassasoq inuussutissarsiortup Frank Baggerip neriuutigaa.

- Sanaartornissamut qinnuteqaat kommunimut apriilip aallaqqaataani qinersinngitsiarluta Avannaata Kommunianut nassiupparput. Suliniut pilersaarutit malillugit ingerlassappat, sanaartornerlu ingerlalluassappat, akunnittarfik nutaaq 2028-mi ammarsinnaassavarput, Frank Bagger Sermitsiamut oqarpoq.

Qatanngutini Tommy Bagger peqatigalugu annertuumik suliniuteqarpoq — tassa akunnittarfik 6000 kvadratmeterisut angitigisoq 195-inik initalik sanaartorniarlugu.

Suliniummut qinnuteqaat “High North Ilulissat”-mik taaguutilik, sanaartortitsisumit Tankeeraq Ejendomme ApS-imit, qatanngutigiinnit pigineqartumit, nassiunneqarpoq.

Illussanik titartaasarfik Qarsoq akunnittarfiliornissamut siunnersortitut suleqatigissavaat. Frank aamma Tommy Bagger aamma aningaasaliinermik ingerlatseqatigiiffimmik Ilu Investimik Jens Kristian Friis-Salling peqatigalugu piginneqataapput, taannalu Ilulissani Best Western Hotelimik piginneqataavoq.

Suliffissat piujuartitsinermik tunngaveqartut

Frank aamma Tommy Baggerip nunaqavissut amerlanerusut sulilersinnaaniassammata inuiaqatigiinnut iluaqutaasumik suliffissanik pilersitsinissaq pisussaaffimmisut isigimmassuk sanaartortitsisup tassalu qatanngutit inuiaqatigiinnut iluaqutaasumik akunnittarfimmik allamik sanaartorniartut suliniummut qinnuteqaammi, illussanik titartaasarfiup Tankeeraq Ejendomme sinnerlugu kommunimut nassiussaani, atuarneqarsinnaavoq.

- Akunnittarfiup nutaap nukissiuutini sipaarniarnermi najoqqutassiat nutaanerpaat naammassissagai, soorlu ilupaassianik pitsaanerpaamik atuineq neriniartarfiullu piujuartitsilluni igaffia nunaqavissunit tunisassianik atuissasoq, anguniarneqarpoq. Tamanna akunnittarfimmik piginneqataasunut aamma ulluinnarni akunnittarfimmik ingerlatsisussanut anguniagassaavoq, suliniummut qinnuteqaammi ilaatigut allassimavoq.

Qatanngutit Baggerit akunnittarfimmik sanaartornissamik qinnuteqaat kommunalbestyrelsimit akuerineqartinnagu sanaartortitsisumik isumaqatiginninniarnianngillat.

Unnuisut Kangianut isikkiveqassasut

Akunnittarfik Kussangajaaqqami Tankeeqqap orsersortarfiata inissisimaffianiissaaq, tassa Brugsenip Pisiffiullu akornanni.

- 12-inik quleriilinnik akunnittarfiliornitsigut nuna toqqaviusoq atorluarnerusinnaavarput, unnuisussallu Kangianut isikkiveqassapput, Frank Bagger oqarpoq.

Ilulissani takornariaqarnerulermat nunanullu tamalaanut mittarfik nutaaq ammarpat suli amerlanerulernissaat ilimagineqarmat ininik amerlanerusunik pisariaqartitsineq annertusoq, taanna isumaqarpoq.

- Ilulissani takornariat amerlanerulernissaat anguniarlugu akunnittarfimmik initarpassualimmik sanaartornissaq pisariaqarpoq, Frank Bagger oqarpoq.

Nunanut tamalaanut mittarfimmi nutaami, Greenland Airports naapertorlugu 2026-p affaani kingullermi ammarneqartussami, timmisartut ilaasartaatit saniatigut timmisartut attartortittakkat Ilulissanut missinnaanissaannut tunngavissaqartoq takusinnaanerarpaa.

- Immaqa nutaamik akunnittarfiliorutta takornariartaatinik umiarsuaatileqatigiiffiit ilaasut inuttallu siunissami Ilulissani paarlaatsittarniarlugit aalajangerunik aamma inissanik pisariaqartitsissapput, taanna nangilluni oqarpoq.

Akunnittarfik aqqaneq-marlunnik quleriilik sananeqaruni betonit atornagit saviminernik najummisoqassasoq Frankip Tommy Baggerillu pilersaarutigaat.

Qatanngutigiit oqaatigineqareersutut Jens Friis-Salling peqatigalugu aningaasaliinermik ingerlatseqatigiiffimmik Ilu Investimik, Ilulissani Best Western Plusimik, ulluinnarni Hotel Ilulissanik taaneqartartumik 78-inillu initalimmik, piginneqataapput. KJ Greenland Ilulissani qullersaqarfeqartoq akunnittarfimmik 2021-mi maajimi ammarneqartumik sanaartornissaminut suliassinneqarpoq. Akunnittarfik Kangianut oqaluffiullu tungaanut isikkivigissaarpoq.

- Akunnittarfimmik nutaamik sanaartornissamut qinnuteqaatitta kommunalbestyrelsimit tapersersorneqarnissaa neriuutigaarput. Pingaartumik nunaqavissutut aningaasaliisuugatta, Frank Bagger oqarpoq.

Avannaata Kommuniani borgmesteri Lars Erik Gabrielsen, Siumut, oqaaseqartinneqarami suliniut pillugu ilisimasaqarani oqaatigaa.

Akunnittarfiliornissamut qinnuteqaat tamanut tusarniaassutigitinnagu teknikkimut avatangiisinullu ataatsimiititaliamit suliarineqaqqaartariaqarpoq, borgmesteri nassuiaavoq.

- Taamaammat maannakkut suliniut pillugu isummersinnaanngilanga. Piffissanngorpat innuttaasut suliniut qanoq isumaqarfigineraat aamma tusarniassavagut. Akuersippata qularnanngitsumik aamma kommunalbestyrelsimi ilaasortat akuersissaagut, Lars Erik Gabrielsen oqarpoq.