Albatrosip Ilulissani aningaasaliinini unitsikkaa
Takornarianut inatsit nutaaq perulluliuutaasoq Albatros Arctic Circlep Hotel Hvide Falkillu aningaasaliinissamik pilersaarutaannik unitsitsinermik kinguneqarpoq.
Albatros Arctic Travelip akunnittarfiup inissiaasa iluarsaannissaannik pilersaarutini unitsippai – Hotel Hvide Falkip ataani inissiat orangiat, soorlu aamma akunnittarfik allilerlugu inissanik nutaanik sanaartornissamik pilersaarutini unitsikkai.
Albatros Arctic Circle
Takornariaqarnermut
inatsit nutaaq pillugu perulluliortoqarnera pissutigalugu Albatros Arctic
Circlep Ilulissanilu Hotel Hvide Falkip aningaasaliinissartik
unitsikkallarmassuk Albatros Arctic Circlemi pisortaanerup Troels Kristensenip
uggoraa.
PISARTAGAQARTUNUT
Allaaserisaq una Nutaarsiassaqartitsivimmi aviisit naqitat
ilaanni allaaserisaavoq.
Allaaserisat pisartagaqartunit siunissami taamaallaat
atuarneqarsinnaajumaassapput.
Atuarluarna.
- Hotel
Hvide Falkip inissiaatai unnuiffigisartakkat, silataa eqqaatalu
iluarsartuussinerit arlallit ukiaru aallartittussaagaluarput.
Iluarsartuussinissat 15 millionit koruuninik nalillit, Troels Kristensen
oqarpoq.
- Oqaatsuni
illuutit pigisavut nutarterneqarnissaat, kiisalu illuutit H8-p eqqaaniittut,
nunaqarfimmiunit illu sullivittut atorneqartut ineriartortinneqarnissaat aamma
pilersaarutigaarput. Nutarterineq aasap naanerani aallartittussaagaluaq.
Piffissaq
eqqorlugu isumaginninneq
-
Inatsisissatut siunnersuutip nutaap nalorninartorsiortitsinera pissutigalugu
tamakku tamaasa unitsittariaqarpavut. Tamanna ajuusaarutigaarput, aningaasammi
isertitarisavut Ilulissani takornariaqarnermik ineriartortitsinissamut
aningaasaliissutiginissaannut piareersimagaluaratta. Pilersaarutit
unitsinneqarnerat piffissaagallartillugu iliuuseqarneruvoq, naatsorsuinerit
nalorninartorsiornerat akueriinnarsinnaagatsigu, Troels Kristensen nassuiaavoq.
-
Uagutsinnut uggornarpoq minnerunngitsumillu Ilulissanut. Ilulissani
sanaartornermik ingerlatsisut pikkorissut suliamik ingerlatsisussaagaluarput.
Sanaartornermik ingerlatsisut sanaartukkat taakku ukiuunerani
suliariumalluinnarpaat, suliassaqartariaqaramik ukiuuneranilu
suliffissaqartitsisariaqaramik.
Aningaasaliinerup
unitsinneqarnera Ilulissani siunissaq ungasinnerusoq eqqarsaatigalugu
ineriartortinnissaanut aamma sunniuteqassaaq. Albatros Arctic Circlemi Hotel
Hvide Falkip ukiuni aggersuni ininik sanaartornissaq aamma pilersaarutigaa.
-
Akunnittarfiup eqqaani sanaartorfissamik qulakkeerinnippugut – akunnittarfiup
allilerneqarnera Ilulissani unnuiffissanik angallannerpaaffiup nalaani
amerlanerusunik pisariaqartinneqartunik pilersitsisinnaavoq. Inatsit nutaaq
qanoq inerneqarumaarnersoq paasitinnagu pilersaarutit taakku aamma
unitsikkallassavagut. Suliniut 100 millionit koruunit missaannik naleqarpoq,
illoqarfimmilu sanaartortitsisunut suliassarpassuaqalersitsisussaq, Troels
Kristensen oqarpoq.
Aningaasaliineq
annertooq
Albatros
Arctic Circlep Hotel Hvide Falk 2018-imi pisiarinerata kingorna Ilulissani
annertuumik aningaasaliisimavoq. Akunnittarfiup ilua nutarterneqarpoq ilaatigut
neriniartarfik, igaffik ilassinnittarfillu nutarterneqarlutik. Init aamma
nutarterneqarput, silataali suli iluarsartuunneqarani.
Albatros
Arctic Circlep Oqaatsuni illut arlallit 2020-mi tiguai. Ilaatigut
neriniartarfik H8, takornariat nuannarisaat, Kalaallit Nunaannik
piviusorpalaartumik misigisaqarfigineqarsinnaasoq.
-
Takornariaqarnermut inatsit maannakkutut isikkoqartoq atuutsinneqalissappat
ajornartorsiulissagaluarpugut. Kalaallit Nunaanni aningaasaliinivut nunamut
asanninnermik aallaaveqarput. Aningaasat Kalaallit Nunaannit annissorneq
ajorpavut, aningaasalli tamarluinnaasa aningaasaliissutigeqqittarpavut.
Najukkami inuiaqatigiinnut suliffissaqartitsivugut suliassaqartitsillutalu,
taamaattumik isumaqarpugut silatusaarnerunngitsoq Kalaallit Nunaanni
takornariaqarnermut aningaasaliinerit unikaallatsinniarneqarnerat, Troels
Kristensen oqarpoq.
