ALCOA-mi sulisut atugaat SIK-mi siulittaasup tupassutigai
Hondurasimi Alcoap sulisuisa sulinerminni atugaat tassaasut akissarsiat appasissut, naqisimaneqarneq soraarsitsiortornerillu SIK-mi siulittaasumik Jess G. Berthelsenimik aalassatsitsipput.
Jess G. Berthelsenip ALCOA ataatsimeeqattgerusuppaa 2007-mi inuit pisinnaatitaaffiinik suliniaqatigiiffiup National Labour Committeep sulinermi atugassarititaasut pillugit nalunaarusiaani naqissuserneqareersullu, knr.gl allappoq.
- Maani nunami isumaqatigiissutaasut malinneqassapput inuillu pisinnaatitaaffii eqquutsinneqarlutik, Jess G. Berthelsen erseqqissaavoq, Alcoamillu ataatsimeeqqateqarnissi noqqaassutigalugu.
- Nalunaarusiami uparuarneqarpoq sulinik isumaqatigiissutigineqartut eqquutinneqartarsimanngitsut. Soorlu sulisut naqisimaneqartarlutik, inuttut pisinnaatitaaffii unioqqutinneqartuartarlutik perlernaveeqqutinillu akissarsiaqarlutik. Tamanna tupassutigaarput, Jess G. Berthelsen oqarpoq.
SIK-ip maannakkut ersissutigaa Alcoa maani nunatsinni aamma taamatut atugassaqartitsissasoq, Maniitsumi aluminiuliorfissaq piviusunngorpat.
Aamma inuit issittormiut siunnersuisoqatigiivisa ICC-p SIK-misuulli Alcoami sulisut atugaannut tunngasut ernummatigaat.
- ICC-mi SIK-p Alcoap suliffeqarfiutaanni nunarsuarmi tamaniittuni sulisut atugarisaanut tunngasunik ernummateqarnera tamakkiisumik ilalerparput. Suliffeqarfiit nunarsuarmi tamarmi sulisut qanoq iliornertik pillugu nalilerneqartassapput, qanoq neriorsuuteqarnersut pinnagit. Aqqaluk Lynge erseqqissaavoq.