Alcoa pillugu pilersaarut annertuvallaaqaaq
Kalaallit Nunaanni aluminiumimik aatsiteriviliornissamik Alcoap pilersitsiniarneranik akuersissuteqarnernissamut piffissaliussaq annertuvallaarsimavoq, Greenland Developmentimi pisortaq nassuerpoq.
Aluminiumimik aatsiteriviliornissamut aamma tamatumunnga atatillugu erngup nukianik nukissiorfinnik marlunnik sanaartortoqartussaassaaq, taakkununngalu katillugit 23 mia. koruunit tikillugit aningaasaliissutigeneqartussaapput, tamatumunnga tunngatillugu politikerit ilisimasaqarnissaminnut aamma kingunerisassaanut tunngavissaat annikippallaarput.
- Inatsisartut 2010-mi aasakkut ataatsimiinnissaannut aalajangiinissaq Inatsisartut kinguartippaat, tassani pineqarpoq Kalaallit Nunaat piginneqataassanersoq imaluunniit piginneqataassannginnersoq, kinguartitsinermut pissutaavoq aalajangiinissamut patajaatsumik tunngaveqarnissaq kissaatigineqarmat, tassa taamatut niuernerup pitsaasuuneranut, pitsaannginneranut imaluunniit nalorninartuuneranut tunngatillugu, Flemming Drechsel dagbladet Børsenimut oqarpoq.
Pissutaasut pillugit imatut oqarpoq:
- Suliummut tunngatillugu naatsorsueqqissaarnerit paasiniaaqqissaarnissat Kalaallit Nunaanni misigisimanngisaannakkatsitut qaffasissuseqartut pisariaqarnerat. Uagut sulinerup ingerlasimanera assut iluarisimaarparput. Kingumulli qiviaraanni piffisamut pilersaarut annertuvallaarsimavoq, pisortaq oqarpoq, taassuma suleqataasut tallimat aamma suleqatigisat avataaneersut peqatigalugit suliniummut aamma inuiaqatigiinni aningaasaqarniarnermut tunngasut naatsorsueqqissaarnerit misissueqqissaarnerillu kiisalu innuttaasunik paasisitsiniaanerit nalinginnaasut ingerlappaat, Alcoamik ingerlanneqarput asimi misissuinerit.
Annertuumik akerliuneri, mianersoqqusinerit aamma misissuinerni kinguaattoornerit pissutigalugit Inatsisartut aalajangersimapput, amerikarmiunik Alcoamik aluminiumimik aatsiterivimmik 23 mia. koruuninik aningaasartuutitaqartussamut piginneqateqalernissamut aalajangiinissaq, kinguartinniarlugu.
Tamatumunnga taarsiunneqarsinnaasoq tassaavoq sullissinissamut isumaqatigiissuteqarneq, kisianni tamatumunnga Alcoa pinaaserpoq.