Alcoamut suliaq eqqummitsumik paasissutissiissutigineqarpoq
Sulisussat nunanit allaneersut naalagaaffeqatigiinnerullu iluani inuussutissarsiutitigut pilersaarutit annerpaartaanni mingutsitsineq pillugit inuutissarsiornermut aatsitassanullu naalakkersuisoq eqqunngitsumik paasissutissiivoq
Inuutissarsiornermut aatsitassanullu naalakkersuisoq Ove Karl Berthelsen aluminiumik aatsitsiviliassaasinnaasoq pillugu marloriarluni eqqunngitsumik paasissutissiivoq.
Tamanna paasissutissanik misissuinermi Sermitsiamit ingerlanneqartumi takutinneqarpoq
Pisuni taakkunani marlunni paasissutissanik eqqunngitsumik saqqummiussisoqarpoq, taamaalillunilu Amerikamiut suliffeqarfiat Alcoa suleqatigalugu pilersaarusiaq sanaartorneqaruni 15-20 milliarder koruuninik akeqartussaq tunngavissaasuninngarnit isumalluarnarnerusumik inissisimalersillugu. Eqqunngitsumik paasissutissiinerit ingerlatsinerup nalaani nunanit allaneersunik sulisoqarnissap ilimanassusaanut Maniitsullu eqqaani aatsitsiviliassaasinnaasumit mingutsitsineq pissutigalugu CO2-mik aniatitsisinnaatitaanermut akuersissutinut aningaasartuuteqarnissamut aarlerinaatinut attuumassuteqarput
– Tamanna tulluanngilaq, NGO-mi Inuit Issittormiut Siunnersoqatigiiffianni avatangiisinut tunngasuni siunnersorti, Parnuna Egede, isumaqarpoq.
– Aluminiumik aatsitsivissaq pillugu kisitsisit paasissutissallu piviusut akuleriissinneqarfigisaannik naalakkersuisut oqaaseqaateqartarnerat takornartaajunnaariartorpoq, Siumut sinnerlugu Inatsisartunut ilaasortaq aatsitassanullu ataatsimiititaliamut ilaasortaq, Akitsinnguaq Olsen, oqarpoq.
ilisimatusarfimmi Nordregiomi ilisimatooq 2006-miillu 2011-mut Namminersorlutik Oqartussani pisortaqarfimmi pisortaasimavoq Klaus Georg Hansen isumaqarpoq inuutissarsiornermut aatsitassanullu naalakkersuisoq taamatut inissisimalersimasoq Siumukkut 2009-mi naalakkersuisuutitaqarneranni pilersinneqartumik. Siumut Atassullu avoqqaarai Maniitsup eqqaani aatsitsiviliornissamik annertuallaamik piviusorsiunngitsumillu isumalluarsimasutut.
– Taamaattumik naalakkersuinikkut ajornakusoorsinnaavoq neriuummik taamaattumik piviusorsiungnitsumik qamitsinissaq, naak tamanna Maniitsormoirpassuarnit isumalualersitsigaluartoq, Klaus Georg Hansen oqarpoq.