Alcoap suliniutaata sanaartorneq unittoortissinnaavaa
Taamatut isumaqarpoq Kalaallit Nunaanni Sulisitsisut Peqatigiiffiat, taassumalu ullumi Inatsisartut Alcoamut ataatsimiititaliaannik taaneqartoq ataatsimeeqatigaa. Alcoamut ataatsimiititaliap inatsisartut sinnerlugit Alcoap suliniutaa malinnaavigissavaa, taamatut allappoq GA.gl.
Ataatsimiinnermi aluminiumik aatsitsivissami Namminersornerullutik Oqartussat piginneqatigiissagunik milliardilinnik aningaasaliissuteqarnisssaannik qularnartoqartitsinini GA-p itisilerpaa. GA-p siusinnerusukkut Inatsisartunut allakkatigut ammasukkut mianersoqqussutigisimavaa pisortat peqataaniarnerisigut politikkikkut aningaasatigullu iliuuseqarnissamik kiffaanngissuseqarneq annikillisarneqarsinnaasoq, Maniitsullu avataani ineriartorneq unitsillugu.
Misissuinikkut, GA-mit ingerlanneqartukkut, takuneqarsinnaavoq sanaartornermik ingerlanniakkat 89 procentii angullugit unitsinneqassapput aningaasarsiornikkut politikkimi akuleruttoqarnera pissutigalugu, taamaasiortoqartariaqassammat milliardilinnik taarsigassarsinikkut, Landskarsip piginneqatigiinnissamut taarsigassarsiarisariaqagaatigut, aningaasarsiornerup kissappallaartuunnginnissaa pinngitsoorniarlugu.
– Isumaqarluinnarpugut inuussutissarsiornermut pisortaqarfik aamma/imaluunniit Greenland Development iluamik piareersarsimanngitsut. Aalajangiinissamut tunngavik apeqqutissarpassuaqarpoq akissutissaqanngitsunik apeqqutinik amerlanerusunik pilersitsiinnartunik. Taamaattumik sakkortuumik mianersoqqussutigissavarput maannakkorpiaq kalaallit piginneqataanissaannut aalajangiisoqassanngitsoq. GA-p isumaa malillugu tamanna akisussaanngitsuliornerussaaq. Misissuinerit amerlanerpassuit ingerlanneqartariaqarput, naggataatigullu minnerunngitsumillu pilersaarut annertunerujussuarmik ammaffiussaaq.
– Suliniutip aningaasaqarniarneranut atatillugu oqartariaqarpugut suliniut ppitsaasorujussuusariaqartoq qularnaatsorujussuusariaqarlunilu, Namminersornerullutik Oqartussanut piginneqataaneq akilersinnaassappat. Greenland Developmentillu siusinnerusukkut oqaatigisimavaa ukiut 15 - 20-t aatsaat qaangiuppata aningaasaliissutit iluanaaruteqartitsisalissapput. Taamaattumik Alcoap suliniutaa aningaasarpassuarnik pisariaqartitsisoq Landskarsimut aningaasaliiffigissallugu pitsaasuunngilaq. Akerlianik niuerneq qularnartoqartorujussuussaaq, GA-p pisortaa Henrik Leth tallimanngormat ataatsimiinnermi oqarpoq.