Allamiut nakkutiginerullugit
Kilisaatit nunanit allaneersut nakkutigineqarnerat sukannernerulersinneqassasut nunat aalisartoqarfiusut isumaqatigiissutigaat.
Atlantikup avannaata kitaani aalisarneq pillugu suleqatigiiffimmi (NAFO-mi) nakkutilliinermik komitiip ulluni 1.-3. julimi Nuummi ataatsimiinnerani Kalaallit Nunaat siullermeerluni ataatsimiinermik ingerlatsivoq
Atlantikup avannaani 200 sømilinik killeqarfiup avataani NAFO aalisarnermik malitattarisassiortuuvoq nunanit makkunannga Canada, Cuba, EU, Frankrig, Færøerne, Island, Japan, Norge, Rusland, Sydkorea, Ukraine aamma USA kiisalu Savalimmiut aamma Kalaallit Nunaat Danmarkip ilaasortaaneratigut peqataapput.
Nunat allamiut aalisartuinik nakkutilliinerminnik annertusisitsinissaq NAFO-mi ilaasortanit aalajangiunneqarpoq. Pilersaarutaavoq inatsisinik unioqqutitsilluni (unioqqutitsisumik, nalunaaruteqartarani aamma aqunneqanngitsumik) aalisarnerup UUI-mik taaneqartartup pitsaaliorneqarnissaa. Inatsisinik unioqqutitsisumik aalisarneq ukiorpaalunni ajornartorsiutaavoq, nunallu tamalaat akornanni aaqqissuteqarnissamik pisariaqartitsisoqarluni.
- Nuummi ataatsimiinneq pitsaasumik siunertaqarnermi alloriarneruvoq pingaarutilik aamma nunarsuup affaani kujallermi nunani amerlasuuni isumassarsiffiusoq. Tunup avataani Irmingerhavimi unioqqutitsisumik suluppaagarniarneq atugaajunnaarsimavoq, nanoq.gl allappoq.