Amerikamiut aatsitassarsioqatigiiffiata Tanbreez pisiariniaraa

 OBS: Aatsitassanut naalakkersuisoqarfiup paasissutissanik amerlanerusunik tunniussaqarnerani allaaserisaq tallimanngornermi 14. juni nutarterneqarpoq.

Amerikamiut aatsitassarsiornermik ingerlatseqatigiiffiata Critical Metals Corpip Australiamiut suliffeqarfiutaat Tanbreez, 2020-mi Kujataani Killavaat Alannguani 18 km2-mik annertutigisumi aatsitassanik qaqutigoortunik piiaanissamut akuerineqartoq, isumaqatigiissusiorfigaa. Tamanna tusagassiuutinut nalunaarummi, Critical Metals Corpip ataasinngornermi juunip qulingani nassiussaani atuarneqarsinnaavoq.   

– Tanbreez aatsitassanik qaqutigoortunik kitaanut piiaanissamut suliniutaavoq “allanngortitsisoq” aamma Critical Metals Corp aatsitassanik qaqutigoortunik tuniniaasutut nuimasutut inissinnissaanut alloriarneruvoq pingaarutilik, nunani arlalinni assigiinngitsunik suliniuteqarluni. Tanbreezip pisiarineratigut Europami niuernikkut attaveqaatitsinnik tapersersuinissamut periarfissaqalissaagut, Amerikallu avannaani niuernermi periarfissarsiussalluta. Politikkikkut siuariartornerup naalagaaffiullu tapiissutaasa aatsitassanik pingaaruteqarluinnartunik, mingutsitsinngitsumik ineriartortitsinissamut pingaaruteqarluinnartunik, piumasaqartitsilernerat iluaqutigalugu suliffeqarfik suli ingerlalluarpoq,“ suliffeqarfimmi pisortaaneq siulersuisunilu siulittaasoq Tony Sage oqarpoq. 

Siulersuisoqatigiinni ilannguttut 

Tanbreezimik pilersitsisup pisortaasullu Greg Barnesip isumaqatigiissut Sermitsiamut uppernarsarpaa, naak suliffeqarfiup nioqateqartutut isiginngikkaluarlugu kisianni aatsitassarsiorfimmik piiaanissamik suliniummik nangitsisoqarsinnaanermik periarfissatut pisoqartoq taassuma eqqaavaa.   

– Piiaaffeqalernissamik aningaasaliisinnaanngorluta isumaqatigiissusiorallarpugut. Critical Metals Corp-ip Tanbreezip 92,5 procentia pigilissagaa pilersaarutaavoq. Suli suliassaqarpoq, kisianni ingerlalluarpugut tamannalu Kalaallit Nunaannut iluaqutaavoq, Greg Barnes oqarpoq, Taassuma Tanbreezip Kalaallit Nunaanni suliniutaani pisortaq Bolette Nielsen peqatigalugu Critical Metals Corpip siulersuisuini ilanngupput. 

1,5 milliardit koruunit 

Paasissutissat naapertorlugit Critical Metals Corp-ip suliniummut atatillugu 211 millionit dollarsit missiliorlugit, tassa 1,5 milliardit koruuningajaat, akilissavai.   Critical Metals Corp. Kalaallit Nunaanni ilisimaneqanngilaq, kisiannili suliffeqarfik USA-mi børsimi Nasdaq-mi nalunaarsorneqarsimavoq. Europami nunallu sinnerani suleqatiminnik innaallagissiornermut mingutsitsinnginnerunissamut saffiugassanik aatsitassanik pingaarutilinnik tuniniaanermi siuttuullutik namminneq nittartakkaminni allapput. Suliffeqarfissuup Østrigimi Wolfsberg Lithium Projekteti suliniutaasa ilagaat.

Aatsitassanut inatsit naapertorlugu suliffeqarfik suliffeqarfimmut allamut toqqaannartumik toqqaannanngitsumilluunniit nuunneqartussaatillugu, piumasaqaataavoq Naalakkersuisunit tamanna akuerineqaqqaassasoq. Aatsitassanut naalakkersuisoqarfik ilisimatitsivoq isumaqatigiissut misissoqqissaarneqartussanngorlugu piumasarineqarsimasoq.