Angallassinermi nutaanik isumaqatigiissuteqarnissaq kommunit piumasaraat

Kommuneqarfiit kattuffiata Kanukokap, Kommuneqarfik Sermersooq kisiat pinnagu kommuninit tamanit ilaasortaaffigineqartup, angallassinermi kiffartuussinissamik isumaqatigiissutit nutaat isumaqatiginngilai. Isumaqatigiissutit ukiortaamiit atuutilissapput.

Isumaqatigiissutini nutaani umiarsuarnik angallassinerulernissaq siunniunneqarpoq, suli helikopterinik tapertaqartillugu - tamannalu pingaartumik Kujataani annertuumik akerlilerneqarpoq.

Kanukokap nalunaaruteqarnera tupaallannartoqanngilaq, tassami borgmesterit arlallit isumaqatigiissutit nutaat isornartorsioreermatigit.

Eqqunngitsumik paasissutissiisut
Kanukokap siulittaasuata Simon Simonsenip tusagassiorfinnut nalunaarutikkut Naalakkersuisoq akisussaasoq Knud Kristiansen, Attaveqarnermut Naalakakersuisoqarfik kiisalu angallassinissamik isumaqatigiissuteqarfigineqartut allat pasillerpai eqqunngitsunik ataqatigiinngitsunillu paasissutissiinerarlugit.

Kukkunilik
– Ilaasunik angallassinermi innuttaasunik sullissinissamut tunngavissaq taama tukatsigisoq kukkuneqartigisorlu akuersaarsinnaanngilluinnarparput. Naalakkersuisullu kajumissaarpavut isumageqqullugu kiffartuussinermut isumaqatigiissutinik nutaanik suliaq aallartinneqassasoq, aammalu suliami tamatumani kommunit innuttaasullu akulerutsinneqassasut, taanna erseqqissaavoq.