Angutit Namminersorlutik Oqartussat suliffeqarfiutaanni aqutsisoqarnikkut suli amerlanerussuteqartut

Arnat sulisartut ilinniagartuullu ataatsimut isigigaanni amerliartuinnarput, qaffasinnerusumilli atorfillit eqqarsaatigigaanni suli ikinnerussuteqarput.

Tamanna Naalakkersuisut Suliffeqarnermut Nalunaarusiaanni 2024-mut tunngasumi, Namminersorlutik Oqartussat suliffeqarfiutaanni aqutsisuni siulersuisunilu arnat angutillu agguataarsimanerannik qulaajaanertalimmi, erserpoq.

Siulersuisuni arnat angutillu agguataarsimanermikkut naligiinneruleriartuinnartut, aammali angutit suliffeqarfiit ulluinnarni aqutsisoqarfiini suli amerlanerussuteqaqisut, kisitsisit saqqummiussat takutippaat.

- Tabeli 7-ip takutippaa, siulersuisuni suiaassuseq malillugu agguataarnerat assigiittoq. Pingaarnertut isigalugu Namminersorlutik Oqartussat suliffeqarfiutaanni siulersuisut katitigaanerat pillugu oqaatigineqarsinnaavoq, 54 %-ii angutaasut aamma 46 %-ii arnaasut.

Suliffeqarfiilli aqutsisuini aqutsisoqatigiivinilu allatut isikkoqarput. Taakkunanimi arnat angutillu agguataarsimanermikkut naligiinngilluinnarput:

- Kisianni aqutsisuni aqutsisoqatigiinnilu malinnaaneq ajulerput, tassani Namminersorlutik Oqartussanit suliffeqarfiit pigineqartut angutiniit aqunneqarnerummata. Agguataarneq imaappoq: 71 %-ii angutaapput, 29 %-iilu arnaapput.

Angutit akissarsiaqqortunerusut

Suliffeqarfinni arnat angutillu akissarsiaat naleqqersuukkaanni, akissarsiatigut suli nikingasut erserpoq. Ataatsimut isigalugu angutit arnaninngarnit akissarsiaqqortunerupput, arnallu assigiimmik aamma ilinniagaqarsimasuugaluaraangataluunniit.

Tassa angutit arnallu ilinniagartuut akissarsiaqqortunerugaluartut, taakkua akissarsiatigut nalunanngivissumik assigiinngissuteqartut, Naalakkersuisut Suliffeqarnermut Nalunaarusiaanni 2024-mut tunngasumi erserpoq:

- Ilinniakkamik tunuliaqutinut tamanut ersarissumik atuuppoq arnat akissarsiaat angutininngaanniit appasinnerummata, tassungalu pissutaasut arlaqarsinnaasut ilimanarluni, nalunaarusiami allassimavoq.

Ilaatigut angutit aalisarnermik inuussutissarsiutillit amerlanerussuteqarnerat taakkualu taamaammat akissarsiaqqortunerukkajunnerat arnallu isumaginninnermik suliallit amerlanerussuteqarnerat taakkualu taamaammat akissarsiakinnerunerat pissutsit taamaannerannut sunniuteqaqataasuusut oqaatigineqarpoq.