Aningaasaateqarfik aalisarnermi aningaasaliinissamik isumaliutersuuteqartoq
Aalisarnermut inatsisissami siunniunneqarpoq inuussutissarsiutip piginneqataaffigineqarnera siammarniarneqassasoq, soraarnerussutiisiaqartitsivillu SISA nunatsinni aalisarnerup iluani aningaasaleeqataanissamik siunnerfeqassaguni qulaajangassat arlaqarput.
SISA Pension nunatsinni aalisarnermi aningaasaliisinnaanermik soqutiginnittoq, SISA-mi pisortaaneq Søren Schock Petersen Sermitsiaq.AG-mut ilisimatitsivoq, aammali pissutsit aalajangersimalluinnartut tunngaviusariaqartut oqariartuuteqarpoq.
- Tamatumani tunngaviliisuulluinnassaaq aningaasaliissuteqarnerup aarlerinaataa aningaasaliinermilu iluanaaruteqarnissamut naatsorsuutit oqimaaqatigiinnissaat. Tamanna isumaqarpoq aningaasaliissuteqarnissamut periarfissat saqqummiunneqartut pillugit nalilersuinerit sukumiisut ingerlattariaqassagigut (due diligence), pisortaaneq oqarpoq.
Aarlerinaateqarsinnaasunik siaarsineq
Taassuma ilanngullugu erseqqissaatigaa soraarnerussutisiaqarnermi suliffeqarfiup "aningaasaliissutit katinneranni annaasaqarnissamut aarlerinaatip siaarluarnissaa isumagineqartariaqartoq".
Taassuma oqaatigaa inatsisissatut siunnersuutip suliarineqarnera sivisungaatsiarsimasoq, aammalu "inatsisissatut siunnersuutip allannguutissai akuerineqartussat SISA-p utaqqigallassagaa".
- Soraarnerussutiaqarnermut suliffeqarfimmi aningaasat aningaasaliinernut atorsinnaasut aalisarnerup iluani qanoq agguataassanersut siulersuisut suli aalajangiiffiginngilaat, ilisimatitsivoq.
Inatsisissami oqaaseqaatit
Aalisarnermut inatsisissatut siunnersuummi, maanna tusarniutigineqartumi, Naalakkersuisut oqaaseqaammi ima allapput:
”Inatsisissatut siunnersuutikkut soraarnerussutisiaqalernissamut aningaasaateqarfiit aalisarnermi aningaasaliinissamut periarfissinneqarput. Taamatut pisoqarpat tamanna qularnanngilluinnartumik piginnittuunerup ilumut siaruarneranik kinguneqassaaq. Umiarsuaatileqatigiiffiup imaluunniit inuup ataatsip pisassiissutinut qummut killiliussatigut piumasaqaatinik naammassinninneranik naatsorsuineq pillugu aalajangersakkamut toqqaannanngitsumik piginnittuuneq ilaavoq, tassa imaappoq ingerlatseqatigiiffik/umiarsuaatileqatigiiffik pineqartoq pisassiissutinik pigisanik umiarsuaatileqatigiiffiup alla pigisaasa ilaanik piginnippat, piginneqataassutinik tunniussisoqartussaassaaq. Piginneqataassutit taakku niuerfimmi ammasumi tuniniarneqarsinnaassapput, aalajangersakkat nutaat malillugit aamma soraarnerussutisiaqalernissamut aningaasaateqarfiit ilaallutik."
2022-mut nalunaarummi SISA Pension allappoq suliffeqarfik 4,7 milliardit koruuninik aningaasaateqartut, aqutsisullu nalunaarummi allapput, suliffeqarfik "nuna tamakkerlugu aningaasaliinissamik periarfissarsiussasoq". Aammali erseqqissaatigineqarpoq:
Allanngujuissuseq pisariaqartinneqartoq
- Taamaattorli aammattaaq paasivarput Kalaallit Nunaanni aningaasaliisarnerit pillugit politikkikkut nalornisoqartoq. Piffissaq ungasinnerusoq eqqarsaatigalugu aningaalii- sartutut SISA-mit pisariaqartinneqarpoq politikkikkut piffissaq ungasinnerusoq eqqarsaatigalugu pilersaaru- siortoqarnissaa atituumik isumaqatigiissuteqarnikkut, naalakkersuinikkut allanngortoqaraangat allanngortus- saanngitsunik, nalunaarusiami allassimavoq.