Aningaasaqarnermut ataatsimiititaliap KNI-mik isumaqatigiissut naaggaarpaa
Inatsisartut aningaasaqarnermut akileraartarnermullu ataatsimiititaliaani amerlanerussuteqartut naalakkersuisut KNI-mik kiffartuussinissamut isumaqatigiissutissatut siunnersuutaat itigartippaat
Naalakkersuisut namminersorlutillu oqartussat niuernikkut suliffeqarfiutaa kiffartuussinissamut isumaqatigiissutaani nunaqarfinni isorliunerusunilu niuernerpalaartumik ingerlatsinissamut tunngavissaqanngitsuni nioqqutissanik pilersuinissamik tunngasuuvoq.
Kiffartuussinissamut isumaqatigiissut 2012-miit 2016-imut atuutussaavoq.
Aaqqiagiinngissutaavoq niuertarfiit arlaqartut siunissami sivikinnerusumik ammasalernissaat, niuertarfinnilu taakkunani inuussutissaanngitsunik nioqquteqartoqarunnaassalluni soorlu pinngussat, tv-t qarasaasiallu. Taakku nittartagaq aqqutigalugu imaluunniit niuertarfinni pisiarineqartalissapput.
Ataatsimiititaliami amerlanerussuteqartut tassaasut Inuit Ataqatigiit, Siumut Atassullu ernumassutigaat niuertarfinni atugassat ima kinguneqassasut allaat inuussutissaanngitsut nalinginnaanerpaat soorlu igaffimmi atortussat meeqqallu atisaat piniutillu nioqqutigineqarunnaarsinnaanerat.
Ataatsimiititaliami aamma ernumassutigineqarpoq ammasarfiit annikillineranni atuisut sakkortuumik eqqorneqassasut.
- Maannakkut kiffartuussinissamut isumaqatigiissutissatut siunnersuummi inuit pisinnaatitaaffii unioqqutinneqartussaapput, nunaqarfinnimi isorliunerusunilu innuttaasunik kiffartuussineq ajorseriartussaavoq illoqarfinni innuttaasut atugaannut naleqqiullugit, aningaasaqarnermut akileraartarnermullu ataatsimiititaliami amerlanerussuteqartut isumaqarput.
KNI-mit kissaatigineqarpoq siunissami Pilersuisup niuertarfii 66-it immikkoortunut tallimanut immikkoortinneqarnissaat, ammasarfiit nioqquutissallu illoqarfinni mikinerusuni nunaqarfinnilu aningaasaqarnikkut pissutsinut tulluarsagaanerullutik.
Sermitsiaq normu 51-mi KNI-p siunissamut pilersaarutai annertunerusumik atuakkit. Aamma aviisi uani pisiarisinnaavat.