Aningaasaqarnermut Siunnersuisoqatigiit coronamut periusissiortoqarnissaanik ujartuisut

Aningaasaqarnermut Siunnersuisoqatigiit Nunatta aningaasaqarnera pillugu nalunaarusiaminni kingullermi tuniluuttoqarnerata piffissami sivisuumi sunniuteqarsinnaanera sammisimavaat, tamannalu aningaasaqarnikkut imminut napatinnerunissamik suliaqarnermut pingaaruteqarsinnaavoqi.

Siunnersuisoqatigiinnit oqaatigineqarpoq, nunarsuarmi tuniluuttoqarnera siullermik naatsorsuutigisamit sivisunerusoq, akiuussutissalersuinerli isumalluartitsivoq.

- Nunarsuarmi tuniluuttoqarnerata takutippaa tuniluunnerup qanoq sukkatigisumik nunarsuarmi siaruaassinnaanera, coronallu allanngorarneranut peqatigitillugu ”inuuneq nalinginnaasoq nutaaq” imaluunniit ”tuniluuttoqaannavissinnaanera” pillugit oqallittoqarneruleriartorpoq, tamatumunnga atatillugu tuniluuttoqaqqilersinnaanera sungiunniartariaqarparput, Siunnersuisoqatigiit peqqissutsimut atatillugu pisinnaasunik pingasunik nalunaarusiaminni eqikkaasimasut allapput:

Pisinnaasut pingasut

Nalinginnaasumik inuuneqaleriartortitsineq: Tuniluunneq siammatsaaliorniarlugu akiuussutissalersuineq. Tuniluunnerup nunarsuami akiorniarneqarnera sivisusinnaagaluartoq, angalasinnaanermut killilersuinerit annerulersinneqarsinnaapput, taamaattoq piffissami sivisunerusumi misissortittarnissamut/akiuussutissalertissimanermut uppernarsaateqarnissamut piumasaqaatitaqartumik. Taamatut pisoqarsinnaaneranut atatillugu eqqiluisaarnissamut suliniuteqartoqarnissaa il.il., nakkutilliisoqartarnissaa, akiuussutissaleeqqittarnissaq suli pisariaqartinneqassapput. Nunarsuarmi tuniluuttoqarnera immikkut ittunik malittarisassaqarnermik piumasaqaatitaqarsinnaavoq (angalanissamut killilersuutit assigiinngissitaartut).

Sukkut tamaana tuniluuttoqalersinnaanera: Qanoq sukkatigisumik akiuussutissalersuinerup assigiinngitsuunerata virusillu allanngorarnerata maligitsigisaannik ”sukkut tamaana tuniluuttoqalersinnaavoq”, taamalu piffissami sivikinnerusumi/siunnerfeqartumik angalanissamut killilersuisoqarlunilu matusisoqartariaqartarluni.

Ataavartumik tuniluuttoqarnera: Virusip allanngorartuarneratigut akiuussutissat naleqqussartuarneqartariaqassapput innuttaasullu akiuussutissaleqqinneqartariaqartassallutik. Nunarsuarmi sumiiffinni assigiinngitsuni tuniluuttoqaqqilertassaaq, taamaammallu angalanissamut killilersuisoqartariaqartassalluni aamma nunami tamarmi, nunat immikkoortuini najukkaniluunniit matusisoqartariaqartassalluni.

Siunnersuisoqatigiinnit pisinnaasunit sorleq ilimanarnerpaanersoq oqaatigineqarsinnaanngilaq, ”piffissamili qaninnerusumi pissutsit nalinginnaasunngoqqinnissaat ilimananngimmat, pisinnaasut assigiinngitsut isumagineqarsinnaaniassammata periusissiortoqarnissaa pisariaqartoq”, nalunaarusiami erseqqissaatigineqarpoq.

Peqqinnissatigut periusissiaq

Siunnersuisoqatigiinnit oqaatigineqarpoq, misissortittarnissamut, tunillatsissimasunik ujaasisarnissamut, mattusimasarnissamut il.il. atatillugit peqqinnissatigut periusissiaqarnissaq pisariaqartoq.

- Angalanissamut killilersuinissat isummerfigineqassapput; qaqugukkut allartinneqassappat aamma suut piumasaqaataappat. Tassunga atatillugu pingaaruteqarpoq, akiuussutissalertinnissamut (akiuussutissalertissimanermut uppernarsaat), misissortittarnissamut immaqalu mattusimasarnissamut piumasaqaateqarnissap erseqqissaatigineqarnissaa, aamma nunap immikkoortuini sumiiffiit tunngavigalugit assigiinngisitaartunik piumasaqaateqartoqassanersoq (angalariaatsit, nunanut allanut angalanissat) siunertallu (suliffeqarfiit/takornariartitsineq/nammineq inuttut), siunnersuisoqatigiit nalunaarusiami allapput.

Siunnersuisoqatigiinnit erseqqissaatigineqarpoq, nunami maani annikinnerusunik matusisoqartarsimasoq, taamalu nunanit allanisuulli misilittagaqalerpallaartoqarsimanani. Internetsikkut ”piffissami sivisuumi suliaqartoqartarnissaa” pisariaqartinneqaleriartuinnassasoq naatsorsuutigineqartariaqarpoq, tamannami aningaasartuuteqarpallaarani ingerlanneqarsinnaavoq, akerlianilli internetsikkut suliaqarneq najukkani innuttaasunut iluaqutaavallaassanngilaq.

Digitaliseeriinerusoqartariaqartoq

Aningaasaqarnermut Siunnersuisoqatigiit peqatigitillugu erseqqissaassutigaat, nunarsuarmi tuniluuttoqarnera eqqarsaatigalugut digitaliseeriinerusoqartariaqarnerata pingaaruteqarneranut pissutaasut arlaqartut.

Siunnersuisoqatigiit tassunga atatillugu qitiutippaat ilinniartitaanikkut, takornariartitsisarnikkut aatsitassarsiornikkullu nunami siammasinnerusumik inuussutissarsiuteqartoqarnissaata qulakkeerneqarnissaa.

Takornarialerisunut atatillugu oqaatigineqarpoq, takornarialerinermik inuussutissarsiuteqartunut tapersersuinissamut tunngavissaqarluartoq taamalu takornariartitsinermik inuussutissarsiuteqarneq qulakkeerneqarluni.

Aningaasaqarnermulli Siunnersuisoqatigiit aamma mianersoqqutigaat:

-… aappaatigulli Covid-19-ip nunarsuarmi tuniluutilinnginnerani pissutsit tunngavigalugit ikiorsiissuteqarnissaq piviusorsiortuunngilaq, coronap siunissami atuussinnaanera pillugu nalunaarusiami allassimavoq.

Aamma atuaruk: Nunatta Karsiata aningaasaqarnera ajutoorsinnaavoq