Aningaasarsiat qaffannissaat SIK-p ilassilluarpaa
Sulinermik Inuussutissarsiuteqartut Kattuffiat isumaqarpoq sulisitsisut peqatigiiffiat annilaangasaarisoq tikisitassanut piumasaqaatit sakkukillissaqquinnarlugit.
- ALCOA aluminiumimik aatsitviliornissaanut atatillugu Sulisitsisut peqatigiiffiat GA sinnerlugu pisortaq Henrik Leth aningaasarsiat pisissutaasinnaanerat annikilleriassasoq aammalu SIK-mi ilaasortatsinnut annermik tamanna eqquissasoq ersisaarutigalugu avammut suaaruteqarpoq.
- Pisarnermisulli GA ersisaaraluni aallartilereerpoq siunertarli ersarissisoq tassaaginnarpoq: GA-p kaasarfimminnut manngussuutassatik salliu-tippaat taamaattumillu Nunatta avataaniit suliartortussat killilersimaarneqarnissaat pillugu inatsit aamma qasukkartiteqquaat sulisartunik, qularnanngitsumik kangiamiunik akikinaarsinnaasaminnik tikisitsisalerumagamik, SIK-p siulittaasua Jess G. Berthelsen allappoq.
- Sulisartut akissarsiaqartitaanermikkut atugaat ullumikkut naammaginanngereeqisut isertuunneqarsinnaanngilaq oqaatiginngitsoorneqassanngilarlu pissutsit pissusiviusut tassaammata, pisortat suliffeqarfiutaasa SIK-p ilaasortaannut tunniuttagaat Sulisitsisut peqatigiiffiata GA-p tunniussinnaasaannut sanilliullugit ullumikkut annertunerummata.