Aningaasat sumut pippat
Nunatsinni aalisarnikkut aningaasat ingerlaarfiinik misissuinissaq Karl Lyberthip piumasaraa
Aalisartut piniartullu kattuffiata KNAPK-p akinik misissuisitsinerata takutippaa kalaallinut aalisartunut tunisinermi akigitinneqartut eqqaamiutsinni aalisartunut akitiginneqartunit appasinnerujussuusut. Misissuinerup ilaatigut takutippaa 2010-mi nunatsinni aalisartut raajanut kilomut 6,33 koruuninik pissarsisartut, Canadamilu aalisartoq 8,84 koruuninik pissarsisarluni. Tassani pineqartut assigiipput, tassalu issutup raajai, latinerisut Pandalus borealisimik taaguuneqartut.
Siumumiit Inatsisartunut ilaasortap Karl Lyberthip piumasaraa naalakkersuisut nunatsinni aalisarnikkut aningaasat ingerlaartarnerannik misissuisitsissasut paasiniarlugu aningaasat sumut pisarnersut.
– Nunatsinnut tamarmut iluaqutaassaaq aalisarnermi pissarsiat annersaat innuttaasunut nunamullu nakkartarnissaat, Karl Lyberth siunnersuunni pillugu oqarpoq, taannalu sisamanngorpat ualikkut Inatsisartuni oqaluuserineqassaaq.
– Nalunngilarput nunatsinni pisuussutit uumassusillit nalilipilussuusut, apeqqutaalerporli pisuussutinit taakkunannga inuiaqatigiit naammattumik pissarsisarnersut. Apeqqutillu imaaginnavipput: - Nunarput naammattumik pissarsisarpa? - Pisuussutinit uumassusilinnit pissarsiat annersaat sumut tuttarpa? - Pissarsiaq nunatsinni suliffeqarfissuarnut tuttarpa imaluunniit aningaasat nunatta avataanut tuttarpat? - Nunarsuarmi akinut naleqqiullugit kalaallit aalisartut tunisinerminni qanoq pissarsisarpat? - Akissullu naaggamik akineqassappat, taava akit assigiinnginnerannut suut peqqutaappat?
– Aningaasat ingerlaartarnerat misissorneqalerpat apeqqutit amerlanerit takkutissajunnarsipput, taamaattumik suliap aallartinnissaa pingaartuuvoq, Karl Lyberth oqarpoq, neriuutigalugulu misissuinikkut qulakkeerneqassasoq nunatsinni aalisarnikkut pissarsiap annersaa inuiaqatigiinnut kalaallinut tuttartoq.