Aningaaserivik allannguivoq: Aalisarneq aningaasaliiffigeqqinniarpaa
Aalisarnermut inatsit nutaaq piujuartitsinermik tunngaveqartoq atuutilerpat Grønlandsbankenip aalisarneq aningaasalersortaleqqissavaa, siunissami pissutsit qanoq ikkumaarneri nalornissutigineerummata.
Leiff Josefsen
Grønlandsbanken aalisarnermik inuussutissarsiuteqartut aningaasalersorneqarnerannut peqataassaguni, aningaasaqarnikkut piujuartitsisumillu aalisarneq aalajangiisuulluinnarpoq.
Aalisarnermut inatsit nutaaq tunngavissaqarluartitsivoq, aningaaserivimmi pisortaq Martin B. Kviesgaard Sermitsiamut oqarpoq.
Aalisarnermut inatsit nutaaq tunngavigalugu, sinerissap qanittuani aalisarnermut aningaasaliissuteqarnissamut periarfissaq Grønlandsbankenip qanoq isumaqarfigaa?
- Aningaasaqarnikkut aqutsinikkullu piujuartitsinissaq uagutsinnut aalajangiisuuvoq. Piujuartitsisumik pisassiisoqarnissaanik sulissutiginninnissaq maanna inatsimmi erseqqissarneqarpoq, IOK-millu periarfissaqarneq ilanngullugu, taava aningaasaleeqataaqqilernissamut periarfissaqarluarpoq. Soorunami aalisartup taarsiisinnaassusaa aningaaseriviup nalilersortuaannarpaa, kisianni aningaasaliinissamut piumasaqaatit piuppata taamaaliorsinnaavugut, Martin B. Kviesgaard erseqqissaavoq.
Tunngaviusut pioreerput
Grønlandsbanken aalisarnermut aningaasaliinernut nutaanut peqataasinnaava?
- Oqaatigineqareersutut piujuartitsinissamut tunngaviusut pioreerput, taamaattumik taamaaliorsinnaavugut. Sinerissap qanittuani raajarniaaneq nalinginnaasumik ingerlalluarpoq, kisianni annertuumik aningaasaliisoqartariaqarpoq, tamannalu misissorusupparput. Sinerissap qanittuani qaleralinniarneq IOK-mut periarfissaqalissaaq, aalisarnerullu tamatuma misissornissaanut piviusorsiornerussaaq, aningaaseriviup pisortaa ilisimatitsivoq.
Aalisartut ullumikkut aalisarnermik ingerlatsisunit angisuunit aningaasalersorneqartut aningaaserivimmit aningaasalersorneqarsinnaassappat?
- Tunngaviusumik isumalluarpugut, soorunamili nalinginnaasumik taarsiisinnaassusermik naliliisoqassaaq, taamaattumillu qularnanngitsumik aningaasatigut ajornartorsiuteqartoqassalluni. Aalisartunik utoqqaanerusunik pisassaminnik tuniniaanissamik soraarninngornissamillu periarfissaminnik atorluaasunik aamma qularnanngitsumik peqassaaq, Martin B. Kviesgaard oqarpoq nangillunilu:
- Sinaakkutissatut piumasaqaatit akuerineqarsinnaalerpata, aamma uumassusilinnik aningaasaqarnikkullu piujuartitsinissamut pilersaarusiortoqarpat, aalisarnermut taarsigassarsisitsisarnerujumalluni Grønlandsbankenip siusinnerusukkut oqaatigereerpaa.
